4
Abraham ta Champancloumei
1 Kum e thei aniu pupouc Abraham ta akumhna laalou kan tu cho? 2 Abraham ta kataanv paan rui ravchaptatmei swna chaklou tuang e thei, kamei kagaengh sw khang kalam asaekc nai ni tuang e. Tiki Ravguangc hu khou kagaengh sw khang maek e. 3 "Abraham Ravguangc khou lwmlou the, kumna karam lwm paan rui kata ravchaptatmei khang chaklou the," twna nthanmei latrik rui sa e. 4 Taanv taanclou tina tiimei tei thu taanv phy e, mi tei kaipat hamh e; kamei rui ntaanvna laa tuang de. 5 Kataanv khou hamhna, nkhuaipui mei ta nkhuai makmei e twna chakloumei Racguangc khou lwmmei mei ta tei, karam lwm paan rui Ravguangc rui ravchaptatmei khang chaklou e. 6 Taanv paan rui hamhna, Ravguangc rui kata ravchaptatmei e twna chakloupui mei tei sangaymei e twna David rui mi kumna salou e:
7 "Kakhuay guay kuakloupui mei tei,
kapaap guay gum binloupui mei tei sangaymei e!
8 Poubauhmei rui kapaap guay chaklou makpui mei tei sangaymei e!"
9 Mi David rui sangaymei e twna sa bammei hei, gihruamhmei nunc khang na cho? Hamh e, gihruamh makmei nunc khang ni de. Abraham ta karam lwm paan rui ravchaptatmei swna chaklou the twna aniu rui sa bam e. 10 Mi kiu akumhmei ganv khou cho? Kamei gihruamc tangv khou ny, gihruamh mak khou cho? Mi tei gihruamh mak khou de; gihruamhmei tangv hamh e. 11 Mi tangv rui kamei gihruamc tuang de. Lwmmei paan rui kata ravchaptatmei swna chaklou the twmei madanhmei tuang swna kata gihruamc tuang de. Mi zaeng rui, Abraham hei Ravguangc khou lwmmei guay khatni gihruamh mak sini ravchaptatmei e twna Ravguangc rui chakloumei guay pu e. 12 Kamei hei gihruamhmei nunc pu nii e; twmei thu—gihruamhmei na hamhna, aniu pupouc Abraham kamei gihruamh mak khou lwmna lungc kanmei tei kumcna, lwmmei panty khou lunghmei gihruamhmei nunc pu e.
Ravguangc rui Nrianhloumei tei Lwmmei Paan rui Laatow tuang e
13 Mi kandic hei kaniw khang tii puni twna Abraham khatni kakikta khou Ravguangc rui nrianhloumei tei kamei Riakdanv piumei paan rui hamh e; tiki lwmmei paan rui ravchaptatmei swna chakloumei paan rui de. 14 Ravguangc rui nrianhloumei tei Riakdanv piumei nunc khang tiilou ni tuang khwan e thei, lwmmei hei nsa di the, khatni Ravguangc latryan hei kabah maek khe. 15 Riakdanv rui Ravguangc lungpuam phungc guang e; tiki kariak maek e thei, kariak twanlyammei ni maek e.
16 Mi nrianhloumei hei lwmmei paan rui laatow khang e, kalam thu Abraham kikta guay khang zauzian swna tiilou khang, Riakdanv piumei nunc khang na hamhna, Abraham kumcna lwmmei guay khang e. Kalam thu kamei hei meic guayna pw e. 17 Kalam thu, "Ai rui nang ta zaatc guayna pu tiswlou the," twna nthanmei latrik rui salou the. Mi latryan hei Abraham rui lwmmei Racguangc, theihmei ta tiringcthaulou datmei khatni maekmei ta kalatdanv rui tinailoumei Racguangc mikzaw khou gay e. 18 Rigwn nuhmei lwnlung lungc twan khwan sini, Abraham tei lwmmei paan rui, "Nang kikta gaanchuangcna zu cha pat puni," twna saloumei kumcna kamei zaatc mpeyna pu sw the. 19 Kamei tingkwm phay khat dou tangc the, kanow Sara ni karacpeicna, kaney pumc khou rui meic cha nuhpui ganv twan the. Tiki karam lwm kachanh mak e. 20 Karamlum maan mak e, khatni Ravguangc latryan ta lwmsi mak e. Kamei lwmmei tanc thauna, Ravguangc ta thuanc khwan e. 21 Ravguangc thu kamei rui taanclou ni twna nrianhlou kan e thei taanclou ngam de twmei kamei lwm tiph tip bam khwan e. 22 Mi zaeng rui, "Lwmmei paan rui Ravguangc rui kata ravchaptatmei e twna chaklou tuang e." 23 "Kata ravchaptatmei e twna chaklou the," twmei lat hei kakhang na hylou tu hamh e; 24 aniu Kaipouc Jisu ta theihmei khou rui tiringcthaulou datmeipu kakhou lwmmei paan rui ravchaptatmei e twna laalou punimei nunc aniu khang ni e. 25 Aniu khuay zaeng rui kata theic khang tii pat the, kumna aniu ta ti-nzihlou khang kata tiringcthaulou dat the.