27
Paul Rom Thangc Tatmei
1 Aniw ta Itali thangc titat ni the twna dinglou lana, "Guangh Daihmei tuang Rickang" twna kawmei Rommei tuang rickang akhat tuang rihpy Julias baanc khou Paul aniw ta nsinlou the. 2 Asia tuang rungh nthaekc bamv guay khou tatlou nimei Adramittia thangc rui guangmei rungc akhat khou tuangcna aniw tat the. Thessalonikamei Makedoniamei Aristarkhas ni aniw lev tat nchamc khwan e. 3 Nthuanh thauna aniw Sidon kaidai tangc the, kumna Julias rui Paul ta nzianlouna kamei kapam nunc ta ariwna kakhang kage nai naimei tiilou kan khang nuhlou khwan e. 4 Aniw mi khou tei rui tat thau dat the, kumna aniw hu biak thangc rui mpwan nliu guangpui zaeng rui Kupras duipuidic tuang lim khou tat ngangh the. 5 Aniw Kilikia lev Pamphulia tat kaanna Lukia kandic tuang Mura kaidai khou guang the. 6 Mi khou tei Alekzandria tuang Itali tat nimei rungc akhat rihpy tei ariw lana, aniw ta mi khou tei tituangc the.
7 Aniw nzaengna tingmik mpeyna tat lana, ryanra sihna Knidas kaidai guang tangc the. Mi chaeng tei tat khang mpwan rui nuh mak khena, Salmone tat kaan keyna Kriti duipuidic lim khou tat key the. 8 Aniw kungc sihna ramkiang khian rana tatna Lasaia kaidai daeng khou naimei Giuga Makmei Runghthaekcbamv twmei khou guang tangc the.
9 Aniw mi khou tei kaganv tingsaengc sihna bamlou the. Kuakloumei Tingmika tei luai kan the, kumna ntaw thu rungh chau tat dat kunghpui ganv guang the. Kum tina Paul rui sa the, 10 "Meic nunc thiu, aniu mi khou rui tat thau dat nimei chaenglwan hei thu kungc sih puni the; rungh khou phungc bammei puat, rungh kahak khatni aniu panty nganv mpeyna maan puni the twmei ai how the." 11 Tiki rihpypu tei, rungh thoumeipu khatni rungh kaipouc lat laana Paul lat laa mak khe. 12 Mi bamv tei tingsei khou bam khang gaymei bamv hamh tina kaniw meic geihmei rui ni nuh e thei Phoinikia khou tingsei khou bam khang tat nii the. Phoinikia hei Kriti khou rui neihkey dihba khatni dihpy dihban khou naimei runghthaekcbamv e.
Duipui khou Pwanzingh Akhangvmei
13 Dihba pwan nliu rih ri ngangh tikhou, kaniw ningmei tei sw nuh the twna ning the. Kumna kaniw runghphey zay kuna nuhmei kamv Krit tuang duikhuangc khyanna tat the. 14 Tiki asaanh mak khou "Dihpy Neihpat" twna kawmei tanhmei pwan ramkiang thangc rui nliu key the. 15 Mi tei rui rungh ta tei key thui pwkhou, tat pat ngam mak khena mpatlou tina mpwan tei rui phungc tat the. 16 Aniw Kauda twna kawmei duipuidic launa akhat tat ruanna, dihba biak thangc mi lim khou key pwkhou, ngangvloupui bamv nai the. Kungc sihna mi khou tei rungh tuang hic tei bangc ntiplou the. 17 Kaniw mi tei zay patna, riangbuk rui ntalouna runghpy khou bangclou the. Surtis tuang duipui tin tuang sypung khou rungh tei sowlou pungh e twmei pingna, runghphey zay keyna mpwan rui rungh ta tei tiphungc tat the. 18 Pwanzingh tei nthaekc mak khena, nthuanh thauna kaniw rui rungh khou phungc bammei puat asaekc tei kalat ganc the. 19 Kumna nthuanh thau datna rungh tuang na asaekc ni ganc the. 20 Tingmik mpeyna aniw neihmik ni, gaanchuangcna ni how dat mak khe. Kumna pwanzingh tei ranvna nthaekc makna guang bam the. Nkhamh khou thu aniw ringc dat pungh e twmei lwm taan the.
21 Meic nunc tei kaganv tingsaengc sihna tu zangv makna guangmei tangv, Paul kaniw hu khou dingthauna sa the, "Meic nunc le, ai rui samei tei chulouna Kriti khou rui tat pat makna bam khwan e thei, mi kasicmei khatni maanmei hei pat lak ni tuang e. 22 Tiki ai rui nangniw khou sapui tuang e: bauc o! Nangniw gaanv khat na sini theic ni tu hamh e; rungh na khang de maan khang. 23 Kalam thu ai hei katuang sw bammei khatni ai kalum bammei Racguangc tuang baanchara zingbangc tei akhou guangna, 24 'Ping rio, Paul! Nang Kaisar hu khou ding puni. Ravguangc rui nang khatni nang lev tat nchamc bammei guay tuang panty ni gulou puni,' twna sa the. 25 Mi zaeng rui bauc o! Ravguangc kamei rui akhou saloumei kumcna swlou puni de twmei ai lwm e. 26 Aniu ta duipuidic akhat khou phungc patlou puni."
27 Zaeng ruhna padeihmei nungc zingbangc, aniw pwanzingh ding khou Adria duipui khou nzuan tat bam khwan e. Zipchwng zaengc khou aniw ramkiang na guang lana khuangh the twmei rungh thoumei nunc tei ning the. 28 Kumna riang khou ramh nritmei ntalouna dui khou mpat key zauc pwkhou, khaep nchuih nthukmei ariw the. Kanak khath twna zauc dat pwkhou, khaep ruhna panguh na nthuk bam khwan the. 29 Kumna kaniw rungh tei tautuangc khou diangc pungh e twmei ping lana, runghbanghchei padeih, rungh thei khou mpat key the. Kumna tinggaanc pat khang huayney the. 30 Khoutei rungh thoumei nunc tei pak duak khang karamc thau the; kaniw rungh hu biak thangc tei runghbanghchei asaekc mpat keypui thak swna, hih tei dui khou mpat key the. 31 Khoutei, "Rungh thoumei nunc tei rungh khou bam mak e thei, nangniw ringc pw lak khe," twna Paul rui rihpy khatni rihmei nunc khou tei sa the. 32 Kumna rihmei nunc rui hih bangcloumei riangbuk dan taplou tina hih tei tat kan the.
33 Tinggaanc zaic ni khou, Paul rui kaniw khou katiu the, "Nangniw tu zangv makna khaengv guangmei zaeng ruhna padeih tangc the. 34 Nangniw ntyan katitna sini tu tho; nangniw theih mak khang tu nina the. Nangniw sam lu akhat na sini maan ni tu hamh e." 35 Mi hei salou lana, Paul tei ntyan laana, Ravguangc ta thuanckulouna, kaniw hu khou tu the. 36 Khoutei kaniw ni bauc thau the, kumna kaniw guay ni tu the. 37 Aniw rungh khou bammei meic guayna gaanv 276b e. 38 Aniw meic guayna tu tangna rungh tei ti-nthaan khang gehu guay tei duipui khou kalat keylou kan the.
Rungh Kalaimei
39 Tinggaanc pat the, tiki rungh thoumei nunc tei ramvkaanv thay mak khe; tiki duikun akhat tin sypung how lana, rungh tei mi khou tei guang sowlou nuh puni ny twna ning the. 40 Kumna runghbanghchei guay tei dan taplou tina dui bangc key kan the. Runghphey zay karimei tuang ntaloumei riang guay ni riclou the, khatni mpwan rui rungh ta hei hu biak thangc phungc gut khang hu khou naimei runghphey zay thau the. Kumna dui tin nzwanna pat the. 41 Tiki rungh tei dui lungc khou naimei sypung khou guang sow the, kumna kahu langv sow kaphumhlouna kalung dat nuh mak khe. Kathei biak tei ni dui luat tanhmei rui swbak ngam gut the.
42 Kangmei guay tei dui paengc thangc zaek patna pak kan mak khang swluai ngam ni the twna rihmei nunc tei rui sw thau the. 43 Tiki rihpy tei rui Paul ta gulou nii lana, mi tei sw nuh mak e twna khaem the. Kumna dui zaek thaymei guay kachaekc keyna dui paengc zaek pat rey tho twna kamei rui latdanv pat the. 44 Baihmei guay rui thing paek pw, rungh bakmei kiak pw koucna pat tho twna sa the. Mi kumna aniw meic guayna kabiu kabaeng makna dui paengc kaan pat the.