18
Korinthia khou Chamvdinhmei
1 Mi tangv hei, Paul Athen mpatlouna Korinth thangc tat the. 2 Mi khou tei Pontasmei Akuila ta kamei ariw the. Jihudimei guay ta Rom khou rui tat pat khang guanghdaihmei Klaudias rui latdanv pat tina, kamei kanow Priskilla lev Itali thangc rui mi khou tei asaanh makmei hu khou guang bam khwan e. Kamei kaney ta ariw khang tat the. 3 Kumna kaniw pheykai taanhmei nchamc lapui zaeng rui, Paul ni mi khou tei kaney lev bam kariuna taanc nchamc the. 4 Kamei Sabbath pum sinagog khou kariuna Jihudimei ta ni Grikmei ta ni sa kwmlou the. 5 Sila lev Timothi Makedonia thangc rui guang dat pwkhou, Paul katuang ganv kapwm chamv dinhmei khou tii gutlouna, Khrista kiu Jisu hei the twmei Jihudimei khou dinclou the. 6 Kaniw rui kata akhangvna sa kasicna sa tikhou, "Nangniw theic sini nangniw man di the; akhuay maek khe. Ntaw khou rui ai Jentailmei nunc khang dinc tat kan ni the," twna sana kaphey kakhuplou the. 7 Kumna kamei kaniw ta mpatlouna, Tasangmeipu Tita Jastas kai thangc bam tat kan the. Mi pu hei Ravguangc ta kalummeipu e, kumna kakai sinagog daeng khou na nai khwan e. 8 Sinagog tuang kapypu Krispos lev kakai kaikhunc Poubauhmei khou lwmlou the; khatni Korinthmei meic mpeyna ni Paul lat tei chu lana lwm the, kumna duilup the.
9 Zingbangc akhat Paul ndawman akhat how khwan e. Mi khou tei Poubauhmei rui kakhou, "Ping rio, lat hei dinc bam o, nthaekc rio; 10 ai nang ta nduanghlou bam e. Nang ta meic gaanv khat na rui sini swkasic ngam ni tu hamh e; mi kaidai khou hei amei mpeyna nai e." twna sa the. 11 Kumna Paul mi khou tei tingkwm akhat paekri bamlouna meicnunc khou Ravguangc lat dinclou the.
12 Gallio rui Akhaia khou Rommei tuang guanghkhyn swpui ganv khou, Jihudimei nunc guang kariuna Paul ta nym the, kumna latzankai khou zay guang the. 13 "Kariak latdanv rui nuh makmei khou meicnunc ta Ravguangc ta tikalum khang mi pu hei rui sw the!" twna kaniw rui sa the.
14 Paul rui lat sa nina thau pwkhou, Gallio rui Jihudimei nunc khou sa the, "Mi hei nkhuai mbamei, hamh e thei taanvsic taanvrouc taancloupui tuang e thei, nangniw lev kaphianh nuh e. 15 Tiki mi hei thu Jihudimei nangniw tuang lat lam khou, zanh lam khou khatni Riakdanv lam khou tuang dinah, nangniw rana kaphianh tat o. Mi kumhmei lam khou thu ai latzan sw khang hamh e." 16 Kumna kamei rui kaniw ta latzankai khou rui nthau pat the. 17 Khoutei kaniw rui sinagog tuang kapypu Sosthenis ta nymna latzankai kaimav khou tei bai the. Tiki mi ta tei Gallio nchyanlou mak e.
Antiokh khou Guang Datmei
18 Paul lwmmei nunc lev Korinthia khou zaeng mpeyna bamloumei tangv, mi bamv tei mpatlouna Priskilla lev Akuila ta nduanghna rungh tuangcna Suria thangc tat the. Rungh tuangc thau mak khou, Kenkhrea kaidai khou kapy guat the,a kalam thu kamei latryan swlou khwan e. 19 Kaniw Ephesia kaidai guang tangc the. Mi khou tei Priskilla lev Akuila bam duc kan the. Ephesia khou tei Paul sinagog thangc tatna Jihudimei nunc lev pary rac the. 20 Kata bam kanaklou o twna meicnunc tei rui sa the; tiki kamei bamlou mak khe. 21 "Ravguangc rui ningmei e thei, ai guang dat puni," twna kadylou ducna Ephesia khou rui rungh tuangcna tat dat the.
22 Kamei Kaisarea guang tangc pwkhou, Jerusalem thangc tatna phwamlingmei guay ta ariwlouna, Antiokh thangc tat the. 23 Kamei mi khou tei bam kanaklou lana, tat thau datna Galatia khatni Phrugia ramv khou tat ruanlouna lwmmei guay ta sw ntiplou the.
Apollo Ephesia lev Korinthia khou
24 Mi ganv khou tei, Alekzandriamei Jihudimei Apollos twna kawmeipu Ephesia khou guang khwan e. Kamei hei lat sathaymei khatni Nthanmei Latrik thay chuyna thaymeipu khwan e. 25 Kakhou Poubauhmei tuang Chaeng tei dinclou the, kumna kamei lunghgutna Jisu tuang pary kaling dinc the khatni nchamlou the. Tiki kamei John tuang duilupmei na tei thay khwan e. 26 Kamei baucna sinagog khou ni rac tat the. Priskilla lev Akuila kalat tei chu lana kata kaney kai khou nduangh guangna Ravguangc Chaeng lam khou dinc ntwn chuylouna dinclou the. 27 Apollo tei Akhaia thangc tat nii the, kum tina Ephisiamei lwmmei nunc rui kata katiulouna, kata laalou khang Akhaia khou bammei lwmmei nunc khou tatdyn hylou the. Kamei guang tangc lana, Ravguangc zauzian paan rui lwmmei nunc ta tei mpeyna nkhavlou the. 28 Kalam thu Jisu hei Khrista e twmei Nthanmei Latrik khou rui dincna Jihudimei nunc ta charuangc mav khou agi ngamlou the.