16
Timothi Paul lev Sila Thei Lay Tatmei
1 Paul Derbi khou rui Lustra khou guang the. Mi khou tei ziap gaanv khat kazanc Timothi twna kawmeipu nai khwan e. Kapui hei lwmmei Jihudimei e, kumna kapu thu Grikmei e. 2 Kamei hei Lustra khatni Ikonium khou bammei lwmmei guay rui sa chuyna bammeipu e. 3 Paul rui Timothi ta nduangh tat nii lana gihruamc the. Mi bamv guay khou tei bammei Jihudimei nunc rui kapu hei Grikmei e twmei thay tina mi hei swpui tuang e. 4 Kaniw kaidai guay khou tatlouna, Jerusalem khou bammei Latdiutatmei nunc khatni gaanvdaih nunc rui dinglou kanmei riak tei kaniw khou dinclou the, kumna mi guay tei piu khang dinclou the. 5 Kumna phwamling guay ta tei lwmmei khou titanclou the, kumna tingmik kathuic lwmmei mei sing mbu thau the.
Troa khou Paul Ndawman Howmei
6 Kaniw ta Asia kandih khou Gaychamv dinh khang Bumaengh Nthanmei rui nuhlou ti makna, kaniw Phrugia lev Galatia ramv tat ruan pat the. 7 Kaniw Musia ramv tangc pwkhou, Bithunia kandic thangc tat khang karamc the; tiki mi tei Jisu tuang Bumaengc rui nuhlou mak khe. 8 Kum tina kaniw Musia tat kaan keyna, a Troas key the. 9 Mi nungc zingbangc tei Paul ndawman akhat how khwan e. Mi khou tei Makedoniamei gaanv khat dingna, "Makedonia khou guangna aniw ta nkhavlou o!" twna huaycha khwan e. 10 Mi ndawman tei how pwkhou, aniw katumcna Makedonia thangc tat khang sw the; kalam thu mi khou bammei nunc khou tei Gaychamv dinclou khang Ravguangc rui aniw ta kaw the twna aniw laa the.
Philippia khou: Ludia Lunghlaic Guangmei
11 Aniw Troas khou rui rungh tuangcna, nzut phutna Samothraki duipuidic khou guang the, kumna nthuanh thauna Neapolis kaidai tangc the. 12 Mi khou tei rui aniw Philippi kaidai khou guang the. Mi hei Makedonia kandic tuang kaidai daihmei b akhat e. Mi hei Rommei nunc bampui bamv akhat ni e. Aniw mi khou tei tingmik mpeyna bamlou e. 13 Sabbath neic, raenghkat paengc thangc duibaek daeng khou, Jihudimei nunc huayneypui bamv nai khuangh e twna ningpui bamv khou aniw pat the. Aniw dungc keyna, mi khou tei guang kaduai bammei ntumei nunc khou pary raclou the. 14 Aniw pary nkingmei nunc pang khou Thuatira kaidai khou rui guangmei, Ludia twna kawmei, haengc nrymmei phey zuanhmei gaanv khat bam khwan e. Mi pui hei Ravguangc ta kalummeipui e, kumna Paul rui samei tei lunghgutna nking khang Poubauhmei rui kalungning laanclou the. 15 Kamei khatni kakai kaikhuncmei guay duilup tangv pwkhou, "Ai hei Poubauhmei khou lwm changhmei mei di the twna nangniw rui laalou e thei, akai khou guang bangvlou o," twna aniw ta kaw the. Kumna aniw tat the.
Philippia tuang Kangkai khou
16 Zaeng neih khat aniw huayneypui bamv thangc tat khang tat bam khou, kakhou ravsic gutna mi tei rui guang nimei ta dinc kasuakc bammei banghpui gaanv khat aniw ta ariw the. Kamei rui guang nimei ta khanlouna kakaipouc nunc khang syan mpeyna ntaanvpui chaeng sw bam khwan e. 17 Kamei Paul lev aniw thei khou tatna, "Mi pu nunc hei Kauh Liangmei Racguangc bangc nunc e! Kaniw hei nangniw khou guloumei chaeng dinclou bammei nunc e," twna kauc the. 18 Kamei mi hei kumcna tingmik mpeyna sw guang tikhou, nkhamh khou thu Paul kaningsumcna thei karih patna, "Mi pui khou rui tat pat khang ai rui nang khou Jisu Khrista zanc khou latdanv tii the!" twna mi pui khou bammei bumaengc khou tei sa the. Mi dyng khou tei mi bumaengc tei tat pat kan the.
19 Mi pui tuang kaipouc nunc tei kaniw syan ntaanvpui chaeng maan the twmei how laa khou, kaniw rui Paul lev Sila ta nymna sanghbamv khou baanhza nunc hu khou zay guang the. 20 Kaniw rui kaney ta Rommei ngamvsinmei nunc hu khou zay guangna sa the, "Mi pu nei hei Jihudimei e, kaney rui aniw kaidai khou guangna mpeyna sw katuakclou the. 21 Aniw riak nuh makmei riak kaney rui dinc the. Aniw thu Rommei mei de; mi riak guay tei aniw laa nuh mak e khatni tat nuh mak e." 22 Kumna meic kangdai guang kariuna, Paul lev Sila ta swkasic khang sw the. Khoutei Paul lev Sila ta tei kaney tuang pheybaan siat kaekna bai khang ngamvsinmei nunc tei rui latdanv pat the. 23 Bai kasiclou lana kangkai khou lou the, kumna so taan ntipna taanlou khang kangkai sinmeipu khou latdanv tiilou the. 24 Mi latdanv thei tei layna kangkai sinmeipu tei rui kaney ta kalungcmei kangkai khou gutlouna kaney phay khou kang lou the.
25 Zipchwng zaengc khou Paul lev Sila tei Ravguangc khou huayneyna lu suan bam khwan e, kumna baihmei kangmei guay tei kaney lu nking bam khwan e. 26 Thay mak liang khou baengla zay ranvna zay guang the. Mi tei rui kangkai kaibam tei kanuk the. Khoutei kaikhamv guay laanc pat the. Kumna kangmei nunc tuang kangriang guay kathyng key the. 27 Khoutei kangkai sinmeipu tei rak pat the, kumna kangkai kaikhamv guay laanclou bammei ta how lana, kangmei guay tei pak tat ngam kan di the twna ning the. Kumna kamei katuang baengsaeng sat patna karana kata swluai khang sw thau the. 28 Khoutei, "Nang rana nang ta swluai rio! Aniw mi khou hei bamv ngam de!" twna Paul rui kauc ranvna kauc the.
29 Kangkai sinmeipu tei mairam neyna, pak gut the, kumna ping kadunhna Paul lev Sila hu khou pun nkhum laemv key the. 30 Khoutei kamei rui kaney ta nduangh patna, "Kaipouc nei le, ata gulou khang ai tabui sw nina cho?" twna sa the.
31 "Poubauhmei Jisu khou lwm o, kumc e thei nang ta ni, nang kai kaikhuncmei ta ni gulou puni," twna kaney rui daw the. 32 Khoutei kaney rui kakhou khatni kakai khou bammei guay khou Poubauhmei lam khou dinclou the. 33 Mi dyng khou tei kangkai sinmeipu tei rui kaney ta nduangh tatna, kaney tuang zam zei guay khiulou the. Kumna kadyng khou kamei khatni kakai kaikhuncmei guay tei duilup the. 34 Khoutei kamei rui Paul khatni Sila ta kakai khou nduangh kuna titu tizangvlou the. Kamei khatni kakai kaikhuncmei guay tei neihlamei padik the, kalam thu kaniw Ravguangc khou lwm the.
35 Nthuanh thauna, laukhwan Rommei ngamvsinmei nunc tei rui, "Mi pu nei ta tei mpatlou dat ti tho," twna kangkai rigaanvpy nunc ta ndiu guang the.
36 Kumna kangkai sinmeipu tei rui Paul khou, "Sila nang ney ta mpatlou dat ti tho twna ngamvsinmei nunc rui sa guang the. Kumna nang ney patna chuzaenghna tat tho tho," twna sa the.
37 Tiki Paul rui rigaanvpy nunc khou tei, "Aney khuay maek e, tabui swna aney ta kaniw rui charuangc khou tibai tu cho? Aney Rommei dilungmei de! Kum lana kaniw rui aney ta kangkai khou lou the. Ntaw kaniw aney ta nkamhna ndiu ganc dat ni twna cho? Nuh mak e! Kaniw kahak guangna aney ta laa pat dat kan diu," twna sa the.
38 Rigaanvpy nunc tei rui mi lat hei ngamvsinmei nunc khou tei guang dinclou the. Kaney tei Rommei dilungmei de twmei thay pwkhou kaniw ping the. 39 Khoutei kaniw guangna kuaklou khang sa the, kumna kaney ta kangkai khou tei rui nduangh patna, mi kaidai khou tei rui tat patlou dat khang huaycha the. 40 Paul lev Sila kangkai khou rui patna, Ludia kai thangc tat the; kaney chana nunc ta ariwna, kaniw ta katiulouna tat dat the.