Patudu bona matundu hi Alatala
4
1 Neumba lako rima pobungka pade pomehonomi? Humawee ee mai neumba lako dota rarami to nonepobali rara wotomi hampena laibabeimi to nadaa. 2 Naria to laipokailumi naupawee moma'i namala laialami, alaana nepatehimo komi. Nohiri rarami, naupawee moma lairatami napa patujumi, alaana nobungka komi pade nonehono. Moma'i lairatami napa to laipokailumi bo to laipatujumi apa moma komi nohambaya. 3 Ba nohambaya moto komi, naupawee moma laitarimami napa to laiperapimi, apa nahala hambayami. Apa to laiperapimi rara hambayami wule mipake mampakaoha dota rarami moto.4 Komi ei mai nahibali hante tauna to nogau hala, apa moma komi natigu hi Alatala. Laincanimi moto ane mipokono ingku to nadaa i dunia ei, komi nampobali Alatala. Aji, hema to nampokono ingku to nadaa i dunia ei, hia nampobali Alatala. 5 Nemo mipekiri ane napa to laiuli Buku to Nagaha moma nakono. Rara Buku to Nagaha laiuli iwei, “I rara wotota Alatala noboli inoha. Inoha ee naroho dotana.”a 6 Naupawee kabohe towe Alatala to laiwaika-Nata nabohepi lako dota inoha to naria hi kita. Nangkambelai ei, mamala tabaha rara Buku to Nagaha to laitulihi iwei,
“Alatala nampaewa tauna to nahombo,
naupawee nampotowe tauna to moma nahombo.”
7 Etumo, kana matundu komi hi Alatala. Ewami Magau Heta, bona malai'i lako tingoomi. 8 Mohukimi Alatala bona Alatala mui mampamohuki komi. Komi to nadoha, pentuumo mobabei doha. Komi to norompenga rarami, pakagaha rarami. 9 Kana mihoho mpuu rarami, makeo pade motantangi komi habana dohami. Ane ilodo nakiri taimi nobabei doha, tempo ei kana mikakeohimi dohami. Pade ane ilodo nagoe komi nobabei doha, tempo ei kana majuu rarami habana dohami. 10 Nemo komi mahombo i tingoo Alatala, bona Napemabohe komi.
Nemo mepakudaa ba mehalai
11 Ompi-ompi, nemo komi momepakudaa. Hema to mopakudaa ba mampahalai ompina, hia nopakudaa pade nampahalai patudu Alatala. Ane mihalai patudu Alatala, kakonona moma komi nadota nanturuhi patudu ee mai. Nawali to pobotuhi patudu eedamo komi. 12 Hadua aga to nobabei patudu pade to pobotuhi. Hiami Alatala to nabaraka mampakahalama bo mampakaropu manuhia. Aji, komi etu manuhia moto komi, moma komi mahipato mampahalai hingka manuhiami.
Nemo mangkalingani Pue rara humawee liwomi
13 Ompi-ompi, epe belo. Komi to nanguli, “Welau ei ba maile rau kami i ngata bohe. Hampae kami mo'oha i ria modaga pade madea rahi kirata,” 14 bo moma incanimi napa to madupa maile. Napami batua tuwumi? Tuwumi etu ewa rangahu to hangoni moto'i laihilo, napu ee narontomi. 15 Kakonona, kana iwei miuli, “Ane Napodota Pue, matuwu kami pade mobabei hangu hangaa.” 16 Naupawee moma iwee iulimi, nahombodi jaritami. Humawee jarita to nahombo ewa ee mai mpuu-mpuu nahala. 17 Aji, ane maria tauna ncanina moto bewa kakonona mobabei to nabelo, naupawee moma'i laibabeina, tauna ee mai nadoha.