20
Makedonia khatni Grik Kandih khou
1 Kumna kachin karo bammei tei nchu keypui tangv, Paul rui ziap guay ta kaw guang kaduai the. Kaniw ta katiuloumei lat salouna kaniw ta ramnavlou the. Kumna kamei Makedonia kandic thangc tat khang tat pat kan the. 2 Kamei rui mi kandic ramv guay khou tei tat ruanna Gaychamv mpeyna dinclouna, meicnunc ta katiulou the. Mi tangv kamei Grik kandih khou guang the. 3 Kumna mi khou tei bw thumh bamlou khwan e. Mi khou tei rui kamei Suria kandic thangc tat khang chamdaanv bam khou, Jihudimei nunc rui kata zauczihna nrik bammei ta thay pat khwan e. Kum tina kamei Makedonia biak thangc ngalanh khang kalung ding the. 4 Kumna Beriamei Pirrihas nac mpouh Sopater, Thessalonikamei Aristarkhas khatni Sekundas, Derbimei Gaias khatni Timothi, khatni Asiamei Tukhikas khatni Trophimas, kaniw rui kata tat nduanghlou the. 5 Mi nunc hei tat huna, aniw ta Troas kaidai khou nkhwan the. 6 Kumna Khay Lou Makpui Ngai tangv aniw Philippi kaidai thangc rungc tuangcna zaeng panguh nungc Troas khou kaniw daeng khou guang the. Mi khou tei aniw zaeng chanei neihlou the.
Paul rui Troa khou Nkhamhmei Ariwloumei
7 Kumna neidak tuang reymei nungc ntyan tu kariu khang aniw guang kaduai khou, Paul rui meicnunc khou lat sa khwan e. Kumna kamei nthuanh thauna kaemc thau dat khang ning lana, kamei rui zipchwng nganv nchamlou khwan e. 8 Kumna aniw guang kaduai bammei karucmei kailangv khou tei maibungc mpeyna daanclou khwan e. 9 Kumna Eutukas kawmei nggaanv nac gaanv khat kailat khou dungc bam khwan e. Paul rui lat sa saengcna sa bam khou tei, Eutukas tei tanguihna nkhamh khou zip ri the. Kumna kamei kailuan kathumhmei thangc rui kandih khou taek key the. Khoutei kaniw rui kata theicna laa thau the. 10 Mi khou tei Paul keyna karuc khou nkhum keyna kata pamcna, "Nangniw katuakc katit bam riu; kamei theih mak e," twna sa the. 11 Kumna Paul karucmei kailuan khou tei ku datna ntyan by bakna tu the. Kumna kamei rui kaniw lev tingsaengcna ting gaanhmei nganv lat saloupui tangv, Paul tat pat kan the. 12 Kumna kaniw rui nggaanv nac ta tei ringcna kakai thangc nduangh tat dat kan the. Kumna taraina makna swmlou the.
Troa khou rui Milita khou
13 Paul kamei phay chaeng tat ni lana aniw ta rungh tuangcna Assos thangc tat hu tho, kumna mi khou tei rui rungh tuangc nchamc dat di kho twna sana aniw rungh tuangcna tat hu the. 14 Kumna kamei aniw ta Assos kaidai khou ariw dat the. Aniw rui kata rungh khou laa gutlouna, aniw Mitulene duipuidic khou guang the. 15 Mi khou tei rui rungh tuangcna aniw nthuanh thauna Khios duipuidic guang tangc the. Nthuanh thauna aniw Samo duipuidic khou khanvlou the. Mi tangv nthuanh thauna aniw Miletas kaidai guang tangc the. 16 Nuhpui kamv Pentikost nungc Jerusalem khou bam namv khang kapiucna tat bam lana, Asia kandih khou kaganv sw chanah mak khang Ephesia khou gutlou lak khe twna Paul ning the.
Paul rui Ephisiamei Gaandaic Guay khou Kadyloumei
17 Kumna Miletas kaidai khou rui Ephesia kaidai thangc mei ndiulouna phwamling gaandaic guay ta kadaeng kaw guang the. 18 Kumna kaniw kadaeng khou guang pwkhou, kamei rui kaniw khou sa the, "Ai Asia khou guang rap nungc tei rui thauna, ai nangniw daeng khou bammei ganv guay khou tei, ai tabui kumhna bam kan tu cho twmei nangniw thay e. 19 Twmeithu, Jihudimei nunc rui ata swkasic khang nrikpui chamraeng mpeyna ndaengna ryanrapui ganv mpeyna akhou guang khwan sini, mpeyna lungc niamhmei khatni mikdui keymei kazauhna ai Poubauhmei siamruai taanv taanc kan e. 20 Nangniw khang kage naimei guay daeklou tuang maekna charuangc khou ni kai kai khou ni nchamlou kanmei tei nangniw thay e. 21 Ravguangc khou lunghlaic guangna aniu Poubauhmei Jisu khou lwm nina e twna Jihudimei khou ni Grikmei khou ni ai dinclou kan the. 22 Kumna ntaw thu zauc lo, Bumaengh Nthanmei rui ndiupui thei layna ai Jerusalem nzwan tat bam tuang e. Mi khou tei ai tabui ariw puni cho thay mak e. 23 Ahu khou Kangkai khatni ryanramei nai bam the twmei thu Bumaengh Nthanmei rui kaidai kathuic khou akhou dincna thay the. 24 Tiki ai theic khang thu kadan tuang maek e. Ai pak nimei pak suaklou e thei khatni Poubauhmei Jisu rui tiiloumei taanv, twmei thu Ravguangc zauzian gaychamv dinhmei taanv hei taanc suaklou e thei kiuc di the.
25 "Kumna zauc lo, nangniw pang khou ai Guanghdic lam dinc ndauhna tat bammei tei ntaw thu nangniw kapwmna azaw how dat ni tu hamh the twmei ai thay e. 26 Mi zaeng rui ai rui aseic nthukna samei nimei thu mi hei e: Thow pwni nangniw pang khou theic nimei nai e thei, mi tei aman hamh the. 27 Kalam thu Ravguangc rui chwnmei kapwm tei ai nangniw khou daeklou tuang maekna dinclou kan the. 28 Poubauhmei rui kazei kahak rui liuloumei Racguangc phwamling ta makuat khang, Bumaengh Nthanmei rui lauziu gaenghmei nunc tiswloumei nangniw khang khatni nangniw khou nsinloumei lauziu pang khang ntak nrakna bam o. Kazei kahak rui liuloumei Ravguangc phwamling ta tei gaengc o. 29 Kalam thu ai tat patmei tangv swsimei angiw nunc nangniw pang khou gut puni the, kumna kaniw rui lauziu pang ta daeklou dat ni tu hamh the twmei ai thay e. 30 Kumna kaniw thei lay khang nangniw pang kahak khou rui ziap nunc ta zay mbiangh khang nchumh makmei lat samei nunc nai thau puni. 31 Mi zaeng rui tingkwm kathumh dak khou tei ai rui zingbangc kalaanv mikdui keyna meic katana ta riapna taek makna nchamlou kanmei tei ningtowna nangniw ntak nrak bam o.
32 "Kumna ntaw ai rui nangniw ta Ravguangc khou khatni kazauzian lat khou nsinlou e. Lat hei rui nangniw ta kasiamh thau khang khatni Ravguangc rui kamei guay khang tiilou nimei suaihiam guay tei tiilou khang e. 33 Ai meic gaanv khat na tuang sini kachaekc, daandi, hamh e thei pheybaan kahaw mak e. 34 Nangniw kahak rui thay e, akhang khatni apam guay khang kage naimei guay mi baanc kanei rui taancna lungc kan tuang de. 35 Ramh lam katana khou ai nangniw khou kathiak nchinlou kan the. Twmei thu mi tei kumcna alinghna taancna, sw thuy lakmei nunc ta nkhavlou nina e. 'Laatowmei suangc tii patmei rui sangaymei e,' twna Poubauhmei Jisu rui samei tei ningtow o."
36 Mi guay hei sa tangna kamei khuksun keyna kaniw kapwmna lev huayney the. 37 Kumna kaniw kapwmna kap ranv sihna kap the. Paul guang pamcna kata kaput kaput the. 38 Kaniw zaengsi dianghmei thu kaniw kazaw how dat ni tu hamh the twna kamei rui saloumei khou tei rui e. Mi tangv kaniw rui kata kamei tat nipui chaeng rungh bamv suanc tangclou the.