Hura Paulus to Pamulana rau hi Timotius
Tabe
1
1 Lako Paulus, rasul Kristus Yesus habana parenta Alatala to nampakahalamata pade Kristus Yesus harumakaata. 2 Hura ei laipakatuku hi iko Timotius to laipowaliku anaku moto habana nahibali peparahayata hi Kristus. Kabohe towe, ahi rara pade katuwu to nanone lako Alatala Tuama pade Kristus Yesus Pueta, mampodoheko.Nangkambelai patudu to nahalatara
3 Peongkoku rau Makedonia, iulikakumoko bona matidako olu i Efesus mantagira bahangkua dua tauna, bona nemorapa mopatudu patudu to moma nakono. 4 Pade nemora mampomaihi tutura to moma naowo pade tutura ulu jadi to moma naria kaopuana. Humawee ee wule nampopeumba pomehalapaha, moma nangkeni kapolaa patuju bago Alatala mampakahalama manuhia rara peparahaya. 5 Patuju patuduku mantagira, bona jumaa momepotowe hante towe to neumba lako kabuloli rara, kagaha rara pade peparahayara to mpuu-mpuu hi Kristus. 6 Naria tauna to momaramo natuwu ewa lauria, pade nahalatararamo rara jarita to moma naria bununa. 7 Mingkira mawali to popaguru patudu Taurat, naupawee moma laipahara napa to laipojaritara pade moma laincanira napa to laiparahayara mpuu.
8 Laincanita pura ane patudu Taurat ee nabelo ane rapake mantuku patujuna to nakono. 9 Kana tapaha mui ane patudu Taurat ee moma laibabeika tauna to nanoro ingkura, naupawee laibabeika tauna to nampatiboki atura pade tauna to ne'ewa, to momara neparahaya hi Alatala bo to nadoha, to nantuku dunia ei bo to moma naria petukuara, to nampatehi tinana ba tuamana, pade to nampatehi tau ntanina. 10 Patudu Taurat ee mui laibabeika tauna to nogau hala bo to nonepogau hore balailoa, to pobalu manuhia, to pekalowoni, pade hangu hangaa to nonetimaliki hante patudu to nabelo. 11 Patudu ee naria i rara Kareba Belo to laiparahayaka'a. Kareba Belo ee lako Alatala to laipemabohe pade mahipato raune.
Posukuru habana ahi rara Alatala
12 Nosukuru'a hi Kristus Yesus Pueta to nampakaroho'a apa laiuli-Na natigu'a pade laiparahaya-Na'a mampobagoka-'I. 13 To naliu, aku ei to nampopore Yesus, to peduahi pade to naheke. Naupawee, na'ahi rara-Na hi aku apa tempo ee poma'a neparahaya pade poma laincaniku napa to laibabeiku. 14 Nelabi mpuu kabohe towe Pueta Kristus Yesus hi aku. LaiwaikaNa'a roho bona mamala'a meparahaya hi Hia pade mampotowe hingka manuhia habana nohangu rara'a hante Hia.
15 Nakono mpuu to iuli ei pade mahipato ratarima bo raparahaya, “Kristus Yesus narata i dunia mampakahalama manuhia to nadoha.” Pade lako humawee manuhia, akumi to nelabi kadea dohaku. 16 Naupawee, ee laumi habana na'ahi rara Alatala hi aku, bona rahilora tau ntanina pohabara Yesus Kristus hi aku to nelabi kadea dohaku ei. Ei nawali patudu hi humawee tauna to mamparahaya-'I mei, to mamparata katuwua to moma maria kahuduana. 17 Pebila pade peune to moma maria kahuduana mahipato rawaika Alatala, Magau to moparenta duu kahae-haena, to natuwu dola, to moma narawa pade to moma naria ntanina! Amin.
Pepalingai hi Timotius
18 Timotius anaku, bago ei laiparahayakakuko nampalinga peboha Alatala to laiparatara nabi hi jumaa nangkambelai iko. Pehimukuimi mampobago bago etu ewa tantara to nabia ne'ewa. Peboha Alatala ee mampakarohoko. 19 Jagai belo peparahayamu pade raramu to nagaha. Apa bahangkua dua tauna momaramo nadota nangincani uma to nakono ba uma to nahala, hampena natetuku peparahayara, 20 ewa Himeneus pade Aleksander to laipopewaiku hi Magau Heta bona mancorora mampopore Alatala.