Eo karata nculi Pue
3
1 Ompi-ompi to laipotoweku, ei mai hura to karongkanina laitulihiku hi komi. Rara huraku to pamulana bo to karongkanina ei, laipehimukuiku nampalingai komi bona meumba pampekirimi to nagaha, 2 bona milinga moto patudu to laiulikara komi nabi Alatala owi pade parenta Pue to Pepakahalama, to laiulikara komi rasul.3 Koropokona to kana mincani, i eo lau kahudua dunia mei, mariara tauna to mampopore komi to wule mantuku dota rarara moto. 4 Raulira iwei, “Umami bakena potipa karataa Pue? Namateramo tumpulokota, humaweena bate-batena moto lako pamulana dunia laipajadi.” 5 Laitungkaira moma nampangaku ane lako owi nariami langi bo dunia laipajadi Alatala hante lolita-Na. Dunia ee laipajadi-Na lako ue, pade hante ue, 6 pade hante ue ee mui, dunia to owi laipakaropu hante ue mowo. 7 Naupawee langi bo dunia to naria ei mai, laipiara lolita Alatala ee duuna marata mei tempona rapakaropu hante apu mahingkani hante tauna to nadaa ingkura.
8 Naupawee ompi-ompi to laipotoweku, to hangaa ei nemo mikalingani: I mata Pue, moma naria pontaniana haeo hante hancobu mpae, nahibali aga. 9 Moma-'I nalera Pue nopakadupa napa to laitipa-Na, naupa naria tauna nanguli nalera-'I. Nohabara-'Idipi hi komi, apa moma-'I madota maria tauna maropu. Dota-Na humawee tauna mancoro mobabei doha.
10 Naupawee eo Pue marata ewa to pangio. Tempo ee mei, langi maronto hante moni berehe to narimboho. Humawee to naria i langi mapapu pade dunia hante humawee ihina maronto. 11 Aji, ane humawee lauria maropu ewa ee, kana magaha mpuu katuwumi mantuku dota Alatala, 12 bulami nampopea bo nampakahomi karata eo Alatala. Karata Eo-Na ee mei, langi mapu mapapu pade humawee to naria i langi marutu keni kapane baa apu ee mai. 13 Naupawee, kita nampopea langi to nabou pade dunia to nabou to laitipa Alatala, i rima humawee tauna matuwu manoro.
Maroho peparahaya mampopea karata Yesus
14 Etumo, ompi-ompi to laipotoweku, bulami nampopea humawee lauria, mipehimukui mpuu bona magaha katuwumi pade nemo maria halami i tingoo Alatala. Matuwu mohingkabelo moto oa komi hante Alatala. 15 Ulimi ane pohabara Alatala ee halaku loga to laiwaika-Na komi bona mahalama komi. Wee moto mui Paulus ompita to laipotoweta, notulihi hi komi nantuku kataualu to laiwai Pue hi hia. 16 Rara humawee hurana laitulihina oa nangkambelai humawee lauria. Naria ami to nakoro laipahata rara hurana. To nakoro laipahata ee mai laipomegolira tauna to moma napa laincanira pade to moma naroho peparahayara. Apa laipoweera moto mui tulihia to ntanina rara Buku to Nagaha. Habana ingkura ee mai, Napakaropura Alatala. 17 Naupawee komi ompi-ompi to laipotoweku, laincanimi amimi humawee ei mai. Etumo, kana mainga moto oa komi, bona nemo komi rapahalatarara tauna to moma noada hampena madungka komi lako pentidaami to naroho. 18 Naupawee kana mitambaiki pamparasaimi kabohe towe Pueta Yesus Kristus to Pepakahalamata rara katuwumi, pade mitambaiki bewa komi nangincani-I. Hiami to mahipato rapemabohe welau ei duu kahae-haena. Amin.