3
1 Kum e thei, Jihudimei swmei tuang tabui gaeng tuang naina cho? Gihruamhmei rui tabui gaengna cho? 2 Kalam katana khou mbu e! Rey liangmei khou, Ravguangc rui kalat Jihudimei khou nsinlou the. 3 Tiki kaniw meic gaanv saekc tei lwm nuh makpui zaeng rui, Ravguangc hei lwm nuh makmei de twna sa nina cho? 4 Kiuc hamh e! Meic guayna saraemc ngam kan sini, Ravguangc thu nchumh e.
"Nang sa pat pwkhou,
nang nchumh e twmei thay puni;
latzan khou nang ngam puni."
twna hylouna nai e.
5 Aniu nkhuaimei taanhmei rui Ravguangc rui nchumhmei taanhmei ta tihow nthanlou e thei, aniu akumhna sa kho cho? Ravguangc rui kalungpuam aniu ruc khou tikeylou bammei hei kamei nkhuai e twna sa kho cho? (Maansei riak thei layna ai sa tuang e.) 6 Kiuc hamh e! Ravguangc kamei nchumhmei taanh mak e thei, akumhna kamei mbaanv ta latzan sw ngam nina cho?
7 Ai nkhuaimei hei rui Ravguangc thu nchumhmei e twmei nthanna lyanlouna, mi tei rui Ravguangc ta tihymdaiclou e thei, tabui swna ata paapcmei e twna latzan sw bam nina cho? 8 Kum e thei, "Gay khang aniu simei taanv taanc di kho," twna aniu sa kho cho? Mi hei kumcna ai rui sa e twna meic gaanv saekc rui akhou nkhamlouna ata sw zak lou the. Kaniw mi kumcna samei hei nkhuaimei e twmei hei nchumhmei latzan the.
Ravchaptatmei Gaanv Khat na Sini Maek e
9 Kum e thei, aniu Jihudimei hei Grikmei suangc gay mbumei tuanga nai bu cho? Kumc mak e! Jihudimei ni, Jentailmei ni paapc ngamv bangc khou bam e twmei ai lyanlou kan the. 10 Nthanmei Latrik rui sa e:
"Ravchaptatmei gaanv khat na sini maek e,
11 ningtyngmei gaanv khat na sini maek e,
Ravguangc ta phumei gaanv khat na sini maek e.
12 Meic guayna Ravguangc khou rui duc tat kan the;
kaniw guayna chaeng maanv ngam the;
nchumhmei taanhmei gaanv khatna sini maek khe,
akhat na sini maek khe.
13 Kaniw mwang tei laancloumei tarou kumc the;
kaniw baley khou rui simei, saraemhmei luangc pat the,
kaniw chy khou rui meic theic nimei nrui khay luangc pat the;
14 Kaniw mwang tei nkhucmei syang rui padik the.
15 Meic swluai sw tiat khang kaniw phay nthaan the;
16 Kaniw tatloupui bamv kathuic khou swkasic karoucna ganclou the.
17 Kaniw hei chuzaenghmei chaeng thay mak khe;
18 Kaniw khou Ravguangc ta pingmei maek khe."
19 Riakdanv khou hyloumei guay tei Riakdanv bangc khou bammei nunc khang e twmei aniu thay e. Mi tei rui maansei mwang guay ta thingclou khang khatni Ravguangc rui mbaanv kapwm ta latzan sw khang e. 20 Kalam thu meic gaanv khat na sini Riakdanv ngaekpui paan rui Ravguangc mikzaw khou ravchaptatmei sw ngam mak e. Riakdanv tuang taanv thu maansei ta nang paapc taanc the twmei dinh khang de
Akumhna Ravguangc rui Aniu ta Ravchaptatmei Tiswlou Tu Cho?
21 Ntaw thu, Riakdanv kazauh makna ravchaptatmei swpui chaeng Ravguangc rui ndauhlou the. Mi lam khou hei Mousi tuang Riakdanv khatni Muhzwng nunc rui ni salou the. 22 Mi kiu thu, Jisu Khrista khou lwmmei guay ta Ravguangc rui ravchaptatmei tiswlou the. Kakhakh kalangv nai dat mak khe. 23 Kalam thu meic guayna paapc taanc ngam the, kumna Ravguangc tuang hymdaihmei tei guang tangh mak khe. 24 Tiki Ravguangc kazauzian kaipat rui, kaniw ta thuakloumei, Khrista Jisu paan rui kaniw ta ravchaptatmei tiswlou the. 25 Kazei rui paapc khaeng kuaklou khang, Ravguangc rui Khrista Jisu ta tii pat the; mi kuakloumei hei kakhou lwmmei paan rui laa khang e. Mi hei Ravguangc kamei thu nchumhmeipu e twmei lyan tuang e. Tat kanmei ganv khou tei thu, khaengvlouna meicnunc paap guay tei zauc samlou the. 26 Tiki ntaw thu kamei hei thu nchumhmei taanhmeipu e twmei lyanna, kamei rui kaniw paap guay nsa ganclou dat makna Jisu khou lwmmei guay ta ravchaptatmei tiswlou the twmei kamei rui lyanlou the.
27 Kum e thei, aniu gaengh sw nuhpui lam tabui naina cho? Khat sini maek e! Mi kiu tabui zaeng rui cho? Aniw Riakdanv piupui paan rui cho? Kiuc hamh e! Lwmmei paan rui de! 28 Kum thena, Riakdanv piumei paan rui hamhna, lwmmei paan rui aniu ta ravchaptatmei tiswlou the twmei thay the. 29 Ravguangc hei Jihudimei nunc Racguangc na dinah cho? Jentailmei nunc Racguangc ni hamh nah cho? Ngguay, kamei Jentailmei Racguangc ni de. 30 Ravguangc thu akhat na de, kumna Jihudimei ta ni, Jentailmei ta ni kaniw lwmmei paan rui ravchaptatmei tiswlou puni. 31 Kum e thei, lwmmei hei rui Riakdanv ta hei ganc thah? Ganh mak e! Aniu Riakdanv ta nthukna sw bam de.