5
Lwmmei Paan rui Ravchaptatmei Swna Chakloumei
1 Lwmmei paan rui aniw ta ti-nzihlouna Poubauhmei Jisu Khrista paan rui Ravguangc lev aniu kak khou chuzaenghmei nai dat the.a 2 Khrista rui aniu ta ntaw aniu laatowna bammei Ravguangc zauzian khou, lwmmei paan rui phungc guanglou the. Kumna Ravguangc tuang hymdaihmei tei aniu ni lay laa punimei khang tei lwmgayna neihla bam e.b 3 Mi na hamh e, aniu ryanramei ariwmei khang tei neihla bam e,c kalam thu ryanramei rui khaengvthaymei tiguang e; 4 khaengvthaymei rui Ravguangc rui laalou nuhmei kheiliak tiguang e, kumna Ravguangc rui laalou nuhmei kheiliak rui lwmgaymei tiguang e. 5 Mi lwmgaymei hei rui aniu ta tichangamclou ni tu hamh e, kalam thu aniu khou tiiloumei Bumaengh Nthanmei paan rui Ravguangc tuang nzianmei aniu lungc khou bun keylou the.
6 Kalam thu aniu ramh sw thuy lakna bam khou, kaganv tangc pwkhou, meicsimei aniu khang, Khrista theiclou the. 7 Ravchaptatmei gaanv khat khang sini theiclou khang kungc sih tuang e. Meic gaymei khang thu theiclou diwmei ni nai bam nuh e. 8 Tiki aniu paapcmei sw bam khou, Khrista aniu khang theiclouna, Ravguangc kamei aniu ta adih nzian cho twmei lyanlou the! 9 Kazei paan rui aniu ta ravchaptatmei swna chaklou the, kum thena kapaan rui aniu ta Ravguangc lungpuam khou rui gulou rap puni di the. 10 Aniu hei Ravguangc khang howmumei sw bam khwan e, tiki Kanac Mpouh theicloumei paan rui aniu ta Ravguangc khou zaykariulou dat the. Ntaw thu aniu ta Ravguangc khou zaykariulou dat thena, kamei ringhmei paan rui aniu ta gulou puni the. 11 Mi na hei hamh e, ntaw aniu ta Ravguangc khou zaykariulou datmei Poubauhmei Jisu Khrista paan rui aniu Ravguangc khou neihla bam e.
Adam khatni Khrista
12 Meic gaanv khat khou rui mbaanv khou paapc guang the, khatni paapc khou rui theihmei guang the, Mi kumna theihmei hei meic guayna khou guanglou the; kalam thu meic guayna paapc taanc the. 13 Riakdanv tiilou makmei hu khou rui mbaanv khou paapc nai bam khwan di the; tiki kariak maek e thei paapc tei kachakh chaklou mak e. 14 Tiki Adam kumcna Ravguangc latdanv liamna kaniw paapc taanh mak khwan sini, Adam khou rui thauna Mousi nganv ni meicnunc ruc khou theihmei rui guanghtu bam khwan di the.
Adam hei guang punimei Jisu Khrista kumhmei tuang e. 15 Tiki Adam lev Khrista thu nchamc mak e; kalam thu Ravguangc kaipat hei thu Adam paap lev nchamc mak e. Adam paap zaeng rui meic mpeyna theic the. Tiki Ravguangc zauzian thu daic ranv the, kumna Jisu Khrista zauzian paan rui katuang katy kamanv maekmei kaipat meic peyna khang tiilou the. 16 Ravguangc kaipat lev Adam paap thu nchamc mak e. Adam paap khou rui "nkhuaimei the" twmei latzan keylou the; tiki paapc heizumei tangv "nkhuaimei hamh the" twmei kamanv maekmei kaipat hei tiilou dat the. 17 Adam paap zaeng rui, kakhou rui theihmei rui zyn the. Tiki Jisu Khrista tuang taanv thay thu adih daic kan thah! Kanganv maekmei Ravguangc zauzian kaipat khatni kamei rui tiiloumei ravchaptatmei kaipat laatowmei guay thu Khrista paan rui ringc puni.
18 Kum thena, gaanv khat khuay zaeng rui meic guayna ruc khou latzan keyloumei kumcna, Khrista tuang ravchaptatmei taanv paan rui meic peyna ta ti-nzihlou the, kumna ringhmei tiilou the. 19 Adam latliampui zaeng rui meic peyna ta paapcmei tiswloumei kumcna, Khrista lat piupui paan rui meic peyna ta ravchaptatmei tiswlou puni.