Pepaingai nangkambelai dila
3
1 Ompi-ompiku, nemo madea gaga komi to mingki mawali to pepatudu nangkambelai lolita Alatala. Apa laincanimi ane mawali to pepatuduta, mantomopi mei huku to tatarima lako to ntanina ane mahalata. 2 Apa humaweeta nadea kahalaa laibabeita. Tauna to moma naria nahala pojaritana, hia ee mai manuhia to moma nakahalaia, namala'i notanee humawotona. 3 Laihamaita ngudu jara bona madota'i manturuhita, hampena namalata noparenta humawotona. 4 Hilo mui kapala tahi. Naupa nabohe'i pade najala laitawiri ngolu bohe, namala'i laibedo hante kamudi to nakodi nantuku dota rara to nopajala kapala ee mai. 5 Wee mui dilata, naupa parewa woto to nakodi moto'i, namala'i nampopeumba uruhia to nabohe ane mahombo pojaritata.Hilo mui apu to nakodi, namala'i nopapuhi rara ngkakau to naluo. 6 Dila ee mai nahibali hante apu. I rara wotota, dila ee nawali pentumua humawee to nadaa pade laipopengkanelena nahobo i wotota. Jarita to laipakahowa dila ee mai nopapuhi humawee tuwuta hante apu lako naraka. 7 Humawee binata to naila, tonci, binata to nengkanele pade bau rara tahi namala laipakanara. Humawee binata ee mai manuhia to nampakanarara. 8 Naupawee moma hema haduaa tauna to namala nopanara dila manuhia. Dila ee mai nadaa pade moma'i namala laiaturu, pade naponu hante rahu to nepatehi. 9 Hante dila laiuneta Pue, Tuamata i huruga. Pade hante dila ee mui, laikamota manuhia, bo manuhia ee laipajadi nantuku tari Alatala. 10 Lako hangu ngudu, nehuwu peune pade pekamo. Ompi-ompi, kakonona momata mamala ewa ee. 11 Moma naria pentumua ue, hangkaniliu nampopehuwu ue to napoi pade ue to moma napoi. 12 Ompi-ompiku, kau ara moma'i namala nowua wua kau zaitun. Pade puu anggur moma namala nowua wua kau ara. Wee mui pentumua ue to napoi, moma'i namala nampopehuwu ue to moma napoi.
Noto lako huruga
13 Hema lako hi komi to nataualu pade naria notona? Ane naria tauna to ewa ee, mamala rahilo lako pokaingkuna to nabelo to moma nahombo ewa bewa kahipatona tauna to naria notona. 14 Naupawee ane nariadipi hiri rarami pade nampomaihi wotomi moto, nemo komi mahombo pade miuli naria notomi, apa ingkumi etu nohihala hante patudu to nakono. 15 Noto to ewa ee mai moma'i narata lako huruga, naupawee lako dunia, lako dota rara manuhia pade lako anudaa. 16 Apa i rima naria hiri rara pade nampomaihi woto moto, i hee mui naria pobungka pade humawee ingku to nadaa.