2
Ravguangc Latzan
1 Meickai ta latzan swpui mei nang, nang khang ley duakpui chaeng maek e. Nang rui meickai ta swmei latzan tei rui nang ta ni sw puni, kalam thu nang rui nkhuai e twna samei kahak tei nang taanc bam e. 2 Ravguangc rui mi kumhmei guay ruc khou keyloumei latzan hei thu nchumhmei latzan e twmei aniu thay e. 3 Nang rui mi kumhmei nunc ta tei latzan sw lana kaniw taanc bammei tei nang ni taanc bam muai e thei, nang Ravguangc latzan khou rui duak puni de twna ning nah cho? 4 Ravguangc kazauzian daihmei paan rui khaengv saengcna kadyng kadyng khou latzan swlou tii makna, nang kata thouhsw makna bam tu cho? Kazauzian hei thu nang lunghlaic kan khang e twmei nang thay mak nah cho? 5 Nang lung tancna lunghlaic zihna bammei hei Ravguangc tuang nchumhmei latzan nungc khang kalungpuam nang kachwn bam tuang e. 6 Kalam thu Ravguangc rui meic katana khang kamei kamei rui taancloumei taanvphy tii puni. 7 Hymdaihmei, champouhmei khatni theic dat makmei ringcpaan laatow khang khaengvthayna gaytaanv taanc bammei nunc khang Ravguangc rui ringcsuangmei ringcpaan tiilou puni. 8 Tiki kakhang na ningna, nchumhmei ta laalou makna, simei khou tat bammei nunc ruc khou Ravguangc lungpuam keylou puni. 9 Simei taanc bammei nunc ruc khou tei ryanra ryanriumei keylou puni; reymei khou Jihudimei khang e, kumna Grikmei khang ni e. 10 Tiki gaytaanv taanc bammei nunc khang tei hymdaihmei, champouhmei khatni chuzaenghmei tii puni; reymei khou Jihudimei khang, kumna Grikmei khang ni e. 11 Ravguangc thu guhsw gahsw mak e. 12 Kaniw khang Mousi tuang Riakdanv maekna paapc taanhmei nunc tei ni Riakdanv kazauh makna maan puni, khatni kaniw khang Mousi tuang Riakdanv tei naina paapc taanhmei guay ta ni mi Riakdanv tei rui latzan sw puni. 13 Ravguangc hu khou ravchaptatmei swmei hei Riakdanv chupui mei ta hamh e; piupui mei ta de. 14 Jentailmei nunc khang Riakdanv hei maek e; tiki Riakdanv khou naimei latdanv guay tei kaniw lungc khou ni naina tat bam e. Mi tei kaniw khang kariak latdanv the. 15 Riakdanv khou naimei latdanv guay tei kaniw lungc khou hylou bam e twmei mi tei rui lyan e. Kaniw khou naimei si gay thaymei lungning rui sa bammei hei nchumh e twna dinc e; kalam thu kaniw lungning rui nkhuai e hamh e thei nchumh e twmei dinc e. 16 Kumna Ravguangc rui meic guayna tuang meic thay makmei lungning ta, Jisu Khrista paan rui latzan swpui nungc kiu, mi hei kumcna sw puni twna ai rui nangniw khou dinc ndauh bammei Gaychamv rui sa e.
Jihudimei lev Riakdanv
17 Jihudimei nang khang thu akumh puni cho? Ai Jihudimei e twna nang sa e; Riakdanv khou ngangvlouna Ravguangc mei e twna gaengh sw e. 18 Ravguangc ningmei tabui tei cho twmei nang thay e, khatni nchumhmei laa khang Riakdanv khou rui nang thay the. 19 Nang hei mik tiatmei ta chaeng zay nimei mei e, zinghmei khou bammei nunc khang gaanhmei e, 20 mpangmei ta nchamlou nimei mei e, khatni alauc nunc khang dinclou nimei mei e twmei nang thay e. Riakdanv khou tei rui ramh guayna thay the khatni mi khou tei nchumhmei nai e twmei nang thay e. 21 Meickai ta nchamloupui mei, nang tabui swna nang rana nang ta thu ncham mak tu cho? "Kaihouc lak nina e" twna nang rui dinc e, tiki nang thu kaihouc e. 22 "Lungcmaanv lak nina e" twna nang rui sa e, tiki nang lungcmaanv e. Nang ravmaengc ta nuh mak e twna sa laki ravkai kwamtu tu cho? 23 Nang khou Ravguangc tuang Kariak Latdyn nai e twna gaengh sw lana, Riakdanv swbakna Ravguangc zaw swkasic bam tu cho? 24 "Jihudimei nang zaeng rui Jentailmei nunc rui Ravguangc zanc sa kasic e," twna nthanmei latrik khou hylouna nai e.
25 Nang Riakdanv piu e thei, nang gihruamhmei tuang kabac nai e; tiki nang Riakdanv piu mak e thei, nang hei ni gihruamc makpui riath de. 26 Gihruamh makmei Jentailmei rui Riakdanv ngaek ti thei, Ravguangc rui kata gihruamhpui riath di the twna laalou pu lakna cho? 27 Kum e thei gihruamh mak laki Riakdanv piumei Jentailmei rui hyloumei latdanv tei sin khatni gihruamc laki Riakdanv thu piu mak twmei Jihudimei nang ruc khou latzan sw puni. 28 Gihruamc changhmei, Jihudimei ling kiu thow tei cho? Meic pumc tuang khou gihruamhmei, kapaengc khou Jihudi swpui mei tei hamh e. 29 Jihudimei ling kiu thu, kalung tei Jihudimei swpui mei tei e. Mi kiu thu hyloumei Riakdanv rui hamhna, Ravguangc Bumaengc rui kalung tei gihruamhpui mei tei e. Maansei rui hamhna, Ravguangc rui thuancloumei laa niipui mei kiu mi kumhpui mei hei e.