Hura Petrus Karongkanina
Tabe
1
1 Lako Simon Petrus, batua pade rasul Yesus Kristus. Hura ei laipakatuku hi hira to hingkani-ngkani hante kami nawali to neparahaya habana Alatala pade to Pepakahalamata Yesus Kristus ee nobabei to nanoro. 2 Mohambaya'a bona Alatala mampawaika komi towe to nabohe hante katuwu to nanone hampena melabi, habana laincanimi Alatala pade Yesus, Pueta.Pekio pade pampelihi Alatala
3 Alatala hante baraka-Na nampawaikata hangu hangaa to nobunu tapake matuwu mantuku dota-Na apa laincanitami nangkambelai Hia to nangkiota hante baraka-Na to nabohe pade kabelo-Na. 4 Hante kabohe baraka-Na pade kabelo-Na eemile laiwaika-Nata humawee tipa to nobunu pade nelabi kabohena bona hipata mahibali hante hipa Alatala, pade matebakahata lako doha i dunia, habana dota rara to nadaa. 5 Etumo, pehimukui mpuu bona peparahayami hi Kristus mitambai hante ingku to nabelo, pade ingkumi to nabelo kana mitambai hante noto. 6 Notomi kana mitambai hante mantanee dota rara, mantanee dota rara kana mitambai hante mohabara rara kahehaa, pade mohabara rara kahehaa kana mitambai hante matuwu mantuku dota Alatala. 7 Matuwu mantuku dota Alatala kana mitambai hante kabelo rara hi ompi to hangu kaparahayaa, pade kabelo rara hi ompi hangu kaparahayaa kana mitambai hante towe hi humawee tauna. 8 Ane mipoingkuka humawee ingku lauria pade mitambai oa, pomencanimi hante Pueta Yesus Kristus mpuu-mpuu naria bununa pade naria wuana i rara katuwuami. 9 Naupawee tauna to moma noingku ewa ee mai, nahibali hante to naburo pade to nagopi pampekirina, to nangkalingani ane humawee dohana to ilodo laiampunimi.
10 Etumo ompi-ompiku, pehimukui mpuu mobabei humawee lauria bona maria bakena pekio Alatala pade pampelihi-Na komi. Ane humawee lauria mibabei, moma komi manawu rara dohaa. 11 Ane weedimi, Napaliu mpuumo komi Alatala mawali todea i rara poparentaa-Na to moma maria kahuduana, etumi poparentaa Pue Yesus Kristus, to Pepakahalamata.
12 Etu pade laipalingaiku oa komi nangkambelai humawee lauria, naupa laincanimimi pade laiparahayami mpuu patudu to nakono to laitarimami lako Alatala. 13 Apa laipekiriku, bagoku amimi mampalingai oa komi humawee lauria, kapomaku mamate. 14 Apa laikewoka-Na'amo Pueta Yesus Kristus, ane moma'amo mahae mamate. 15 Etu pade laipehimukuiku mpuu bona mamate'apa mei, milinga moto oa humaweena lauria.
Lolita Alatala to laiparatara nabi nangkambelai Kristus laipaganai
16 Apa moma kami nantuku tutura kalowo to laibabei hante kataualu manuhia tempo kami noparata hi komi nangkambelai karata nculi Pueta Yesus Kristus hante baraka-Na to nabohe. Kamimi habi to nampahilo mata baraka-Na to nepakahera. 17 Laihilo kami bewa Yesus laibila pade laipemabohe Tuamata, Alatala. Tempo ee mai iepe kami Alatala to neliu kabohe baraka-Na nololita hi Hia, “Eimi Ana towea-Ku to laipokagoe-Ku.” 18 Lolita ee mai laiepe kami narata lako huruga, bula kami laipodohe Yesus i lolo bulu to nagaha. 19 Etu pade narohoki pamparahaya kami peboha Alatala to laiparatara nabi owi. Nabelo mpuu ane mipairara peboha Alatala ee mai, habana peboha Alatala ee mai ewa poindo to nabaa i kalimauana duu parabaa. Mipairara mpuu peboha Alatala ee mai duuna Yesus marata nculi mampakabaa rarami ewa betue mali mataeo. 20 To koropokona milinga, nemo maria tauna mobatuani peboha-peboha Alatala to laitulihi rara Buku to Nagaha mantuku dotana moto.b 21 Apa moma naria peboha Alatala to laiparata nantuku dota manuhia, naupawee peboha ee mai laiparata tauna to naponu Inoha to Nagaha.