Paulus nerapi rahambayani
3
1 Kahuduana ompi-ompi, kiperapi mihambayani kami. Hambayani bona mahomi potolele kareba nangkambelai Pue pade i rima-rima ratarima hante goe rara, ewa to nadupa hi komi. 2 Hambayani mui bona Napakahalama moto kami Alatala lako to pegadoi pade to nadaa ingkura, apa moma humawee tauna neparahaya. 3 Naupawee mamala komi mampaharumaka Pue. Napakaroho moto rarami pade Napotolawai moto komi lako to nadaa. 4 Pade laiparahaya kami mpuu ane Pue nantulungi komi nobabei napa to laiboha kami hi komi pade mipoingkuka moto oa'i. 5 Pue moto mopanuntu komi oa bona mincani ane Alatala nampotowe komi pade bona mamala komi mohabara ewa Kristus.Paulus nepatudu bona nemo malohe mobago
6 Ompi-ompi, rara hanga Pue Yesus kiulika komi bona nemo mipodohera tauna to nadea lohera, to momara nadota nanturuhi humawee patudu to laiuli kami. 7 Apa ncanimi motomi bewa ingku kami to kana mituku. Moma kami nalohe nobago tempo kami no'oha dohemi. 8 Moma kami nangkoni mara konia tauna. Butu eona bo bengina kami nampehimukui nobago bona nemo maria to kipakaheha. 9 Kakonona moma kami mahala merapi hi komi. Naupawee humawee lauria laibabei kami bona mihilo bewa ingku kami to kana mituku. 10 Tempo kami ritu dohemi, paingai kami amimo komi, “Tauna to nalohe nobago, nemo'i mangkoni.”
11 Laiuli kami ei mai, habana iepe kami ane naria bahangkua dua lako komi to nalohe nobago. Momara nobago, wule noumpui uruhia doo. 12 Rara hanga Pue Yesus Kristus kitudu bo kipaingaira tauna to ewa ee mai bona manone motora mobago mampali to rakonira moto. 13 Komi ompi-ompi, nemo mikaohai moingku belo.
14 Ane maria tauna to malohe manturuhi napa to itulihi kami rara hura ei, mainga komi hi tauna ee pade nemo'i mipodohe bona maea'i. 15 Naupawee, nemo mipodaa'i, wule paingai'i halaku ompimi hangu kaparahayaa.
Tabe kahuduana
16 Kuperapi hi Pue puu kanonea tuwuta, bona Nawaika dola komi katuwu to nanone rara hangu hangaa pade humaweemi Napodohe dola moto komi. 17 Tabe lako hi aku, Paulus. Aku motomi notulihi tabe ei mai. Tabe eimi tanda to naria i humawee huraku. Pade iweimi tari tulihiaku. 18 Mohambaya'a bona kabohe towe lako hi Pueta Yesus Kristus mampodohe pura komi.