6
Paapc khou Theihmei khatni Khrista khou Ringhmei
1 Kum e thei, aniu akumhna sa kho cho? Ravguangc zauzian mbu hay hay bam khang aniu paapc taanc bam kho na cho? 2 Kiuc hamh e! Aniu paapc biak thangc thu theic tang the; akumhna aniu paapc khou lungc bam dat ni cho? 3 Duilupna Khrista Jisu khou kariu kanmei aniu hei kamei theihmei khou tei lay theic kanmei tuang di the twmei nangniw thay mak nah cho? 4 Pu tuang hymdaihmei pumtan paan rui Khrista ta theihmei khou rui tiringcthaulou kanmei kumcna, aniu ni panty kathanc khou lungh khang, aniu duilup khou tei kamei lev tarou khou mbeihlou kazauhna kamei theihmei khou tei lay theic kazauh the.
5 Aniu ni mi hei kumcna, kamei theihmei khou tei lay theic e thei, mi hei kumcna kamei ringcthau datmei khou tei ni lay ringcthau puni. 6 Aniu paapc bangc sw dat mak khang, paapc pumtan tei swmaan khang, aniu tuang karaanmei mei ta tei Khrista lev theihchouc khou thaengc luai kan the twmei aniu thay e. 7 Kalam thu, mi kumna theic kanpui mei tei thu kamei paapc khou rui duak the. 8 Aniu Khrista lev theic nchamc e thei, aniu Khrista lev ringc nchamc puni twmei aniu lwm e. 9 Kalam thu Khrista ta tei tiringcthaulou dat kan thena, kamei theic dat lak khe—theihmei rui kata ngam dat lak khe twmei aniu thay e. 10 Kumna, kamei theic kan thena, paapc rui kata ngam dat mak khe, kumna kamei Ravguangc lev lungc nchamcmei panty khou lungc bam the. 11 Mi tei kumcna, nangniw hei paapc biak thangc thu theic the, tiki Khrista Jisu khou Ravguangc lev ringc nchamc bam the twmei ning nina the.
12 Mi zaeng rui, pumh rui kahawmei tei ti-nthanlou dat mak khang, paapc ta nangniw pumc tuang kaipouc tisw dat lak nina the. 13 Simei khou sinsw khang nangniw pumc nanw akhat na ta sini paapc khou tiilou dat lak nina the. Mi phaan tei theihmei khou rui tiringcthaulou datmei mei swna nangniw ta Ravguangc khou tiilou nina e; khatni ravchaptatmei khou sinsw khang nangniw pumc nanw guay Ravguangc khou tii gutlou nina e. 14 Paapc ta nangniw tuang kaipouc tisw dat lak nina the; kalam thu nangniw Riakdanv bangc khou bam dat mak khe; Ravguangc zauzian bangc khou bam di the.
Ravchaptatmei Bangc nunc
15 Kum e thei, aniu Riakdanv bangc khou hamhna Ravguangc zauzian bangc khou bam di thena, aniu paapc taanc di kho twna cho? Kiuc hamh e! 16 Nangniw ta gaanv khat khou bangh swna tiilou pwkhou, nangniw hei kalat piu bammei nangniw kaipouc bangc tei the twmei nangniw thay e. Nangniw hei theihmei khou zayloumei paapc bangc hamh e thei ravchaptatmei khou zayloumei lat piumei bangc sw bam nuh e. 17 Tiki Ravguangc ta thuancku kho! Kalam thu kaganv akhat khou nangniw paapc bangc sw bam khwan sini, ntaw thu nangniw khou dincloumei latdyn tei nangniw lunghgutna piu the. 18 Nangniw ta paapc ngamv khou rui laduaklouna ravchaptatmei bangc sw the. 19 Nangniw khou meic pumc tuang suanmei naipui zaeng rui, maansei tuang riak khou sa tuang e. Kaganv akhat khou nangniw rana nangniw ta simei taanv taanh khang mphuammei khatni simei bangc swna tiilou bam khwan e. Mi tei kumcna nangniw ta sw nthanloumei panty khou zaylou khang, nangniw ta ravchaptatmei bangc swna tii gutlou nina e.
20 Nangniw paapc bangc sw bammei douc tei, ravchaptatmei khou rui nangniw nyngsw bam khwan e. 21 Nangniw ntaw zak datna bammei taanv guay tuang thay nangniw khang tabui nai thah? Mi taanv thay tei thu theihmei e. 22 Tiki ntaw thu nangniw ta paapc khou rui laa duaklou the, kumna nangniw Ravguangc bangc nunc di the. Mi tuang thay kiu thu nangniw ta nthanmei khou zayloumei, kumna ringcsuangmei laamei hei the. 23 Kalam thu paapc taanv phy thu theihmei e; tiki Ravguangc kaipat thu Poubauhmei Khrista Jisu khou ringcsuangmei e.