Pepaingai hi to nahugi
5
1 Hilo, komi to nahugi, kakeo pade potantangimo komi, apa mapepa mpuu heha to mamparumpa komi. 2 Napopemi kahugiami pade laikoni bubumi warumi. 3 Nataigaraami bulawa pade halakami. Taigaraana ee mai to mampahiloi kahalaami pade kahuduana mei rahuku komi i rara apu. Laitobumi gagu i dunia ei, bo dunia ei lau mahudumi. 4 Epe belo komi! Nongareramo tauna to nobago i bonemi nerapi tulungi hi Alatala apa tomora moma laibayarimi. Pongarera ee mai laiepe-Nami Alatala, Pue to neliu baraka-Na. Tomo to moma laibayarimi eemi to nawali habi hi komi. 5 Natuwu komi i dunia ei nangkarahai kahugia pade kasanaa dunia. Laipakarudumi wotomi, ewa ewua to laipahadia rahamale. 6 Tauna to moma naria halara laihukumi pade laipatehimi. Moma'ihawo bukura nampaewa komi.Mohabara mantingohi kahehaa
7 Etumo ompi-ompi, pohabaramo komi duu karata Pue. Hilo bewa pohabarara to popampa nampopea wua tinudara to laiharumakara. Nohabarara nampopea uda lako pamulara notuda duuna tinudara ee mai nowua. 8 Wee mui komi kana mohabara pade maroho rarami, apa parami Pue marata. 9 Ompi-ompi, nemo komi mangkaranguhi pade momehalai, bona moma komi rahuku. Hilo, to Pobotuhi ee mai namohumi, parami marata.
10 Ompi-ompi, lingara nabi to noparata lolita Alatala. Nohabarara pade nantahara nantingohi kahehaa. Aji, penaumi bewara natuwu. 11 Kakonona, hira eemi to mpuu-mpuu rauli nagoe, apa nantahara rara kahehaa. Laiepemimi bewa pohabara Ayub nantingohi kahehaa pade napa to kahuduana laibabei Pue rara katuwuna. Apa Pue nelabi mpuu towe pade ahi rara-Na.
Nangkambelai sumpa pade hambaya
12 Ompi-ompi, mipairara mpuu to ku'uli ei mai: Nemo komi mosumpa mangkahangai huruga, ba mangkahangai dunia ba mangkahangai to ntanina. Wule ulimi io ane patujumi manguli io, pade ulimi moma ane patujumi manguli moma, bona nemo komi Nahuku Alatala.
13 Ane maria hadua lako hi komi to maheha, mabelopi mohambaya'i. Ane maria hadua to magoe, mabelopi moulia'i mampaune Pue. 14 Ane maria tauna lako hi komi to madua, mabelopi nakiora penatua jumaa, bona rahambayanira'i pade raelaira'i hante lana rara hanga Pue. 15 Ane mohambayata hante peparahayata, mauri'i tauna to nadua ee mai. Pue mampakauri'i pade ane maria doha to laibabeina, Pue mampa'ampuni'i. 16 Etumo, hore pangakumi dohami pade momehambayani komi, bona mauri komi. Hambaya tauna to nanoro, nabohe mpuu barakana. 17 Nabi Elia manuhia biaha moto'i ewa kita. Nohambaya'i hante rarana mpuu bona moma maudaa. Moma mpuu'i naudaa tolu mpae ono mula kahaena. 18 Napu ee nohambaya mui'i nerapi uda. Naudaa mpuumi hampena tinuda i dunia nampopehuwu wuana.
19 Ompi-ompiku, ane maria tauna lako hi komi to nahalatarami lako patudu to nakono, pade ane maria tau ntanina to mangkeni nculi'i mantuku patudu to nakono, eemi ingku to nabelo. 20 Bona mincani, tauna to nangkeni nculi tauna to nadoha pade nahalatara ee, hia nampakahalama to nadoha ee lako kamatea to kahae-haena pade Alatala mei mampa'ampuni to nadoha ee lako doha-dohana to nadea.