14
Ikonium khou
1 Ikonium khou ni Paul lev Barnabas sinagog khou tatna pary racloumei ganv khou, Jihudimei khatni Grikmei meic mpeyna lwm the. 2 Tiki lwmlou makmei Jihudimei nunc rui Jentailmei nunc ta kathuatc thaulouna lwmmei nunc ta tizauczihlou the. 3 Kaney mi khou tei bam saengc sihlouna, baucna Poubauhmei lam khou dinclou the, kumna Poubauhmei rui kaney khou charynmei khatni sw nchinmei taanv taanh khang pumtan tiilouna kaney rui katuang zauzian lam khou dinc bammei tei kalingmei e twmei lyanlou the. 4 Mi kaidai mei nunc tei kalangv kanei patna, gaanv saekc rui Jihudimei biak, khatni gaanv saekc rui Latdiutatmei nunc biak liangc the.
5 Khoutei Jentailmei nunc khatni Jihudimei nunc, kaniw tuang kapy nunc lev lungc chamcna, Latdiutatmei nei ta tei swkasic khang khatni ntauh kwam khang dinglou the. 6 Mi tei Latdiutatmei nei tei thay lana, Lukaunia ramv tuang Lustra khatni Derbi khatni mi daeng namei bamv guay thangc tat the. 7 Mi bamv khou tei kaney Gaychamv dinclou the.
Lustra khatni Derbi khou
8 Kapui bungpuak khou rui katan chuanchayna puanhmei, kapanty khou tat zat makmeipu Lustra khou nai khwan e. 9 Kamei ni Paul lat tei nking bam khwan e. Paul rui kata zauc pwkhou, tigaylou puni twmei lwmmei nai the twmei how lana kata zaucna, 10 "Ding thau tho," twna kauc ranvna sa the. Mi pu tei kachaekc thauna tat thau the. 11 Paul rui taancloumei tei how lana, meic kangdai tei Lukauniamei lat rui, "Rav nei tei maansei swna key the!" twna kauc the. 12 Kumna kaniw rui Barnabas ta Dia the khatni Paul ta, kamei lat samei khou kapy sw tina Hermes the twna sa the. 13 Dia rav tuang ravkai mi kaidai paengc khou na tei nai khwan e. Kumna mi tuang amuc khatni meicnunc tei rui Latdiutatmei nei khang tei khaenglou ni the twna guaichic nunc khatni mwntuc raenghmun daeng khou tei laa guang the.
14 Mi kumna kaniw rui sw bammei tei chu lana, latdiutatmei Barnabas lev Paul kaney phey siatna, meic kangdai laa khou pak gutna kaucna sa the, 15 "Meic nunc thiu, tabui swna nangniw mi kumna sw bam tu cho? Aney ni nangniw kumhmei maansei de. Aney guangmei thu mi kumhmei nsa ravmaengc khou rui tingpuk, kandih, duipui khatni mi guay khou naimei guay damcloumeipu ringhmei Racguangc khou ngalanc guang khang Gaychamv dinclou khang de. 16 Tat kanmei ganv khou tei thu zaatc nunc ta kaniw rui ningmei thei layna tat khang kamei rui nuhlou khwan e. 17 Tiki kamei rui gaytaanv taanclouna kamei thow cho twmei lyanlou e—kamei rui nangniw khang tingpuk thangc rui ting tiilou e, kumna nap bi kakwm kaganv khou tiilou e. Kamei rui nangniw khang taektw tiilouna nangniw lungc tineihlalou e."
18 Mi lat hei sana Latdiutatmei nei tei kaniw ta mi kumna khaengna kalum mak khang ranv sihna khaem keylou the.
19 Pisidia tuang Antiokh khatni Ikonium khou rui guangmei Jihudimei nunc rui meic kangdai ta tei kaniw biak thangc zay lana, Paul ta ntauh kwamna, theic the twna kaidai paengc thangc zay patlou the. 20 Tiki lwmmei nunc tei kadaeng khou guang kaduai bam dat pwkhou, kamei thau datna kaidai khou tei gut dat the. Nthuanh thau datna kamei Barnabas lev Derbi thangc tat the.
Asia tuang Antiokh khou Guang Datmei
21 Paul lev Barnabas Derbi khou Gaychamv dinclouna ziap mpeyna kasiamhlou the. Mi khou tei rui Lustra, Ikonium khatni Pisidia tuang Antiokh khou guanglou dat the. 22 Kaney rui ziap nunc ta tei lwmmei khou titanclou the khatni lwmmei khou ntipna bam khang katiulou the. "Ryanramei azuh tat ruanna aniu Ravguangc Guangcdic gut nina e," twna kaney rui katiulou the. 23 Phwamling kathuic khou gaanvdaih nunc kapahlouna, munthiangcna huayneyna kaniw ta kaniw lwmmei Poubauhmei khou nsinlou the.
24 Pisidia ramv tat ruan keyna, kaney Pamphulia ramv khou guang dat the. 25 Mi khou tei kaney Perga khou chamv dinclou the, kumna Attalia thangc tat the. 26 Mi khou tei rui kaney, ntaw kaney taanc suakna guangmei taanv dwan khang hei Ravguangc zauzian khou kaney ta tiiloumei bamv Antiokh khou rungh tuangcna guang dat the.