22
1 "Apu thiu, khatni achana thiu, ai alam khou sa nthanlou nii e; nkinglou o!" 2 Kamei rui Ibri lat rui samei tei kaniw chu lana kaniw rimh rim key the. 3 "Ai Kilikia tuang Tarsas khou rui puanhmei Jihudimei e. Kumna mi Jerusalem khou rui Gamaliel pamv khou rui daic thau tuang e. Ai aniu pupouc nunc tuang Riakdanv ntipna piu khang nchamlou pwna piu guangmeipu e. Ai ni nangniw aseic sw bammei kumcna, Ravguangc khang lunghsucna lunghpui mei e. 4 Mi Chaeng hei tatmei guay ta swluai sw tiatna, ai rui rai kan tuang e. Ai rui ntumei, nggaanvmei khak langh makna nymna kaniw ta kangkai khou lou kan tuang e. 5 Ai sa bammei hei kaling dyng e twmei Tingkuh khatni gaanvdaih nunc pei kapwm thay e. Mi kumhmei nunc ta hei, nymna kangriang ntana, Jerusalem khou zay keyna riap ni twna, Damaskas khou bammei chana nunc khang pei rui hyloumei tatdyn phungcna ai tat khwan e.
6 "Ai tatna Damaskas na guang pwkhou, neih ndyng zaengc khou, tingpuk thangc rui gaanc kangranmei riw aruc khou phian key the. 7 Ai kandih khou kasym key the; khou tei, 'Saul! Saul! Nang tabui swna ata rai bam tu cho?' twna samei khwan ai chu the. 8 'Poubauhmei, nang thow cho?' twna ai rui thanv tikhou, 'Ai hei nang rui rai bammeipu, Nazareth mei Jisu tei the,' twna kamei rui akhou sa the. 9 Athei lay tatmei guay tei gaanhmei riw tei thu how e, tiki akhou sa bammei khwan tei thu kaniw chu mak e. 10 'Poubauhmei, ai tabui sw nina cho?' twna ai rui thanv the. Khoutei Poubauhmei rui akhou, 'Nang thauna Damaskas khou gut tho, kumc e thei, nang ta Ravguangc rui sw o twna tiiloumei tei, mi khou tei dinclou puni the,' twna sa the. 11 Gaanc kangranmei riw tei rui amik how mak khe. Kum tina apam guay rui abaanc zayna Damaskas khou nduangh gut the.
12 "Mi kaidai khou tei, aniu tuang Riakdanv guay piumei khatni mi khou tei bammei Jihudimei guay rui chakhwang sw bammei, kazanc Ananias twna kawmei, ravning nthukmeipu gaanv khat nai khwan e. 13 Kamei guangna adaeng khou dingna, 'Chana Saul, nang mik how dat tho!' twna sa the. Mi dyng khou tei, amik how dat the, kumna kata how the. 14 Kamei rui akhou sa the, 'Aniu pupouc Racguangc rui nang ta kamei ningmei thay khang, katuang ravchaptatmei Bangcpu ta how khang khatni kakhwan kahak rui samei chu khang kapah patlou the. 15 Kalam thu nang rui how kanmei khatni chu kanmei tei meic naina khou rac tat khang e. 16 Kaganv swmaan ri tho, thauna duilup tho, kumna kakhou huayneyna nang paap guay khiu nthan tho,' twna sa the.
17 "Ai Jerusalem khou ngangh datna, Ravkai khou huayney bam khou, ai ndawman akhat how e. 18 Mi khou tei, Poubauhmei ta ai how e, kumna, 'Nang katumcna Jerusalem khou rui tat pat tho, kalam thu nang rui alam khou dinhmei lat tei, mi khou bammei nunc hei rui laalou ni tu hamh e,' twna kamei rui sa the. 19 Khoutei, 'Poubauhmei, ai sinagog guay khou tatna nang khou lwmmei nunc ta nymna rai kan e twmei kaniw thay e. 20 Nang chamv dinhmei Stephen ta swluai khou tei, ai kadaeng khou dingna kata sw luaimei nunc pheybaan nkhwanna, ai ni kazauh the twmei ni kaniw thay e,' twna ai rui sa the. 21 Khoutei, 'Tat tho, ai rui nang ta duh thangc Jentailmei pang khou ndiulou puni the,' twna Poubauhmei rui akhou sa the."
22 Kamei rui mi hei sa mak saanv thu, meicnunc tei kalat nking bam khwan e; mi tangv thu, "Kata swluai o! Kata swluai o! Kamei ringc bam khang biuh mak khe!" twna kaniw kauc ranvna kauc the. 23 Kaniw phey kathanhna khatni kauh thangc mbut nrou thauna kauc bam the. 24 Khoutei Jihudimei nunc rui karuc khou hei di kauc bammei hei tabui sw tina cho twmei thay khang, kata rihmei nunc bamv thangc zay gutna baina thanv o twna rihpy daihmei tei rui kamei nunc khou sa the. 25 Kaniw rui kata bai khang karak tikhou, "Latzan sw makna Rommei dilungmei khat ta bai khang kariak latdanv rui nuh di nah cho?" twna Paul rui kadaeng khou ding bammei rihpypu khou sa the.
26 Rihpypu tei mi tei chu laa khou, rihpy daihmei daeng khou tei guangna, "Mi pu ta hei tabui sw nina cho? Kamei Rommei dilungmei de!" twna sa e.
27 Kumna rihpy daihmei tei, Paul daeng khou guangna, "Nang Rommei dilungmei di nah cho?" twna thanv the.
"Ngguay," twna kamei rui daw the.
28 "Ai ni syan mpeyna tiina mi dilungmei hei laa tuang e," twna rihpy daihmei tei rui sa tikhou, "Ai thu Rommei dilungmei swna puanh tuang de," twna Paul rui sa daw the.
29 Mi khou tei kata lat thanv khang sw bammei nunc tei tat kan the, khatni kamei Rommei dilungmei e twmei thay lana, rihpy daihmei tei kata kangriang rui bangclou kanmei khang tei rui ping the.
Paul Pei Mav khou
30 Rihpy daihmei tei, Jihudimei rui sa bammei hei, Paul kiu tabui nkhuailou tina cho twmei kalingmei thay nii khwan the. Kumna nthuanh thauna, kamei rui Paul tuang kangriang tei ric ganclou the, kumna amuh daihmei nunc khatni baanhza guay ta pei kaw the. Khoutei kamei rui Paul ta nduangh guangna kaniw hu khou tidinglou the.