24
Jihudimei rui Paul Khuay Phungcthaumei
1 Zaeng panguh tangv Tingkuh Ananias gaanvdaih gaanv saekc khatni ukil Tertula ta nduanghna Kaisarea khou key the. Kaniw Pheliks hu khou guangna kaniw rui Paul khuay tei sa the. 2 Khoutei Paul ta kaw gut pwkhou, Tertula rui Paul ruc khou sa the:
"Tik hym daihmei Pheliks, ningtyngmei nang rui zayloumei bangc khou aniw chuzaenghna lungc bam e khatni aniw zaat khang gay nimei kage naimei kalaihmei mpeyna ni nang rui phungc guanglou the. 3 Mi ta hei aniw rui kabamv katana khou khatni kaganv katana khou kahaw the, kumna aniw nang ta daicna thuancku the. 4 Ai nang tuang ganv laa geic nii mak e; tiki aniw rui duina sa nimei hei thu nkinglou khang huaycha e. 5 Mi pu hei kandih swkasic karouclou nimei mei akhat e. Kamei hei mbaanv kapwm khou Jihudimei pang khou tatna latlu tipat bammeipu e, khatni Nazareth mei kang tuang kapy daihmei akhat e. 6 Kamei rui Ravkai ta ni sw-mphuam khang sw the. Mi zaeng rui aniw rui kata nym tuang e. (Kata aniw tuang Riakdanv thei layna latzan sw khang aniw sw tuang e; 7 tiki rihpy Lusia guangna, kata namna aniw baanc khou rui asut kan the. 8 Kumna kata nang hu khou phungc guang nina de twna Lusia rui latdanv pat the.)a Nang rui ni kakhou thanv ti thei aniw rui karuc khou sa bammei guay hei kiuc e twmei thay puni de." 9 Mi guay hei kaling de twmei Jihudimei guay tei rui ni sa haplou the.
Paul rui Kalam khou Sa Nthanloumei
10 Guanghkhyn tei rui Paul ta sa tho tw tina, kamei rui sa the:
"Nang mi zaat khou hei tingsaengcna latzanpouc sw guang the twmei ai thayna neihlana ai alam khou sa nthanlou ni the. 11 Nang rui ni thay puni, twmei thu, ai Jerusalem khou kalum khang guangmei zaeng ruhna kanei na di he. 12 Ai Ravkai khou meic gaanv khat na ta sini agi bammei ta kaniw how kan mak e; sinagog khou pwni, kaidai kabamv baih baih khou pwni ai meicnunc ta si khang kathouh kalangh tat bammei ta kaniw how kan mak e. 13 Ntaw kaniw rui aruc khou sa bammei guay tei nsihsingmei kaniw sa ngam ni tu hamh e. 14 Tiki ai rui nang khou sa ndauhmei kiu thu: Kaniw rui nkhuai e twna samei Chaeng twmei khou tatna ai apu apouc Racguangc ta kalum e. Tiki Mousi tuang Riakdanv khou khatni muhzwng nunc tuang latrik khou hyloumei guay tei ai lwm e. 15 Kaniw rui lwmmei kumcna ai ni meicsimei ni meicgaymei ni theihmei khou rui ringcthau dat puni twmei Ravguangc khou lwm muai de. 16 Kumna ai Ravguangc hu khou ni, maansei hu khou ni nkhuai mak khang karamc bam tuang de.
17 "Ai tingkwm mpeyna Jerusalem khou bam makna kapaengc duh thangc tat lana, a zaat nunc khang meicnunc tuang syan dui kaipat phungcna thouhsw khang guang tuang e. 18 Ai sw nimei thouc tei swna pumh nthanmei thouc swluai tang pwkhou, kaniw ata Ravkai khou ariw the. Adaeng khou meic kangdai ni bam mak e; agay agi tuang ni maek e. 19 Tiki Asia thangc rui guangmei Jihudimei gaanv saekc, mi khou tei bam khwan e. Kaniw aruc khou sa khang nai e thei, kaniw nang hu khou guang sa ni tuang de. 20 Ai pei khou guang ding khou tei kaniw akhuay phu pat tuang nai e thei, mi khou bammei kaniw hei rui sa kan diu. 21 'Theihmei ringcthau dat puni twmei lwm e twpui zaeng rui aseic nangniw rui ata latzan sw bam tuang e,' twna ai rui kaniw hu khou dingpui ganv khou kauclou kanmei tei kumcna, baihmei kaniw phu tow kan mak e."
22 Pheliks tei Chaeng lam khou tei thay diangc lana, "Rihpy daihmei Lusias guang pwkhou rui nangniw tuang latzan swlou puni," twna salouna, kaniw ta tipianglou the. 23 Khoutei Paul ta rigaanvna lou o, tiki ramh guayna thingc tiat tiatlou nangh e; kamei nunc rui kasiamruai swlou niimei tuang nai e thei ni sw bam kan diu twna rihpypu khou tei latdanv tiilou the.
Paul Pheliks lev Drusilla khou Lat Rahmei
24 Tingmik asaekc tangv Pheliks kanow Drusilla lev guang the. Kanow hei Jihudimei e. Kamei rui Paul ta kaw guangna Khrista Jisu khou lwmmei lam khou kamei rui rahmei tei nking the. 25 Paul rui ravchaptatmei, meic pumc sinriapmei khatni guang nimei Latzan lam khou rac key pwkhou, Pheliks tei ping the. Kumna, "Nang ntaw thu tat dat tho; akhang kadouchamei nai pwkhou rui kaw dat puni," twna sa the. 26 Mi ganv khou tei Paul rui syan tii pungh e twna kamei lwmgay khwan e. Kumna kamei kata katup sihna kawna lat rac khwan e.
27 Tingkwm kanei tangv, Porkias Phestas rui Pheliks phaan guanghkhyn sw dat the. Pheliks Jihudimei rui kata thuancloumei ta laa nii lapui zaeng rui Paul ta kangkai khou lou duc the.