Hura Paulus Karongkanina rau hi Jumaa i Tesalonika
Tabe
1
1 Lako Paulus, Silwanus pade Timotius. Hura ei laipakatu kami hi komi jumaa i Tesalonika to nawali todea Alatala Tuamata bo Pue Yesus Kristus. 2 Mohambaya kami bona kabohe towe pade katuwu to nanone lako Alatala Tuamata, pade lako Pue Yesus Kristus mampodohe komi.Posukuru pade popakaroho rara
3 Ompi-ompi, kana mosukuru oa kami hi Alatala habana komi. Mahipato kami mosukuru, apa natetambai dola peparahayami hi Kristus pade natetambai mui pomepotowemi. 4 Etu pade laipotutura kami oa komi hante bohe rara hi jumaa Alatala to ntanina. Laitutura kami bewa katigumi pade peparahayami hi Kristus naupa laiduahi pade laipakaheha komi.
5 Laumile bakena ane Alatala nanoro pobotuhi-Na. Napepami iepemi habana natigu hi Alatala, etu pade mahipato mpuumo komi mawali todea i rara Poparentaa Alatala. 6 Nanoro ami ane Alatala mampabalahira to nampakaheha komi, 7 pade mampabakaha komi hante kami lako kahehaa. Alatala mei mampabakaha purata tempo Pue Yesus rapakarawa manau lako huruga hante malaeka-malaeka-Na to nabaraka. 8 Hante apu to nabaa Nabalahira tauna to namporau Alatala pade to momara nantarima Kareba Belo nangkambelai Yesus Pueta. 9 Humawee tauna to ewa ee mai rahuku duu kahae-haena, ratadi lako tingoo Alatala pade moma mamparasai kabohe baraka-Na. 10 Humawee ee mei madupa tempo eo karata-Na. Tempo ee humawee tauna to neparahaya hi Hia pade nawali todea-Na mampemabohe-'I pade mahera mampahilo-'I. Komi mui mei maria dohera todea Alatala ee habana to laiparata kami hi komi laiparahayamimi.
11 Etu pade laihambayani kami moto oa komi, bona Alatala mampawaika komi pampakulea matuwu mantuku dota-Na. Etumile pade laikio-Na komi Alatala. Kiperapi Alatala mampawaika komi baraka-Na bona madupa mpuu humawee dotami mobabei to nabelo pade mamala komi mopahudu humawee to laipobagomi apa neparahaya komi hi Kristus. 12 Bona ane wee, Pueta Yesus rapemabohe habana komi pade komi mui rapemabohe habana Yesus, mantuku kabohe towe Alatalata pade Pue Yesus Kristus.