Nabi-nabi pade guru-guru to moma nakono
2
1 Owi, nariaramo nabi to moma nakono neumba i lentongo todea Alatala. Wee moto mui tempo ei, mariara mei guru-guru to moma nakono meumba i lentongomi moparata bongo patudu to moma nakono to mampahalatara peparahaya tauna, pade mampehapuka Pue Yesus to nampatolohira. Bagora ee mei mampakahilaka wotora moto, apa dungku Napakaropura Alatala. 2 Madea mei tauna mantuku kabiahaara to wule nantuku dota rarara to nadaa. Habana bagora guru to moma nakono ee mai, dala kahalamaa to nakono rapopore tauna. 3 Keni pampomaihira doi, guru-guru to moma nakono ee mei mampakadoyo komi hante tutura to laitampara moto bona raratara kauntua. Naupawee nahaemi laipahadia pehuku hi hira, pade karopura moma'i mamala rataha.4 Bo hira malaeka Alatala to nobabei doha laihuku Alatala, pade laitadi-Nara i rara naraka, laipatuhu i rara lowu to nalimau duuna marata tempo eo pobotuhia. 5 Wee mui owi, dunia bo tauna to nadaa ingkura laipakaropu Alatala hante ue mowo to nampakatala dunia. Nuh hante papitu tau ntanina aga to laipakahalama-Na, apa Nuh nopatudu nangkambelai bewa matuwu manoro i tingoo Alatala. 6 Wee moto mui Sodom pade Gomora laipapuhi Alatala duuna nawali awu, bona mawali pepaingai nangkambelai napa to madupa hi tauna to nadaa ingkura. 7 Naupawee, Lot laipakahalama-Na, apa nanoro ingkuna. Naheha mpuu iepena butu eona nampahilo ingkura to Sodom bo Gomora to moma noada, to wule nantuku dota rarara to nadaa. 8 Lot ee natuwu dohera tauna to nadaa ingkura. Butu eona'i nampahilo bo nangepe ingkura to moma noada. Etu pade halaku tauna to nanoro ingkuna naheha mpuu iepena. 9 Aji, laincani-Na mpuu Pue mampakahalama tauna to nanturuhi dota-Na ane rapehorira. Ncani-Na mui mampatarungkura tauna to nadaa ingkura bona rapakahehara tempo eo pobotuhia.
10 Melabi mpuupi kantomo pohukura tauna to natuwu nantuku dota rarara to nadaa pade nampopore poparentaa Alatala. Neliu kabiara pade nahombo. Moma naria ekara nampopore humawee inoha to nabaraka i huruga. 11 Bo malaeka-malaeka moto, nau nelabipi rohora pade barakara lako guru-guru to moma nakono ee mai, momarahana nabia namparai inoha-inoha to nabaraka ee mai hante baha-baha to nepopore i tingoo Pue. 12 Guru-guru to moma nakono ee mai nahibali hante binata, to moma naria pekirina, to nantuku dotana moto, to laiote bona rahoko pade rapatehi. Laipoporera napa to moma incanira. Natantu ami Napakaropura mei Alatala ewa binata to naila laipatehi tauna. 13 Hira mei rabalahi hante kahehaa, apa laipakahehara tau ntanina. Naupa mpoeo, laipokagoera nobabei ingku to nadaa mantuku dotara moto. Hira ee wule nampakaea komi. Ane mangkonira dohemi, laipakaohara rarara hante nampabagiu komi. 14 Bagora nampokailu bangkele to nakalelo, pade moma naria kaohaara nobabei doha. Lailanaira tauna to nalente peparahayana. Rarara nabiahami naliu ganta. Hira ee mai tauna to laikamo Alatala. 15 Apa momara nadota nantuku dala to nanoro, alaana nahalatarara. Dala Bileam ana Beor aga to laitukura. Apa Bileam ee mai pokononahana nantarima tomo lako ingkuna to nadaa. 16 Naupawee Bileam laikamaro Alatala habana ingkuna to nadaa ee mai. Keledai pateke to moma namala nojarita nawali nojarita ewa manuhia pade nampatagi nabi ee mai bona nemopi nababei bagona to nadoyo ee.
17 Guru-guru to moma nakono ee mai nahibali hante pentumua ue to moma naria uena pade ewa gawu to laitawiri ngolu bohe hampena moma'i namala nanau uda. Alatala nampahadiakara po'ohaa to nelabi kalimauna, 18 habana nahombo jaritara bo moma'i naria bakena. Lailanaira tauna to nabouradapa natebakaha lako dohera to nahalatara ingkura. Lailanaira tauna ee hante nampemakono dota rara to nadaa bona manculikira tauna ee hi ingkura to nadaa. 19 Guru-guru to moma nakono ee mai nanguli ane tauna to nantuku popatudura natebakaharamo lako humawee atura, bo hira moto kakonona laipobatua ingku daa to nampakagero manuhia. Apa ane tauna laidagi hangu hangaa, hia nawali batua to nampadagi'i ee mai. 20 Apa tauna to laincanirami Pueta Yesus Kristus to Pepakahalama pade natebakaharamo lako humawee dota dunia to nampakadoha manuhia, naupawee matehoo nculi muiramo hante dota dunia ei hampena madagira, alaana melabikipi kahilakara lako to pamulana. 21 Aginalaupi tauna to ewa ee mai moma rancanira dala to nanoro lako Alatala, nemo rancanira naupawee momara nadota nanturuhi humawee parenta to nagaha to laiparata hi hira. 22 Napa to laibabeira nampemakono pangengko to iwei, “Dike nangkoni nculi napa to lailuana,” pade “Wawu to napu laidiu nanculiki rau i potampoana.”