13
Barnabas lev Saul ta Ndiu Patmei
1 Antiokh tuang phwamling khou muhzwng nunc khatni tadin nunc: Barnabas, Nigera twna kawmei Simeon, Kurenimei Lukias, dihlangv akhat sinmei Herodb rui makuat thaumei Manaen, khatni Saul, mi nunc hei bamv khwan e. 2 Kaniw munthiangcna Ravguangc ta kalum bam khou, "Kaney ta ai rui kawloumei taanv taanh khang, Barnabas lev Saul ta akhang reic patlou tho," twna Bumaengh Nthanmei rui kaniw khou sa the.
3 Kumna kaniw munthiangcna huayneyna kaney ruc khou kaniw baanc bouclouna kaney ta ndiu pat the.
Kupra khou
4 Bumaengh Nthanmei rui ndiulouna Barnabas lev Saul tei Selukia kaidai khou key the, kumna mi khou tei rui rungh tuangcna Kupras kandic thangc tat the. 5 Kaney Salamis kaidai khou guangna sinagog guay khou Ravguangc lat dinclou the. Kaney baanri khang John Mark ta nduangh tat khwan e.
6 Kaniw mi kandic saanv saengh tei tat suak keyna Paphos kaidai khou guang the. Mi khou tei, guatmei muczwng Jihudimei, duaihmei, kazanc Bar-Jisu twmeipu ta ariw the. 7 Kamei hei mi kandic tuang dihlangv sinmeipu, ntakmei Sergias Poula kawmeipu pam e. Dihlangv sinmeipu tei Ravguangc lat nking nii lana Barnabas lev Saul ta kadaeng khou kaw guang the. 8 Tiki duaihmei Elumas (Grik lat khou kazanc mi kumna kaw e) tei rui mi pu ta tei tilwm kan mak khang swna kaney ta akhangv the. 9 Khoutei Saul, Paul twna ni kawmeipu tei Bumaengh Nthanmei rui padikna, mi pu ta tei zauc adyangna, 10 sa the, "Ravsic nac mpouh nang! Nchumhmei ta zauczihmei nang! Nang khou simei rouc rui padik e, khatni Poubauhmei tuang ntyngmei chaeng ta nkhuaimei tiswlou khang karamc e! 11 Ntaw nang ruc khou Poubauhmei taanv taanclou puni the—nang mik tiat puni the, kumna gaanhmei riw how mak kanak puni the."
Mi dyng khou tei Eluma mik khou tei muangh guam kumc, zingc guang the, kumna kata meic rui zaylou khang kamana phu thau the. 12 Guanghkhyn tei mi pat bammei lwn tei how pwkhou lwm the; kalam thu Poubauhmei lam khou nchamloumei tei kakhang ngak the.
Pisidia Kandic tuang Antiokh Kaidai khou
13 Paul kapam nei lev rungh tuangcna Paphos khou rui Pamphulia tuang kaidai Perga khou guang the. Mi khou tei rui John Mark, kaney ta mpatlouna Jerusalem thangc ngalanc dat kan the. 14 Kaney Perga khou rui tat thau datna, Pisidia tuang Antiokh kaidai khou guang the. Mi khou tei Sabbath kanei sinagog khou guang dungc bam khwan e. 15 Mousi tuang Riakdanv khatni muhzwng nunc tuang latrik khou rui pac tangv lana, sinagog tuang kapy nunc rui, "Chana nei le, nang ney rui meicnunc khou hei katiulou nimei tuang nai e thei salou o," twna meic ndiulouna guang sa the. 16 Khoutei Paul dingthauna kabaanc haina sa thau the: "Israelmei khatni Ravguangc ta pingmei Jentailmei nangniw meic guayna nkinglou o! 17 Aniu pupouc nunc kaniw Ijipt khou gin swna lungc bammei douc, Israelmei Racguangc rui aniu pupouc nunc ta kapahna kaniw ta zaatc daihmei akhat tiswlou the. Ravguangc rui kaniw ta kapumtan paan rui Ijipt khou rui nduangh patlou the. 18 Kumna tingkwm riakdei tazikramv khou kaniw ruc khou khaengvlou khwan e.c 19 Kamei rui Kanaan kandih khou zaatc chanei ta tiswmaan lana, mi kandic tei kaniw khang tiilou khwan e. 20 Mi tei tingkwm phay padeih riakngu dou gut khwan e.d
"Mi tangv muhzwng Samuel ganv nganv kaniw khang latzanpouc nunc tiilou khwan e. 21 Kaniw rui guangh ney tipui ganv khou, Ravguangc rui kaniw khang Benjamin kaikhwangmei Kish nac mpouh Saul ta tingkwm riakdei guang sw khang tiilou khwan e. 22 Kata laa ganc datmei tangv, Ravguangc rui David ta kaniw guangc tiswlou dat khwan e. Ravguangc rui kalam khou mi kumcna salou e: 'Jessi nac mpouh David hei alungkwnpui mei e, kamei hei ai rui kahawmei taanv nipui mei e!' 23 Ravguangc, kamei rui nrianhloumei kumcna, kamei rui Israelmei ta guloumeipu tiiloumei kiu mi David kikta Jisu hei the. 24 Kaniw paap khou rui lunghlaicna duilup nina e twna, Jisu kataanv taanc thau makmei hu khou John rui Israelmei guay khou dinc khwan e. 25 John tei katuang taanv luai guang ni khou, kamei rui meicnunc khou, 'Ai hei thow e twna nangniw ning tu cho? Ai hei thu nangniw nkhwan bammei tei hamh e. Kamei athei khou guang the; ai hei thu katuang phaythuapc luak patlou khang na sini biuhpui mei hamh e,' twna salou e.
26 "Achana thiu, Abraham anac thiu khatni Ravguangc ta pingmei Jentailmei thiu, guloumei chamv hei aniw khou tii guangmei tuang e! 27 Tiki Jerusalem khou lungc bammei nunc khatni kaniw tuang kapy nunc tei kamei hei Guloumeipu the twmei khatni Sabbath pum kaniw pac bammei muhzwng nunc lat tei kabah thay lamc makna, kata nkhuaimei tiswlouna, muhzwng nunc lat tiguang tangclou kan the. 28 Kata swluai nuhmei khuay kakhou nkhamlou khang kaniw phu tow mak khwan sini, kata swluai khang kaniw rui Pilat khou sa the. 29 Kalam khou nthanmei latrik khou saloumei guay tei kaniw rui tiguang nthuihlou lana, kata theihchouc khou rui laa keyna tarou khou mbeihlou the. 30 Tiki Ravguangc rui kata tiringcthaulou datmei tangv, 31 tingmik mpeyna bamlouna, kamei lev Galili khou rui Jerusalem khou ngangh nchamcmei nunc khou kata lyanlou khwan e. Ntaw mi nunc hei rui kalam khou dinc bam tuang e. 32 Aniw rui nangniw khou gaychamv dincloupui tuang e: Ravguangc kamei rui aniu pupouc nunc khou nrianhloumei tei, 33 Jisu ta tiringcthauloumei hei rui, kaniw nac nunc aniu khou tiguang tangclou the. Kaneimei Kalumlu khou:
'Nang hei anac mpouh e;
aseic hei ai rui nang puanclou the,'
twna hyloumei tei tiguang tangclou the.
34 "Kata tarou khou titaemclou lak e, kata tiringcthaulou dat puni twmei lam khou mi kumna Ravguangc rui sa e:
'Ai rui David khou nrianhloumei,
nthanmei khatni suai dat lakmei suaihiam guay tei,
ai rui nangniw khang tii puni.'
35 "Kumna Kalumlu kabamv baihmei akhat khou ni,
'Nang rui nang tuang nthanmeipu ta
tarou khou titaemc maanlou lak e,'
twna hylouna nai e. 36 David tei Ravguangc rui kakhang tiiloumei taanv ringh saanv taanclou lana theic kan the, kapu kapouc nunc ta mbeihloumei bamv khou mbeihlou kan the, kumna kapumc tei taemc maan kan the. 37 Tiki Ravguangc rui tiringcthaulou kanmeipu tei thu taemc maan kan mak e.
38 "Mi zaeng rui, chana thiu, Jisu paan rui paapc kuakloumei chamv hei, aniw nangniw khou dinc bam tuang e twmei nangniw thaylou o. 39 Mousi tuang Riakdanv rui nangniw ta paapc khou rui sw-nthanlou ngam makmei khou tei rui lwmmei kathuic ta kapaan rui paapc khou rui sw nthanlou the. 40 Muhzwng nunc rui mi kumcna saloumei hei nangniw khoue guanglou mak khang ramhthay o:
41 'He, nangniw sinnui sinnumei thiu!
Nangniw ngak tho, kumna mut tho!
Kalam thu ai aseic taancloumei hei,
thowkumhmei rui dinclou bam tisini
nangniw lwm mak puni the!' "
42 Paul lev Barnabas sinagog khou tei rui tat dat kan nina bam khou, kaney guang datmei Sabbath neic ni guang datna mi lam khou tei raclou dat o twna meicnunc rui huaycha the. 43 Sinagog khou tei rui piang pat dat pwkhou, Jihudimei khatni Jihudi ravriak ningmei Jentailmei meic mpeyna Paul lev Barnabas thei lay the. Apostal nei tei rui kaniw ta Ravguangc zauzian khou bam tanh tan bam o twna dinclou the khatni katiulou the.
44 Guang datmei Sabbath neic, mi kaidai mei kapwm duak Poubauhmei lat nking khang guang the. 45 Jihudimei nunc tei mi meic kangdai ta tei how lana mamavmei rui padik the, kumna Paul lat ta tei nsic the, kumna kata sw zak khang sw the. 46 Tiki Paul lev Barnabas tei bauc ranv thauna sa the, "Ravguangc lat hei nangniw khou salou rey khang kage naipui zaeng rui salou tuang e; tiki nangniw mi hei laalou makpui zaeng rui khatni nangniw rana nangniw ta ringcsuangmei laa nimei nunc e twna ning makpui zaeng rui, nangniw ta ganclouna Jentailmei nunc thangc tat dat kan ni the. 47 Kalam thu,
'Ai rui nang ta Jentailmei nunc khang
gaanhmei tiswlou the,
mi hei nang paan rui mbaanv kapwm ta gulou khang e.'
twna Ravguangc rui kadylou lou the."
48 Mi hei chu pwkhou Jentailmei nunc tei neihla the khatni Ravguangc lat ta tei thuanc the, kumna ringcsuangmei laa khang kapahloumei nunc lwm the.
49 Mi ramv khou tei kabamv katana khou Ravguangc lat zin lik pat kan the. 50 Tiki Jihudimei nunc rui mi kaidai tuang meicdaihmei nunc khatni lungcgaymei ravning nthukmeipui nunc ta kathuatc thaulou the. Kaniw rui Paul lev Barnabas ta tisw kasic khang sw thau the, kumna mi ramv khou tei rui nthau ganc the. 51 Kumna kaney phay tuang mbut kaniw khang kadiw keylouna Ikonium thangc tat kan the. 52 Ziap guay tei neihlamei khatni Bumaengh Nthanmei rui padik the.