Patudu nangkambelai ingku to nabelo
2
1 Naupawee iko Titus, karebaimi patudu to nakono. 2 Ulikara balailo to natuaramo bona mantanee dotara, mahipatora rabila, manoto rarara, maroho peparahayara, madea towera pade matigu moto oara nau maheha.3 Wetu moto mui hi bangkele to natuaramo. Patudura bona mabelo ingkura halaku tauna to neparahaya muntu hi Alatala. Momara mepakudaa pade momara to panginu, naupawee kana mataualura mopatudu to nabelo. 4 Ane wee, mamala muira mopatudu bangkele to nangura mampotowe balailora bo anara, 5 manoto rarara pade magaha katuwura, mabelo poaturura to i rara houra pade matundu hi balailora. Ane wee mai, lolita Alatala moma rapopore tauna.
6 Wetu moto mui hi balailo to nangura. Patudura bona manoto rarara mobabei hangu hangaa. 7 Pakenira mobabei ingku to nabelo. Pahiloira ane nanoroko pade raramu mpuu nepatudu. 8 Ane mojaritako pakemi baha to nabelo laiepe, to moma rahalai tauna bona humawee balimu maea, apa moma naria jaritamu to nahala to mamala rapojaritara mopakudaata.
9 Patudura batua bona matundu pade mampakasana maradikara rara hangu hangaa. Nemora mebili, 10 nemora mangio. Kana mabelo ingkura pade matigura hi maradikara, bona hante ingkura ee, tauna mantarima belo patudu Alatala to Pepakahalamata.
Towe Alatala to nabohe nampakahalamata lako ingkuta to nadaa
11 Laipahiloi-Nami Alatala kabohe towe-Na to nampakahalama humawee manuhia. 12 Alatala nampatudukiita hante kabohe towe-Na ee bona nemotapa matuwu mampaewa dota Alatala pade bona tapalahimi dotata to nantuku dota dunia ei. Laipatudukiita bona manoto rarata, manoro katuwuta pade matigu moto oata mepue hi Alatala i dunia ei 13 hamalita mampopea karata Yesus to laiharumakata to mpuu-mpuu mampakasana rarata. Tempo ee humawee tauna mampahilo kabohe baraka Yesus Kristus, Hiami Alatala to neliu kabaraka-Na bo to pepakahalamata. 14 Yesus Kristus ee mai nampopewai woto-Na laipatehi nampatolohita bona mahalamata lako humawee ingkuta to nadaa hampena mamalata mawali todea-Na to naraji mobabei ingku to nabelo.
15 Karebaimi humaweena etu pade patudura tauna to nangepeko hante baraka parenta Alatala. Nemo mupalele tauna mampahauruko.