12
Ravguangc Siamruai Swmei Panty
1 Mi zaeng rui, chana thiu, Ravguangc tuang heidi daihmei zauzian zaeng rui, ai rui nangniw khou ranvna huaycha e: Nangniw pumc Ravguangc khang reic patloumei khatni kata tipianloumei nringh ravcha swna khaenglou o. Mi hei kumcna nangniw Ravguangc ta kalum nipui thouc e. 2 Nangniw mi mbaanv tuang thiak lay nzeic rio; tiki nangniw lungning kathanc khou kalaic patna, nangniw panty lwnlung tikalaic o. Kum pwkhou tabui tei Ravguangc rui ningmei cho twmei thu, tabui tei gaymei khatni kamei rui kahawmei khatni nthuihmei cho twmei nangniw thay puni.
3 Ravguangc rui akhou tiiloumei kazauzian kaipat paan rui, ai rui nangniw meic katana khou sa tuang e: Nangniw rana nangniw ta ning kauh langvna ning rio. Nangniw kakhanh chuyna kakhanh o, kumna Ravguangc rui nangniw khou tiiloumei lwmmei chuath thei tei layna nangniw rana nangniw ta latzan sw o. 4 Meic gaanv khat pumc khou nanw mpeyna nai e, kumna nanw kathuic hei kathouc kathouc baic e. 5 Mi tei kumcna, aniu meic mpeyna hei Khrista khou pumh akhat sw the, kumna pumh akhat tuang nanw pang swna aniw meic guayna akhat na swna kariu bam tuang e. 6 Aniu khou tiiloumei zauzian thei layna aniu khou kaipat baic baicna nai e. Ravmundinhmei kaipat naipui mei tei rui, mi tei katuang lwmmei chuath thei layna sinsw nina e. 7 Mi tei siamruai tuang e thei, siamruai taanv khou sinsw nina e; nchamloumei tuang e thei, nchamlou nina e; 8 meickai ta katiuloumei tuang e thei, katiulou nina e; lungcsimei khang tii patmei tuang e thei, baanh daicna tii nina e; kapy tuang e thei, mi tei lunghgutna taanc nina e; zauzian taanv tanhmei tuang e thei, neihlana taanc nina e.
9 Khat khat ta nzian changhna nzian nina e. Simei ta karaeng o; gaymei ta sin ntipna sin o. 10 Nangniw khat khat ta chana punav swna nzian diangcna nzian o; khat khat ta chakhwang sw o. 11 Aliauh makna taanc o; lunghgutna Poubauhmei siamruai sw o. 12 Lwmgaymei khou tei neihlana bam o; ryanramei ganv khou khaengv thay o, khatni taek makna huayney bam o. 13 Lwmmei chana punav pang khou naimei, maekmei piu nzanhna lungc o. Ginkic phay pamcna lungc o.
14 Nangniw ta rairiumei nunc khang suaihiamlou o; sianglou rio. 15 Neihlamei nunc lev neihla nchamc o, kapmei nunc lev kap nchamc o. 16 Nangniw khat khat khang kadan thay o. Daihlwn sw rio; lungcsimei nunc pam sw o.a Nang rana nang ta ningtyngmei the twna ramhsuath sw rio.
17 Meic gaanv khat na khou sini simei khang simei khangc rio. Meic guayna mikzaw khou gaymei tei taanc o. 18 Nangniw biak thangc rui nuhmei kamv, meic guayna chuzaenghna lungh khang sw o. 19 Nzianmei thiu, tabui nungc na sini khwm khangh rio; mi tei Ravguangc khang ganclou tio. "Khwm khanghmei thu atuang e, twna Poubauhmei rui sa e," twna hylouna nai e. 20 "Nang ta zauczihmei ndaepc bam e thei, titulou tio; kamei tari bam e thei, tizangvlou tio; mi hei nang rui kapy khou maithyn haenghmei khuaicloupui riath e," twna sa e. 21 Simei rui ngam rio; simei ta gaymei rui ngam o.