23
1 Paul rui peimei guay ta zaucna, "Achana thiu! Aseic nganv ai Ravguangc hu khou lungc bammei panty lwnlung khou hei pian bam e," twna sa the. 2 Tingkuh Ananias rui Paul daeng khou ding bammei nunc ta tei, "Kamwang tei dap o!" twna sa the. 3 Khoutei Paul rui, "Ravguangc rui nang ta bai puni, nraengv tey mphwanloumei ngaengsaengc! Riakdanv thei layna latzan sw khang, nang mi khou tei dungc bam tu hamhna, riakdanv twanna, ata bai khang latdanv pat khang di nah cho?" twna mundaw the.
4 "Nang Ravguangc tuang Tingkuh ta thouhsw makna sa tu cho?" twna kadaeng khou ding bammei guay tei rui sa the.
5 "Chana thiu, kamei Tingkuh e twmei ai thay mak e. 'Nangniw tuang dihsinpouc nunc ta sakasic lak nina e,' twna Nthanmei Latrik khou hylouna nai e," twna Paul rui sa the.
6 Mi khou tei bammei nunc tei gaanv saekc rui Sadduki e, baihmei gaanv saekc rui Pharisi e twmei thay lana, Paul rui kaucna sa the, "Chana thiu, ai hei Pharisi e, apu apouc Pharisi e. Theihmei ringcthau datmei ta lwm e twpui zaeng rui, ata mi pei khou hei zay guang tuang e."
7 Mi tei salou pwkhou, Pharisi nunc lev Sadduki nunc tei agay thau the, kumna kaniw kalangv pat the. 8 (Kalam thu Sadduki nunc rui thu theihmei ringcthau dat mak e khatni kauh baanchara ni, bumaengh ni maek e twna sa e; tiki Pharisi nunc rui thu mi guay hei nai e twna lwm e.) 9 Khoutei kauc ranv hay hay thau the, kumna Riakdanv tadin Pharisi nunc dingthauna akhangv ranvna, "Mi pu hei kakhuay maek e! Bumaengh rui ny, kauh baanchara rui ny kakhou salou changh tina de!" twna sa the.
10 Kaniw agaymei tei baanh patna ranv sih thau tii thena, Paul ta thaek puatlou pungh di the twna rihpy daihmei tei ping the. Kumna katuang rihmei nunc tei keyna, Paul ta laana rihmei nunc bamv thangc lou kan tho twna latdanv pat the.
11 Mi nungc zingbangc tei Poubauhmei Paul daeng khou guang dingna, "Ping rio! Nang rui alam khou Jerusalem khou samei hei kumcna, Rom khou ni sa puni," twna sa the.
Paul ta Swluai khang Swmei Raeng
12 Nthuanh thauna laukhwan Jihudimei guay guang kariuna lat kaphianh the, kumna Paul ta swluai mak saanv tu zangv lak e twna kaniw latryan sw the. 13 Mi latryan hei swmei nunc kiu meic riakdei mbu e. 14 Kaniw amuh daihmei nunc khatni gaanvdaih nunc daeng thangc tatna sa the, "Paul ta swluai mak saanv tu zangv lak e twna aniw ntipmei latryan swlou kan the. 15 Paul khou lat thanv nthan khang, kata nangniw daeng khou nduangh key o twna nangniw khatni pei rui Rommei tuang rihpy daihmei khou tei sa tho. Kamei mi khou hei guang tangh mak khou aniw kata swluai khang chamdaanv bam the."
16 Mi raeng hei Paul tanpui rui puanhmei katoupu thay the, kumna kamei Paul daeng thangc tatna poulou the. 17 Khoutei Paul rui rihpy akhat ta kawna, "Mi nggaanvpu ta hei rihpy daihmei daeng khou nduanghlou tio, kamei kakhou lat salou khang nai e," twna sa the. 18 Mi pu tei rui mi nggaanvpu ta tei rihpy daihmei daeng khou tei nduangh guangna sa the, "Kangmei Paul tei rui ata kaw guangna mi nggaanvpu ta hei nang daeng khou nduanghlou o, kamei nang khou lat salou khang nai e twna sa pwna e."
19 Rihpy daihmei tei rui mi pu ta tei kabaanc zayna kabamv akhat khou kaney rana patna, "Nang akhou tabui lat salou niina cho?" twna thanv the. 20 Kamei rui sa the, "Jihudimei pei rui Paul khou lat thanv nthan nii e twpui khe swna kata nthuanh kaniw pei khou zay key khang nang khou sa ni the twna kaniw kapy nunc lungc nchamc kan the. 21 Mi tei kwmlou rio, meic riakdei mbu rui kata nchwan bam puni the. Kata swluai mak saanv tu zangv lak e twna syangdyng sw kan the. Kaniw ntaw chamdaanv bam the, nang rui tabui sa puni cho twmei na nkhwan bam di the."
22 "Mi hei nang akhou poulou kan the twna meic gaanv khat na khou sini raclou nuh mak e," twna rihpy daihmei tei rui kakhou kadylouna, mi nggaanvpu ta tei titat dat kan the.
Paul ta Guanghkhyn Pheliks khou Ndiu Guangmei
23 Rihpy daihmei tei rui katuang rihpy gaanv nei ta kawna sa the, "Aseic zingbangc ganvdak chakiu khou, Kaisarea tat khang rihmei phay nei chamdaanv o. Takuanh ricmei riakchanei khatni buy baeng sinmei ricmei phay nei tat khang sw o. 24 Paul khang ni takuanh chamdaanv o, kumna kata gaekna guanghkhyn Pheliks daeng khou nduangh tangclou o." 25 Kamei rui Pheliks khang tatdyn akhat mi kumna hylou the:
26 "Klaudias Lusias rui kahymdaihmei guanghkhyn Pheliks khou: Kalum e. 27 Mi pu ta hei Jihudimei nunc rui nym lana swluai nina bam khwan the. Kamei hei Rommei dilungmei e twmei thayna, ai rihmei nunc ta nduanghna tat lana kata gulou the. 28 Kaniw rui sw bammei kiu, kamei tabui nkhuailou tina cho twmei thay khang kata kaniw tuang pei khou nduangh key the. 29 Khoutei kakhou theic biuhmei hamh e thei kang lou biuhmei khuay maek e twmei ai thay the. Kaniw rui kata nuh makmei kiu, kaniw tuang Riakdanv lam khou de. 30 Kumna kaniw rui kata swluai khang sw bam the twmei akhou salou thena, kata nang daeng khou ndiu guang tu the. Kata nuh makna sa bammei nunc ta kiu ni kaniw rui karuc khou sa nimei guay nang khou sa tho twna salou kan the."
31 Rihmei nunc tei rui kaniw khou saloumei thei layna, Paul ta mi nungc zingbangc tei Antipatris kaidai nduangh tangclou the. 32 Nthuanh thauna phay ricmei nunc tei thu mi khou tei rui hanc dat kan the, tiki takuanh ricmei nunc rui kata nduangh tat kan the. 33 Kaniw Kaisarea guang tangcna mi tatdyn khatni Paul ta guanghkhyn khou tei nsinlou the. 34 Guanghkhyn tei mi tatdyn tei pac lana, kamei tabui kandic thangc rui cho twna Paul khou thanv the. Kamei Kilikia thangc rui e twmei thay laa khou, 35 "Nang ruc khou lat phungcloumei nunc kiu guang pwkhou rui nang lat nking kho," twna sa the. Khoutei Paul ta "Herod tuang guanghkai" khou louna rigaanv o twna latdanv pat the.