Peumba manuhia to nelabi kadaa ingkuna kapomana Pue marata
2
1 Ompi-ompi, nangkambelai karata Pueta Yesus Kristus mei pade pampahiromu-Nata mo'oha mahingkani hante Hia, kuperapi mpuu hi komi, 2 nemo komi mahomi maingu bo mokalihe ane maria kareba manguli naratami eo Pue. Naupa raulira lako Inoha to Nagaha, lako patudu ba lako hura to laitulihi kami, nemo komi mokalihe. 3 Nau bewa, nemo mipalele tauna mampahalatara komi. Apa kapomana marata eo Pue, kana mariara olu tauna to mampaewa Alatala. Pade maria mei meumba hadua tauna to nelabi kadaa ingkuna, to laipakatantu amimi mehua naraka. 4 Hia ee mai mampaewa Alatala bo humawee baraka ntanina to laipue manuhia pade manguli hante kahombona ane nelabipi hia. Hia mei rau moncuna i Hou Alatala, pade mangaku ane hiami Alatala.5 Tempoku ritudipi dohemi, iulikaku oamo komi nangkambelai humawee lauria. 6 Laincanimi moto napa to nampataha to nelabi kadaa ingkuna ee hampena poma'i neumba. Apa maria moto mei tempona to laipakatantu Alatala, bulauma'i meumba. 7 Tauna to nelabi kadaa ingkuna ee rancana nobago bongomi, naupawee nariadipi to nampataha'i. Ane ralalidimi mei to nampataha'i, 8 meumbami to nelabi kadaa ingkuna ee mai. Ane maratadimi Pue Yesus, Napatehi'i to nelabi kadaa ingkuna ee mai hante inoha lako ngudu-Na pade Napakaropu'i hante baa baraka-Na. 9 Karata tauna to nelabi kadaa ingkuna ee mai bago Magau Heta. Madea ngaa mei to nepakahera, kajadia-kajadia bohe pade tanda-tanda to moma nakono nababei. 10 Madea ngaa pepatiwoo napake mampakahalatara humawee tauna to maropu mei. To maropu ee mai hira to moma nantarima kareba to nakono lako hi Alatala to kakonona mamala mampakahalamara. 11 Etu pade Alatala nampakatukara baraka to nepakahalatara, bona raparahayara to moma nakono. 12 Alaana humawee tauna to moma namparahaya to nakono pade nampokono ingku to nadaa kana rahuku.
Laipelihi bona rapakahalama
13 Aji, ompi-ompi to ipotowe Pue, kana mosukuru kami hi Alatala habana komi. Apa laipelihi-Na amimo komi Alatala bona rapakahalama, hante baraka Inoha to Nagaha to nampakagaha komi, pade hante peparahayami hi kareba to nakono. 14 Etumi patuju Alatala nampokio komi hante Kareba Belo to laiparata kami hi komi, bona mamala komi rapemabohe hingkani-ngkani hante Pueta, Yesus Kristus. 15 Etumo ompi-ompi, pakaroho mpuu peparahayami, pade kakamu dolami humawee patudu to laipatuduka kami hi komi, belo to laiuli kami, ba to laitulihi kami. 16 Pueta Yesus Kristus pade Alatala Tuamata nampotoweta, pade hante kabohe towe-Na laipakasana-Na moto oa rarata pade laiwaika-Nata harumakaa to nabelo. 17 Mohambaya'a bona Pue mampakasana bo mampakaroho rarami bona mamala komi mobabei pade mangkarebai to nabelo.