Hura to Laitulihi Yakobus
Tabe
1
1 Lako Yakobus, batua Alatala pade Pue Yesus Kristus. Hura ei laipakatukaku hi humawee todea Alatala i humangkulili dunia. Tabe lako hi aku hi komi pura.Peparahaya pade noto lako Alatala
2 Ompi-ompi, kagoemo komi ane mengila pehori merumpa rara katuwuami. 3 Apa ncanimi moto, ane peparahayami hi Kristus rapehori, mantambaiki lau mei karoho peparahayami pade mitaha mantingohi pehori. 4 Palelemi karohomi nampaewa pehori ee mai mantambai dola duuna momamo komi makahalaia, marohomi peparahayami pade momami maria to nakura. 5 Ane maria lako hi komi tauna to nakura notona, kana naperapi noto hi Alatala. Pade Alatala mampawaika'i napa to laiperapina. Apa Alatala nampawaika humawee tauna hante bohe rara-Na pade moma-'I nokahuru. 6 Tauna to merapi, kana meparahaya, nemo'i mokarara. Apa tauna to nokarara nahibali hante balumba tahi to laitawui ngolu rau tumai. 7 Tauna to nokarara nemo'i moharumaka ane maria mei to Nawaika'i Pue. 8 Apa norompenga rarana, etu pade moma'i narodo rarana natuwu.
To nakahiahi pade to nahugi
9 Ompi-ompi hangu kaparahayaa, to nakahiahi katuwumi, kana magoe komi habana Alatala nampemabohe komi. 10 Wee mui komi to nahugi, kana magoe komi ane Alatala mampemakodi komi. Apa to nahugi nahibali hante hehe kawoko. Hangonira aga natuwu. 11 Ane meberepi eo hante peinona to nakara, natantu ami malaumi kawoko ee mai, hampena hehena marona pade momami maramba kawoko ee rahilo. Weemi mai tauna to nahugi, mamate tempona nabuheha nampauruhi bagona.
Kana mantaha ane rapehori
12 Morahimi tauna to nantaha laipehori. Apa ane mantaha'i rapehori, natarima mei tomona, etumi katuwua to laitipa Alatala hi tau-tauna to nampotowe-'I. 13 Ane maria tauna rapehori, nemo nauli, “Pehori ei narata lako Alatala.” Apa Alatala ee moma naria tauna to laipehori-Na. Pade Alatala moma-'I namala laipehori to nadaa. 14 Naupawee butu tauna laipehori dota rarana moto, apa dota rarana ee to nampakadoyo pade nampadii'i. 15 Ane naturuhidimi dota rarana ee mai, madohami tauna ee. Ane moma'i mentuu tauna ee mai mobabei doha, natarima mei kamatea duu kahae-haena. 16 Ompi-ompi to laipotoweku, nemo komi mahalatara. 17 Butu pewai to nabelo bo nagana to laitarima manuhia narata lako huruga, laipopanau Alatala to nopajadi humawee baa i langi. Alatala ee mai moma-'I naria pobalia-Na. 18 Dota-Na moto Alatala nampajadita ana-ana-Na hante pamparahayata Kareba Belo to nakono. Laibabei-Na ewa ee bona kitami to pamulana Nabouti lako humawee to laipajadi-Na.
Lolita Alatala kana rapoingkuka, moma wuwu raepe
19 Epe belo komi ompi-ompi to laipotoweku. Butu tauna kana mahomi'i mangepe, naupawee nemo mahomi mampopehuwu jarita pade nemo mui mahomi mahodo. 20 Apa tauna to nahodo moma'i namala nobabei to nanoro to laipokono Alatala.
21 Etumo, bakahami humawee ingku to moma'i mahipato rababei pade ingku to nadaa to nadea ngaa etu. Pade tarimami hante kabuloli rarami humawee lolita Alatala to laiboli-Na i rarami, apa lolita Alatala ee mai nabaraka mampakahalama komi. 22 Kana mipoingkuka mpuu lolita Alatala ee mai, moma wuwu miepe. Apa ane moma komi iwee, laikalowonimi moto wotomi. 23 Tauna to wule mangepe lolita Alatala moto'i pade moma'i laipoingkukana, hia ee mai nahibali hante tauna to nampenoto lencena i padoma. 24 Poma'i nahae nampenoto lencena i padoma, rau'imi pade kalinganinami bewa tari lencena i rara padoma. 25 Patudu Alatala ee mai nagana pade nabaraka mampabakaha tauna lako doha. Aji, nemo wuwu raepe mara pade rakalingani. Naupawee kana rapemanotoi belo, rapairara pade rapoingkuka dola. Tauna to ewa eemi mai to Natiroi Alatala rara humawee to laibabeina.
26 Ane maria tauna manguli hia to natigu nepue, naupawee moma'i laijagaina belo dilana, hia ee mai nampakalowoni wotona moto, pade moma naria bunu pepuena. 27 Ane tatulungira ngana to momami naria totuara pade bangkele to nabalu to naheha katuwura, pade matiguta mojagai wotota bona momata mobabei doha mantuku dota dunia, eemi pepueta to mpuu-mpuuna to moma nakahalaia i tingoo Tuamata, Alatala.