Pue nampakahalamata habana towe-Na hi kita
3
1 Palingaira jumaata, bona matundu hi to poparenta. Raturuhira parenta pade kana mahadiara mobabei napa pura to nabelo. 2 Nemora mepakudaa, nemora mobungka, maolu pangkenira, pade kana madolera hi humawee tauna.3 Apa kita mui ilodo nadoyo, momata neturuhi pade nahalataratamo. Kita mui laipobatua nadea ngaa dota rara bo patuju rara to moma nabelo. Nadaa oa kehita, nohiri rarata pade nonepodaata. 4 Naupawee, Alatala to Pepakahalamata nampahiloi towe-Na bo belo rara-Na hi kita 5 hampena nahalamata. Laipakahalama-Nata habana nabohe ahi rara-Na hi kita, moma habana nabelo ingkuta. Laipakahalama-Nata hante Inoha to Nagaha to nampakagaha humawee katuwuata hampena kita ewa to laiote nculi pade humawee ingkuta laipakabou-Na. 6 Alatala nampawaikata Inoha to Nagaha hante kangaa rara-Na tempo Yesus Kristus nampakahalamata, 7 bona halaku tauna to laipemakono Alatala habana kabohe towe-Na, mamalata mamparata katuwua to moma maria kahuduana ewa to laiharumakata. 8 Nakono mpuu to iuli lauria. Dotaku, humaweena lauria mu'ulika mpuura tauna to neparahaya hi Alatala, bona rapehimukuira mpuu mobabei to nabelo. Katuwua to ewa eemile to nabelo bo to nobunu rababei humawee tauna.
Nangkambelai to nampakagero hintuwu jumaa
9 Nemoko mantuku pomebili to moma naria bununa bo nadoyo, tutura ulu jadi, pomehalapaha bo pomehono nangkambelai ihi buku Taurat, apa humaweena ee moma naria bununa pade moma naria batuana. 10 Tauna to nogero hintuwu i rara jumaa, ane hangkani ba rongkanidimi mukamaro moma'i mepangala, nemopi mupodohe'i. 11 Laincanimumi ane tauna ee nahalatara mpuumi pampekirina bo ingkuna. Dohana motomi mampahuku wotona.
Peboha pade tabe kahuduana
12 Ane kutududimi Artemas ba Tikhikus tulau, pehimukui bona mahomiko tumai i Nikopolis, apa noliwo'a rau matida i ria duuna mahudu tempo lengi. 13 Tulungi mpuura Zenas to nataualu buku Taurat etu hante Apolos bona nemora makakuraa rara pomakoara. 14 Pabiahara tauna to neparahaya hi Kristus mobabei hangu hangaa to nabelo, hampena mamalara mantulungi tau ntanina to nakakuraa, bona nemo katuwuara moma maria bununa.
15 Tabe hi iko lako humawee tauna to laipodoheku i hei. Parata tabe kami hi humawee doota to neparahaya hi Kristus. Mohambaya'a bona kabohe towe Alatala mampodohe komi.