19
Paul Ephesia khou
1 Apollos Korinth khou bam khou, Paul mi ramv lungc khou tei tat ruan gutna Ephesia khou guang the. 2 Kamei mi khou tei ziap gaanv saekc ta ariw lana, "Nangniw lwm khou tei Bumaengh Nthanmei laatow thah?" twna kaniw khou thanv the.
"Bumaengh Nthanmei nai e twmei sini aniw thay mak e," twna kaniw rui daw the.
3 "Kum e thei, akumhmei tuang duilup nangniw lup lana cho?" twna Paul rui thanv the.
"John tuang duilup tei," twna kaniw rui daw the.
4 Khoutei Paul rui sa the, "John rui duilupmei tei thu lunghlaihmei tuang duilup de, kumna kathei khou guangmeipu ta lwm khang kamei rui Israelmei nunc khou salou khwan e. Mi kiu Jisu ta e."
5 Kaniw mi hei chu pwkhou, kaniw Jisu zanc khou duilup the. 6 Paul rui kaniw ruc khou kabaanc bouclou pwkhou, kaniw khou Bumaengh Nthanmei keylou the. Khoutei kaniw thay makmei lat sana ravmundinc the. 7 Kaniw meic guayna gaanv ruhna kanei dou e.
8 Paul sinagog thangc tatna bw thumh, baucna meicnunc tei lev Ravguangc Guangcdic lam khou kaphianh kariu the, kumna kaniw ta sa kwmlou khang karamc the. s 10 Mi tei tingkwm kanei tat key khwan e, kum tina Asia kandih khou bammei Jihudimei ni Grikmei ni Ravguangc lat chu tow the.
Skiba Nac Mpouh nunc
11 Ravguangc rui kadath datmei charynmei taanv mpeyna Paul ta titaanclou bam khwan e. 12 Kamei rui sinsw bammei pheyzai pwni, phey pwni nnaumei nunc khou laa guang pwkhou, kaniw tuang ravpuatc kuak the khatni kaniw khou rui simei bumaengc nunc tat pat the. 13 Simei bumaengc nunc ta nthau ganhmei taanv ruanna taanc tat bammei Jihudimei gaanv saekc ravsic nthau khang, Poubauhmei Jisu zanc sinsw khang sw the. "Nang tat pat khang, Paul rui dinc bammei Jisu zanc khou ai nangniw khou latdanv tii e," twna kaniw rui ravsic nunc khou sa the. 14 Jihudimei tuang Tingkuh Skeuas nac gaanv chanei rui mi hei kumcna sw tat bam khwan e.
15 Tiki, "Ai Jisu ta thay e, Paul ta ni thay e; nangniw thu thow e twna cho?" twna simei bumaengc tei rui kaniw khou sa the.
16 Simei bumaengc gutmeipu tei rui kaniw ta ngamna anuay the, kumna kaniw pheybaan siat kaek ngamna kabiu kabaengna mi kai khou tei rui paliucna pak kan the. 17 Ephesia khou bammei Jihudimei khatni Grikmei guay mi chamv tei chu pwkhou, pingmei padik the khatni Poubauhmei Jisu zanc hym mbu thau the. 18 Khoutei lwmmei nunc mpeyna guangna kaniw rui taanc bammei tei charuangc khou kalauh the. 19 Duaih sinmei nunc rui kaniw tuang latrik guay phungc guang kaduaina mathiuc mav khou mai ntei the. Kaniw tuang latrik guay manv tei chak pwkhou daandi syanc ching riakngu e. 20 Mi hei kumcna Poubauhmei tuang lat tei zin lik pat the khatni tanc thau the.a
Ephesia khou
21 Mi tangv hei, Makedonia lev Akhaia kandic tat ruanlouna Jerusalem tat khang Bumaengh rui Paul lungc khou tiilou the.b "Mi khou tei ai guanglou lana Rom thangc tat puni," twna kamei rui sa the. 22 Kumna kamei Asia kandih khou bam kanak ni he twna, kata nkhav bammei gaanv nei—Timothi lev Erastas ta Makedonia thangc ndiulou the.
23 Mi ganv khou tei Poubauhmei tuang Chaeng zaeng rui Ephesia khou ranv sihmei katuakcmei pat the. 24 Artemis ravpui tuang ravkai maengc daandi rui kasiamhna lanvguanh bammei kazanc Demetrias twna kawmeipu nai khwan e. Mi tei rui taanv taanhmei nunc khang syan mpeyna ntaanvpui chaeng sw bam khwan e. 25 Kumna kamei rui kabangc khou taanc bammei guay khatni mi ravkai maengc kasiamhmei taanv tei taanc bammei baihmei guay ta ni kaw guang kaduaina sa the, "Meic nunc thiu, mi taanv khou rui aniu lungcgay ntaanv bammei tuang e twmei nangniw thay e. 26 Mi Paul rui sw bammei hei nangniw how the khatni chu the. Baanh rui kasiamhmei rav nunc hei thu rav hamh e twna kamei rui samei khou tei Ephesia khou na hamhna Asia kandih kapwm khou bammei guay kwmlou the. 27 Aniu tuang lanvguanhmei taanv ta hei meicnunc rui sakasicmei na hamhna, Asia khatni mbaanv kapwm khou kalum bammei Artemis ravpui tuang ravkai khatni tikgunc ta meicnunc ning nthuk dat ni tu ramh the."
28 Mi lat hei chu pwkhou, meic kangdai tei lungc puamcna, "Ephesia tuang Artemis hei daihmei e!" twna kauc thau the. 29 Kaidai kapwm tei kachin karo thau the. Meic kangdai tei rui, Paul thei lay tatmei Makedoniamei Gaias lev Aristarkhas ta nymna, chadi chadana thianhbamv khou zay gut the. 30 Meic kangdai hu khou tei Paul ni guang nii khwan e, tiki ziap nunc tei rui tiguang mak khe. 31 Kapam, Asia tuang saengc daihmei gaanv saekc rui ni thianhbamv khou tei guangna kata tihow nangh e twna kakhim guang the. 32 Mi khou tei bammei guay tei kachin karo the: gaanv saekc rui lat khat kauc the, baihmei gaanv saekc rui lat baihmei kauc the. Kalam thu kaniw meic geihmei thu tabui zaeng rui mi khou tei kaniw guang kaduai bam tu cho twmei thay mak e. 33 Jihudimei nunc rui Alekzandar ta hu khou tipat tina, kazaeng rui mi hei sw bam tu khuangh the twna meicnunc gaanv saekc rui laa the. Khoutei rimh rim keylou khang kabaanc rui kabeyna, kazaeng khou rui hamh e twmei sa nthanlou khang sw the. 34 Tiki kamei Jihudimei e twmei thay lana, "Ephesia tuang Artemis hei daihmei e!" twna ganvdak kanei dou kauc the.
35 Nkhamh khou kaidai pei lat hymeipu rui meicnunc ta tei khaem keylou the. Kumna kamei rui sa the, "Ephesasmei thiu le, Ephesia kaidai rui daihmei Artemis tuang ravkai khatni tingkauh thangc rui keymei suangtauc ta gaek bam tuang e twmei meic thay makmei maek khe. 36 Meic gaanv khat na sini kiuc hamh e twna sa dat ngam mak khe. Mi zaeng rui, nangniw nchu keylou o; chadi chadana sw rio. 37 Nangniw rui zay guangmeipu nei hei, ravkai tuang kwam laa mak e, aniu tuang ravpui ta ni sakasic mak e. 38 Demetrias khatni kamei nunc rui thowkumhmei ruc khou lat sa nii e thei, latzankai nai e khatni latzanpouc nunc nai e; mi khou tei phungclou nuh de. 39 Mi khang suangc sini mbuna nangniw kahaw e thei, pei nai e. 40 Aseic sw bammei khou hei, abay adapmei pat e thei aniw ruc khou keylou puni. Mi kum pwkhou, aniw sa daw khang maek puni." 41 Mi hei salou lana kamei rui meicnunc ta tei titat ntamvlou the.