26
Paul rui Agrippa khou Samei
1 "Nang, nang lam khou ntaw sa nuh the," twna Agrippa rui Paul khou sa the. Khoutei Paul kabaanc ntyng patna sa the:
2 "Guangh Agrippa! Jihudimei rui aruc khou phungc kulou bammei lat lam khou aseic nang khou sa khang ariwmei hei sangaymei e twna ai laa e. 3 Kalam thu Jihudimei riak khatni kaniw khou nchamc makmei naimei tei nang thay chuyna thay e. Kum thena khaengvna ai samei hei chulou pw khang huay e.
4 "Ai alauc khou rui alwnlung akumhna lungc thau tu cho twmei Jihudimei guayna thay e. Apanty kapwm, thaurey khou azaat pang khou, mi tangv Jerusalem khou akumhna lungc kan tu cho twmei kaniw thay e. 5 Kaniw rui sa nii e thei, thaurey khou na rui ai hei aniw tuang ravchap tat nthukmei kang, Pharisi swna ai lungc guang e twmei kaniw thay de. 6 Ai mi khou hei ata latzan sw khang ding bammei hei, Ravguangc rui aniw pupouc nunc khou nrianhloumei ta tei lwm e twpui zaeng rui e. 7 Mi kiu laatow puni twna lwmgayna aniw zaat tuang kaikhwang ruhna kanei rui zingbangc kalaanv Ravguangc ta kalum bammei tei the. Mi ta hei lwm tipui zaeng rui, He Guangh, Jihudimei rui aruc khou khuay mphunlou bam tuang e. 8 Mi khou bammei nangniw tabui swna Ravguangc rui theihmei ta tiringcthaulou e twmei lwm ngam makna cho?
9 "Nazareth mei Jisu zanc ta hei swmaan khang ngampui kamv taanc ni twna ai ning khwan e. 10 Mi tei ai Jerusalem khou taanc kan the. Ai amuh daihmei nunc khou rui ngamv laa lana, Ravguangc mei nunc meic mpeyna ta kangkai khou lou the. Kaniw ta swluai khang lat dan pwkhou, ai ni nuh the twna kazuanlou the. 11 Ai rui kaniw tuang sinagog guay khou katup sihna ryanramei tii kan the khatni kaniw lwmmei mpat khang sw kan the. Ai kaniw ta heidikamv lunghpuamcna ginram kaidai nunc thangc nganv kaniw ta swkasic khang tat the.
Paul rui Kamei Lunghlaihmei Lam Rahmei
12 "Amuh daihmei khou rui ngamv laa lana, mi khang tei rui ai Damaskas thangc tat the. 13 He Guangh, chaengkui khou, kalaanv neih ndyng khou, neih riw suangc gaanhmei riw ai khatni athei lay tatmei guay ruc khou tingpuk thangc rui phian keymei ta ai how the. 14 Aniw guayna kandih khou pun key the. Khoutei, 'Saul! Saul! Nang tabui swna ata swkasic khang sw bam tu cho? Sauh ta nsuymei hei nang kabiu khang de!' twna Ibri lat rui akhou samei ai chu the. 15 Khoutei, 'Nang thow cho, Poubauhmei?' twna ai rui sa tikhou, Poubauhmei rui sa the, 'Ai hei nang rui swkasic khang sw bammei Jisu tei the. 16 Tiki nang thau ding tho. Nang ta atuang latdiumei khang laalou khang ai nang khou guangmei tuang the. Nang aseic how kanmeia khatni thei thangc ai rui nang khou lyanlou punimei guay tei nang meic baihmei guay khou ni raclou nina the. 17 Ai rui nang ta ndiulou punimei Israelmei khatni Jentailmei nunc baanc khou rui nang ta gulou puni. 18 Nang rui kaniw mik tiraklou puni, kumna kaniw ta zinghmei khou rui gaanhmei khou khatni seitan pumtan khou rui Ravguangc khou tingalanc guanglouna, kaniw akhou lwmmei paan rui kaniw paap guay kuaklou khang, kumna Ravguangc mei nunc pang khou kaniw tuang bamv khou kaniw bam khang e.
Paul rui Kataanv Lam Rahmei
19 "Mi zaeng rui, Guangh Agrippa, tingkauh thangc rui lyanloumei ndawman tei ai piuna taanc the. 20 Kumna reymei khou Damaskas khou, mi tangv Jerusalem khou, khatni Judia kapwm khou, khatni Jentailmei nunc khou tatna kaniw lunghlaicna Ravguangc khou guang nina e, kumna lunghlaihmei panty khou lungc nina e twna dinclou the. 21 Mi zaeng rui Jihudimei nunc rui ata Ravkai khou rui nymna swluai khang sw tuang e. 22 Tiki aseic nganvmei hei Ravguangc rui nkhavlouna ai mi khou hei dingna meic nthyammei daihmei katana khou dinc nimei lat hei dinctowmei tuang e. Ai rui dinc bammei kiu thu Mousi khatni muhzwng nunc rui mi kumna pat puni twna dincloumei tei e: 23 mi kiu thu Khrista theiclou puni, kumna Jihudimei khou ni, Jentailmei nunc khou ni guloumei tuang gaanhmei dinc ndauh khang theihmei pang khou rui reymei swna ringcthau dat puni twmei e."
24 Mi kumna Paul rui akhangvpui lat sa key pwkhou, "Nang mba the, Paul! Nang thay geic langv lana mba the!" twna Phestas rui kaucna sa the.
25 Paul rui mundawna sa the, "Tikguncdaihmei Phestas! Ai mba mak e. Ai rui sa bammei hei nchumhmei thay nthan thiakna sa bam tuang de. 26 Guangh Agrippa! Nang mi lam guay hei thaypui zaeng rui, ai rouh tuang maekna nang khou sa tuang e. Mi guay tei nang thay de, kalam thu mi tei kakwn kakuaic thangc nkamh mbeihna pat kan tuang hamh e. 27 Guangh Agrippa, nang muhzwng guay ta lwm daih? Nang lwm de twmei ai thay e."
28 "Mi katitna mei dak khou hei, nang ata Khristian sw khang sa kwmlou ni twna cho?" twna Agrippa rui Paul khou sa the.
29 "Kaganv saengc pw, dui pw nang na hamhna aseic alat nking bammei nangniw guay, ai kumh khang Ravguangc khou huayney bam e—kang bangcloumei hei kumcna bangclou khang thu hamh e," twna Paul rui sa daw the.
30 Khoutei guangh, guanghkhyn, Barniki khatni baihmei guay tei ding thau the, 31 kumna kaniw tat pat dat khou, "Mi pu hei theic biuhpui tuang ni, kangkai khou lou biuhpui tuang ni kakhuay maek e," twna kaniw khat khat khou sa the. 32 "Kamei rui Kaisar khou lat phungclou mak bam khwan e thei, kata mpatlou dat nuh tuang di the," twna Agrippa rui Phestas khou sa the.