15
Jerusalem khou Latdai Kaphianhmei
1 Meic gaanv saekc Judia thangc rui Antiokh khou keyna, "Mousi tuang Riakdanv khou saloumei kumcna nangniw ni gihruamh mak e thei nangniw guloumei laa ngam mak e," twna lwmmei guay khou nchamlou the. 2 Paul lev Barnabas tei mi lam khou hei kaniw lev agi ranvna agi the, kumna Jerusalem thangc keyna Latdiutatmei nunc khatni gaanvdaih nunc ta ariwna mi lam khou hei pary rac o twna Paul, Barnabas khatni meic baihmei gaanv saekc ta ndiulou the.
3 Kaniw ta phwamling rui ndiulou tina, kaniw Phoinikia khatni Samaria tat ruan keyna, Jentailmei nunc Ravguangc khou guangmei pary kaniw khou ni raclou the. Mi chamv tei chu pwkhou lwmmei nunc tei mpeyna neihla the. 4 Kaniw Jerusalem khou key pwkhou, kaniw ta phwamling, Latdiutatmei nunc khatni gaanvdaih nunc rui laalou the, kumna kaney khou rui Ravguangc rui taanv taancloumei guay tei kaniw khou raclou the. 5 Khoutei lwmmei Pharisi nunc dingthauna, "Jentailmei nunc ni gihruamc nina de khatni kaniw ta ni Mousi tuang Riakdanv guay piu khang sa nina de," twna sa the.
6 Latdiutatmei nunc khatni gaanvdaih nunc mi latbamv tei kaphianh khang guang kaduai the. 7 Mpeyna agimei tangv, Pitar dingthauna sa the, "Achana thiu, Jentailmei nunc ni chuna lwm khang kaniw khou Gaychamv dinclou khang thaurey khou rui Ravguangc rui ata nangniw pang khou rui kapahlou the twmei nangniw thay e. 8 Aniu khou tiiloumei kumcna kaniw khou ni Bumaengh Nthanmei tiilou the. Mi tei rui meic katana lungning thaymei Racguangc kamei rui Jentailmei ta ni laalou the twmei lyanlou the. 9 Kamei rui aniu lev kaniw baih mak khe; kaniw lwm tina kaniw paap ni sw-nthanlou the. 10 Kum e thei, aniu pupouc nunc ni, aniu ni phungc tat ngam makmei puat tei ziap nunc nam khou mphunlouna tabui sw khang aniu Ravguangc ta ntanv bam nina cho? 11 Kum nina hamh e! Kaniw ta kumcna aniu ta ni lwm pwkhou, Poubauhmei Jisu tuang zauzian paan rui gulou the."
12 Kaney khou rui Ravguangc rui charynmei khatni sw nchinmei taanv mpeyna Jentailmei pang khou taancloumei tei Barnabas lev Paul rui raclou pwkhou, kaniw meic guayna rimh rim key the. 13 Kaney sa tangv pwkhou, Jakob rui sa the, "Chana thiu, alat nkinglou o! 14 Ravguangc rui Jentailmei nunc ta ni kamei khang kaw patna kaniw ta kamei rui zauclou bam e twmei kamei rui reyna lyanlou the twna Simon rui sa kan the. 15 Muhzwng nunc rui saloumei kiu mi kahak hei the.
"Nthanmei latrik rui sa e:
16 'Thei thangc ai guang dat puni,
kumna bow kanmei David kai tei
zay thaulou dat puni.
Mi tangv kasic kanmei guay tei
duanc thaulou dat puni,
kumna mi kai tei sw thaulou dat puni.
17 Mi khou kiu meic baihmei guay,
amei khang kawloumei Jentailmei guay Poubauhmei ta phu puni,
18 twna reydouc rui mi lam guay hei
tithay guangmei Poubauhmei rui sa e.'
19 "Mi zaeng rui, atuang latzan thu: Ravguangc khou guangmei Jentailmei nunc ta hei aniu sw katuakc dat bam lak nina the. 20 Kumna ravmaengc khang khaengmei tuang mphuammei zanc tu mak khang, ntu nggaanv lungcmaanv lungcmowmei taanv taanh mak khang, gayluaimei zanc khatni zei tu mak khang kaniw khang hyna tii di kho. 21 Kalam thu Mousi tuang Riakdanv hei Sabbath pum kaniw tuang sinagog khou, reynungc rui pac guang tuang di the, kumna katuang lat guay hei kaidai kathuic khou dinclou kan tuang di the."
Lwmmei Jentailmei guay khou Hymei Tatdyn
22 Khoutei Latdiutatmei nunc khatni gaanvdaih nunc tei phwamlingmei guay lev kariu lana kaniw pang khou rui meic gaanv saekc kapah pat the, kumna Paul lev Barnabas thei Antiokh thangc ndiulou khang dinglou the. Kaniw rui chana pang khou rui kapy gaanv nei—Barsabbas kawmei Judas khatni Sila ta kapah patna, 23 mi tatdyn hei kaney ta tiphungc tat the:
"Latdiutatmei nunc khatni gaanvdaih nunc, nangniw chana nunc aniw rui Antiokh, Suria khatni Kilikia khou bammei Jentailmei chana guay ta kalum e. 24 Aniw pang khou rui meic gaanv saekc patna kaniw lat rui nangniw ta sw katuakclou the khatni nangniw lungning tikabiulou the twmei aniw chu the. Kaniw ta mi tei sa tat o twna aniw ndiu mak e. 25 Kumna aniw guang kariuna nangniw khou meic ndiulou khang nggamcna kapahlou the. 26 Aniu Poubauhmei Jisu Khrista tuang taanv khang theic suh khang ping makmei, nzianmei Barnabas lev Paul thei ndiulou khang kaphianhlou the. 27 Kumna aniw rui Judas lev Sila ta ndiulou kan the. Kumna aniw rui hyloumei kahak hei kaney rui ni nangniw khou raclou puni the. 28 Mi sw mak nuh makmei mung asaekc na hei hamhna nangniw khou baihmei puatcrith mphunlou makmei gay e twmei Bumaengh Nthanmei ni, aniw ni chwnmei the. 29 Mi kiu thu: ravmaengc khou khaengloumei puat tu rio; zei tu rio; gayluaimei zanc tu rio; khatni lungcmaanv lungcmowmei taanv taanh rio. Mi guay hei nangniw piu e thei, nangniw nthuih the. Dwangay kady e."
30 Kaniw ta ndiulou tina kaniw Antiokh khou key the, kumna lwmmei guay ta kaw kaduaina mi tatdyn tei tiilou the. 31 Mi tei pac pwkhou, kaniw ta katiuloumei lat khou tei meicnunc neihlamei padik the. 32 Judas khatni Sila chana nunc khou tingsaengc sihna lat salouna katiulou the khatni kaniw ta titanclou the. Kaney hei muhzwng nei khwan e. 33 Mi khou tei bam kanakloumei tangv, lwmmei guay rui kaney ta chuzaenghna suanc patlou tina, kaney ta ndiuloumei nunc daeng thangc ngalanc guang dat kan the. 34 Tiki Sila thu mi khou tei bam kan ni the twna bam kan the.a
35 Paul lev Barnabas tei Antiokh khou bam kanaklouna, kaney khatni meic baihmei mpeyna ni kazauhna kaniw rui Poubauhmei lat nchamlou the khatni dinclou the.
Paul lev Barnabas Ntamvmei
36 Kanakmei tangv, "Anei Poubauhmei lat dinclou kanmei kadai guay khou tei tatlou datna chana guay tei akumh bam tu cho zauclou dat kho," twna Paul rui Barnabas khou sa the. 37 Barnabas rui John Mark ta kaney thei nduangh tat nii khwan e; 38 tiki kaniw chaenglwan tat suak makna Pamphulia khou rui ngalanc dat kanmei kata nduangh tat makmei gay de twna Paul rui thu ning the. 39 Kaney mi lam khou agi ranv sihna agi the, kumna kaney ntamv the. Barnabas Mark ta nduanghna rungh tuangcna Kupras thangc tat kan the. 40 Paul ni Sila ta nduanghna, chana guay rui kaney ta Poubauhmei zauzian khou tiilouna tat kan the. 41 Kamei Suria khatni Kilikia tat ruanna phwamling guay ta titanclou the.