Titus 1

Hura Paulus rau hi Titus

Tabe

1 Lako Paulus, batua Alatala pade rasul Yesus Kristus. Aku laipelihi bo laitudu mantulungi jumaa Alatala bona marohoki peparahayara pade pampahara patudu to nakono, to mangkenita matuwu mantuku dota Alatala. 2 Patudu to nakono ee nampawaikata peharumaka ane tarata mei katuwua to moma maria kahuduana to laitipa Alatala kapomana dunia laipajadi. Alatala moma nokalowo. 3 Mantuku tempo to laipakatantu-Na amimi, laipakadupa-Nami tipa-Na ee. Pade aku laiparahayaka bago moparata kareba nangkambelai tipa-Na ee mai, mantuku parenta Alatala to Pepakahalamata. 4 Hura ei laipakatuku hi iko Titus to mpuu-mpuu laipowaliku anaku moto apa neparahaya hingkanita hi Kristus. Mohambaya'a bona kabohe towe pade katuwu to nanone lako Alatala Tuama pade Kristus Yesus to Pepakahalamata mampodoheko.

Bewa ingku tauna to mahipato mawali penatua

5 Patujuku nampalahiko i Kreta, bona mu'uruhi olu to poma laiuruhi pade muongko penatua i butu ngata ewa to laibohakakuko. 6 Penatua ee tauna to moma nakahalaia, hadua aga bangkelena, ana-anana neparahaya hi Kristus pade momara laihalai tauna habana ingkura to moma natimotoa ba momara namala laiaturu. 7 Penatua ee mai to poaturu hou Alatala to moma'i nakahalaia, moma nahombo, moma to nadoli nahodo, moma to nalangu-langu, moma to naheke, moma to naliu ganta. 8 Penatua ee mai tauna to nagoe nantarima to rata i houna, nampokono to nabelo, nanoto rarana, nanoro ingkuna, nagaha katuwuna, namala nantanee dota rarana. 9 Penatua ee mui to nanturuhi mpuu patudu to nakono to laipatudukata bona mamala'i mopatudu tauna hante patudu to nakono pade mantudoka kahalaara tauna to nampaewa patudu ee.

10 Laiuliku ewa lauria, apa nadeamo jumaa to moma neturuhi, pelabina bahangkua dua to Yahudi to namparahaya ane humawee balailo kana ratini. Laipahalatarara tauna hante jaritara to moma naowo. 11 Tauna to ewa ee kana rawunta ngudura, apa nadea to nohancou nagero peparahayara habana patudura to moma nakono. Nopatudura bona raratara kauntua to moma nahipato. 12 Hadua lako nabira motomi nanguli, “Nadea mpuu kalowora to Kreta, ingkura ewa ingku binata to naheke, nadokora pade nadea lohera.” 13 To laiuli nabi ee nakono. Etu pade kana mukamarora bona raparahayara patudu to nakono, 14 pade momaramo mamparahaya tuturara to Yahudi to moma naowo pade atura to laibabeira tauna to nampahapuaka patudu to nakono. 15 Hi tauna to nagaha rarara, humaweena nagaha hi hira, naupawee hi tauna to nadaa rarara pade to momara neparahaya hi Kristus, moma naria to nagaha hi hira, apa rarara bo pekirira nadaa. 16 Nangakura nangincani Alatala, naupawee ingkura nampehapuka Alatala. Nekarungkuira pade momara neturuhi. Moma mui laibukura nobabei ingku to nabelo.