Nemo mampelihi tauna
2
1 Ompi-ompiku, halaku tauna to neparahaya hi Pue Yesus Kristus, Pue to laipemaboheta, nemo komi mampelihi tauna. 2 Ane maria hadua tauna mohingki bulawa pade mowaru to naramba mehua rara kahiromuami, pade marata mui hadua to nakahiahi mampake waru to nauha, 3 mipomaihipi mampabila tauna to nowaru naramba ee, pade miulika'i, “Maita moncuna i poncunaa to nabelo ei!” Pade to nakahiahi ee miulika, “Pokangkoremoko hetu!” ba miulika'i, “Poncunamoko i daula humpii paaku ei!” 4 Ane wee ingkumi, laipopontanimimi manuhia habana nampahilo tarira moto. Ingkumi ee nahibali ewa ingku to pobotuhi to nadaa pampekirina.5 Epe, ompi-ompi to laipotoweku! To nakahiahi i dunia ei laipelihi Alatala mawali to nahugi rara peparahayara. Hira ee mai mawali todea Alatala ewa to laitipa-Na hi tau-tauna to nampotowe-'I. 6 Naupawee laipoporemidi tauna to nakahiahi, bo tauna to nahugidi to nampobatua komi pade nangkeni komi rau i pobotuhia. 7 Hirami to nampopore hanga Pueta Yesus Kristus to laiuneta, to nampakawali komi todea-Na.
8 Nakonomi ingkumi ane mipoingkuka koro patudu to laitulihi rara Buku to Nagaha, “Potowemi hingka manuhiamu ewa pampotowemu wotomu moto.” 9 Naupawee, ane mipelihi tauna mihilo lako tarira, nadoha komi pade patudu Alatala moto nampakanoto ane laitibokimi patudu Alatala. 10 Apa ane maria tauna motiboki hangaa aga lako patudu Alatala, nahibali laitibokina purami patudu Alatala. 11 Apa Alatala to nanguli, “Nemo mogau hala,” pade Hia mui to nanguli, “Nemo mepatehi.” Aji, ane moma komi nogau hala, naupawee nepatehi komi, ee nahibali notiboki patudu Alatala.
12 Pojaritamo pade pokaingkumo ewa tauna to kana Nabotuhi Alatala hante patudu-Na to nampabakaha tauna lako doha. 13 Apa moma ami'i ma'ahi rara Alatala mampahuku tauna to moma na'ahi rarana. Ahi rara nampadagi pehuku.a
Peparahaya to moma'i laipoingkuka kakonona namate
14 Ompi-ompi, napami bununa tauna manguli neparahaya'i hi Pue, bo moma'i laipoingkukana napa to laipodota Pue? Apa mamala'i peparahayana to ewa ee mampakahalama'i? 15 Ane maria hadua balailo ba bangkele moma naria waruna ba nakura pangkonina eo-eona, 16 pade miulika'i, “Pakabelohawo i dala. Pakemi waru to naomu pade pangkonimo duu mabohu,” naupawee moma'i miwaika to laiparaluuna, napami bununa? 17 Wee mui hante peparahaya. Ane peparahaya ee mai moma'i rapoingkuka, moma naria bununa. 18 Naupawee, ane maria tauna manguli, “Iko nangkakamu peparahayamu pade aku nangkakamu ingkuku to nabelo,” Kuhonoira iwei, “Pahiloi'a peparahayamu to moma'i poingkukamu etu, pade aku mampahiloiko peparahayaku to laipoingkukaku.” 19 Laiparahayami ane hadua aga Alatala. Nabelo etu, naupawee heta-heta mui namparahaya ane hadua aga Alatala, pade nokaridira keni ekara. 20 Nadoyo mpuuda komi. Kupakanotoka komi ane moma naria bununa peparahayami ane moma nabelo ingkumi. 21 Hilomi tuamata Abraham. Alatala nampemakono'i habana ingkuna to nampopewai anana Ishak halaku kurban hi Alatala i pantunua kurban. 22 Lako heemi laincanita ane peparahaya Abraham nonekeni hante ingkuna pade ingkuna ee nampakagana peparahayana. 23 Aji, lauria nopaganai to laitulihi rara Buku to Nagaha to nanguli iwei, “Abraham neparahaya hi Alatala, pade habana peparahayana ee mai, Alatala nantarima'i halaku tauna to nanoro.” Etu pade Abraham ee mai laiuli bale Alatala. 24 Aji, nanotomi ane manuhia laipemakono habana ingkuna to nabelo, moma wuwu peparahayana. 25 Hilo mui Rahab bangkele to nobalu wotona ee mai. Rahab laipemakono habana ingkuna nantarimara to pekamata bongo lako Israel i houna, pade nantulungira netibo nantara dala ntanina. 26 Aji, peparahaya to moma laipoingkuka nahibali hante woto to momami naria inohana. Peparahaya to ewa ee, namatemi.