28
Melita khou
1 Aniw dui paengc pat tangc pwkhou, mi duipuidic tei Melita kaw e twmei thay the. 2 Mi ramcmei nunc tei rui aniw ta kadan sihna swlou e. Mi khou tei ting riu the, kumna nchu the. Kum tina mai sw thaulouna aniw ta riulou the. 3 Paul tei thing banv laa guangna diklou bam khou, mai chaengc thau tii thena nrui akhat patna Paul baanc khou kasiatcna nchow the. 4 Paul baanc khou nrui thaengc bammei ta how lana, "Mi pu hei meicdowmei lana khuangh e. Kamei dui khou rui mu duak pat the, tiki nchumhmei latzan rui kamei ringc nuh ti makna di the," twna mi ramcmei nunc tei kaniw khat khat khou sa the. 5 Tiki Paul kabiu makna nrui ta tei mai khou kathanh keylou kan the. 6 Kamei puamc thau pungh di the, hamh e thei theicna pun key pungh di the twna zauc bam khou, tingsaengc sih the tiki ramh khat sini sw tii makna, kaniw lungc kalaic datna, "Kamei hei rav akhat e!" twna sa the.
7 Mi khou tei rui duh makmei bamv khou, mi duipuidic tuang kaipouc Publias twna kawmeipu lungc bam khwan e. Kamei rui aniw ta laalouna, zaeng neih thumh kadaeng khou bangvlou the. 8 Publias pu zeibana kapumc chaengcna zip bam khwan e. Paul kadaeng khou guangna kabaanc sungcna huayneylou the. Khoutei kamei gay dat the. 9 Mi tei swlou pwkhou, mi duipuidic khou nnaumei guay guangna tigaylou kan the. 10 Kaniw rui aniw khang kaipat mpeyna tiilou the, kumna aniw tat thau dat pwkhou aniw khang chaeng khou kage naimei guay kaniw rui tiilou the.
Melita khou rui Rom Thangc
11 Mi khou tei tingsei saanv bamlouna, bw thumh tangv "Naphinhmei Chana nei" twna kawmei Alekzandria tuang rungc akhat khou tuangcna aniw tat dat the. 12 Aniw Surakus kaidai guang tangcna, mi khou tei zaeng neih thumh bamlou the. 13 Mi khou tei rui tat thau datna, Regiam kaidai guang tangc the. Nthuanh thauna dihba pwan nliu nganghna, zaeng neih nei khou Potioli kaidai tangc the. 14 Mi khou tei lwmmei nunc gaanv saekc ariw khwan e, kumna neidak akhat neihlou khang kaniw rui lat huaycha the. Mi kumna aniw Rom tangc the. 15 Rom khou bammei lwmmei nunc aniw guangmei chamv chu lana, Appia Kaithyan khatni Ginbangvkai Kathumh twna kawmei bamv tei nganv aniw ta riu khang pat the. Paul kaniw ta how pwkhou, Ravguangc ta thuancku the khatni mpeyna kadiwgay the.
Paul Rom khou Bammei
16 Aniu Rom guang tangc pwkhou, rihmei khat rui gaekna Paul ta kanyng swna bam khang nuhlou the.
17 Zaeng neih thumh tangv, Paul rui mi khou tei bammei Jihudimei kapy nunc ta kaw kaduai the. Kaniw guang kaduai pwkhou, kamei rui kaniw khou sa the, "Chana thiu, ai aniu zaat ruc khou ni, aniu pupouc nunc khou rui tat guangmei riak ruc khou ni simei taanv taanclou mak e; tiki Jerusalem khou rui ata nymna Rommei nunc baanc khou tiilou the. 18 Rommei nunc rui akhou lat thanvmei tangv, ai theic biuhpui taanv taanclou tuang maek e twmei kaniw thay lana, ata mpatlou dat nii khwan the. 19 Tiki mi tei nuh mak e twna Jihudimei nunc rui sa tipui zaeng rui, ai a zaat nunc ruc khou lat phungclou khang maek e, tiki atuang latbamv hei thu Kaisar khou phungclou mak nuh makpui tuang guang the. 20 Mi zaeng rui nangniw ta ariwna pary rah khang ai lat huaychamei tuang e. Ata mi kumna kangriang ntalou bammei hei, Israelmei rui rigwnna bammeipu zaeng rui e."
21 Kaniw rui Paul khou mundawna sa the, "Nang lam khou Judia thangc rui tatdyn akhat na sini hy guang tuang ni maek e khatni Judia thangc rui chana nunc guangna nang lam khou sina raclou tuang hamh e thei poulou tuang maek e. 22 Tiki nang rui ningmei tabui cho twmei thu aniw chu nii e; kalam thu nang kazauh bammei kang lam khou thu nuh makmei lat kabamv kathuic khou sa bammei ta aniw thay the.
23 Kumna kaniw Paul lev tingmik akhat nrianhlou lana, meic geicna Paul daeng khou guang the. Laukhwan rui thauna zingbangc nganv Ravguangc Guangcdic lam khou raclou the, khatni Mousi tuang Riakdanv khatni Muhzwng nunc rui hyloumei guay khou rui Jisu lam khou kwmlou nuh khang raclou the. 24 Kaniw gaanv saekc thu kalat khou tei kwmlou the; tiki baihmei thu lwm mak khe. 25 Kaniw tei lungh chamh makna tat dat kan the; tiki kaniw ntamv ni khou Paul rui mi kumna salou kan the: "Bumaengh Nthanmei paan rui muhzwng Isaia rui aniu pupouc nunc khou mi kumna nthanna salou e: 26
'Nang tatna mi mei nunc khou mi hei sa o:
Nangniw nking changh nking bam sini
kabah thay mak puni;
nangniw zauc changh zauc bam sini
how mak puni.
27 Kalam thu mi mei nunc lungning hei ndy the,
kaniw nu ni diat ngam the,
khatni kaniw mik ni tiat ngam the.
Kum mak khwan e thei,
kaniw how ni tuang e,
kaniw nu rui chu ni tuang e,
kaniw lungning ning pat thay ni tuang e;
kumna kaniw akhou hanc guangna
ai rui kaniw ta tigaylou ni tuang e,
twna Ravguangc rui sa e.'
28 "Ravguangc tuang guloumei chamv tei Jentailmei nunc khang tii tat kan the twmei nangniw thay o. Kaniw thu nking puni!" 29 (Paul rui mi hei saloupui tangv, Jihudimei nunc tei kaniw rana ranv sihna agina tat kan the.)a