Kapaŋaa kiimu na ba nɔ Zheruzalɛmu na ge
22
Kilɛ tuduro ma ɲaha tii fadaan li na, lee lemu lʼa ɲa kashɛɛ li ni ge.Ɲaha kʼa pye wɛ, Zheruzalɛmu?
Ɲaha na ma sipyii pu bɛɛri dʼa dugi kataya na wɛ?
2 Zheruzalɛmu, mu wemu wu bi soŋɔɔ,
na tunmɔ nigbɔ yeege, na fundanga pyi ge.
Ma sipyii piimu pʼa xhu ge,
ŋmɔpara ya ta pu gbo wɛ. Pu ya ta kori kashɛn ni wɛ.
3 Ma kashɛn ɲuŋɔfɛɛ pu bɛɛri pʼa pinnɛ paa,
sindaaya fɛɛ pʼa pu co na pye kashɛn buloo.
Ma sipyii pu bɛɛri pʼa pinnɛ pye kasolemɛɛ,
ali piimu bɛɛri pʼa bi fe na gbee taliige ni ge.
4 Lee wuu na nɛ jo: «Yi ganha bu da ɲuŋɔ le na tàan wɛ.
Yi na yaha di mɛɛ su fo xuuni.
Yi ganha ba yiyɛ kana da na puree
na sipyii pu gyɛɛgi wu wuu na wɛ.»
5 Bani funjɔnrɔgɔ caŋa ɲii li ɲɛ le,
ni gyɛɛgi ni ɲawɔɔrɔ caŋa ɲii.
Kafɔɔ Kilɛ, Kashɛn Keye yi Fɔɔ
Tɛhɛnɛ Baa Kilɛ wʼa lemu yaha nɔ fadaan li na ge,
lee lemu lʼa ɲa kashɛɛ li ni ge.
Kulo li maha maha kasɔrɔgɔ kʼa ja,
mɛkuguŋɔɔ ki wa duri na se fo faaboboyo yi na.
6 Elamu fiige ki wo kashɛnŋuu pʼa pu ŋmakɔyɔ yi lɔ le.
Pii wa kashɛn wotoriyo ni, pii di wa shɔnyɔ na.
Kiri kulo li wo kashɛnŋmuu pʼa pu wo ŋmasigiye yi lɔ.
7 Zheruzalɛm, mu wo fadaaŋaa ki nizaaŋaa ki bɛɛri kʼa ɲi
kashɛn wotoriyo ni shɔnyɔ na.
Pʼa gbegele yere na xɔ kashɛn kaa na ma kuɲɔjii li ɲɔ na.
8 Zhuda wo tadaŋa kʼa shɔ wu na.
Kee caŋa puga kemu pʼa byi na «taha puga» ge,
kee wo kashɛn yagboyo yi na yee bi daa.
9 Yee ya Dawuda kuloa li maha maha kasɔrɔgɔ ki kapahaya yi bɛɛri ɲa.
Yee ya lɔhɔ mara yaha nɔhɔdaan wo lɔhɔ tamaraga ki ni.
10 Yee ya Zheruzalɛmu piyɛyɛ yi tɔrɔ,
na yi ɲɔ cɛ, na ya ja yi ni kɔnhɔ yʼi la fara
kulo li maha maha kasɔrɔgɔ ki baraga ki na.
11 Yee ya lɔhɔ tamaraga ka yàa kasɔrɔyɔ shuun wu tɛ wu ni,
kɔnhɔ yʼi lɔhɔ tamaraga nilɛgɛ ki wo
lɔhɔ ki ko ɲɛri kee funŋɔ ni.
Ga wemu wʼa kii keree kii pye ge, yee ya ta wii wee yíri wɛ.
Wemu wʼa kii keree kii gbegele fo taatuunnɔ ni ge,
Yee ya ta wee niŋɛ le wɛ.
12 Kee caŋa Kafɔɔ Kilɛ, Kashɛn keye yi Fɔɔ
Tɛhɛnɛ Baa Kilɛ wʼa yee yiri, kɔnhɔ yʼi da mɛhɛɛ suu,
yʼi da tataara pyi, yʼi yi ɲuyɔ kuu, yʼi bɔrɔyɔ fàya† le.
13 Ga wii, yee ya funŋɔ taan na muguri.
Yee wa niiyɛ gbuu, na dubyaa kɔɔngi,
na xaara xaa, na duvɛn gbuu.
Yee wa yu na: «W’à li, wù da gbuu,
bani ɲiga na w’à da xhuub.»
14 Kashɛn Keye yi Fɔɔ Tɛhɛnɛ Baa Kilɛ ya yi jo
nɛ ɲuwii li tàan na: «Fo na shɛ yee gbo,
le katiibaana le wa da ga yafa yee mu wɛ.»
Kafɔɔ Kilɛ, Kashɛn Keye yi Fɔɔ Tɛhɛnɛ Baa Kilɛ wʼa jo mu.
Fanhafɔɔ wu puga ki ɲuŋɔfɔɔ wu wo kiiri we
15 A Kafɔɔ Kilɛ, Kashɛn Keye yi Kafɔɔ Tɛhɛnɛ Baa Kilɛ di nɛ pye: «Shɛ Sebina mu, fanhafɔɔ wu puga ki ɲuŋɔfɔɔ we, mʼa shɛ wu pye na:
16 ‹Mu yaaga kekɛ kʼi wa naha wɛ?
Ma sipya wekɛ wu wa naha, fo mu wʼa ma faŋa turi naha wɛ?
Mu wa faŋa turi na yɛri mayɛ ɲaha na faaya yi fugba wu ni.
Mu wa ma tasinnɛgɛ ki tɛni faaya yi ni.
17 Li wii, Kafɔɔ wu na ba ma wá taliige ni ni fanha ni.
Wu na ba ma migile saama na, na ma wá.
18 Ma ganha na gologolo ba gologologo ɲɛ wɛ,
na gaaŋi fiigbɔhɔ ka ni.
Wà ma da ba shɛ xhu, ma wotoriyo nizaaya yi na gori wà,
mu wemu wʼa bi shiige nɔni ma ɲuŋɔfɔɔ wu puga ki na ge.
19 Nɛ na ba ma kɔri yeege ma labye wu ni,
na ma yirige laha ma tayerege ki ni, Kafɔɔ wʼa jo mu.
20 Kee caŋa, nɛ na ba Ilikiya ja Eliyakimu yiri,
na kapyebye we.
21 Wee na nʼa da ba mu wo fanha fàya yi le,
na ma wo kirige ki taga wu pɔ,
na ma wo fanha ki kan wu mu.
Wu na ba bye Zheruzalɛmu kulo li shɛɛn
ni Zhuda fiige ki wo to we.
22 Nɛ na ba Dawuda wo saanra puga ki
kenikaan li le wu keŋɛ ni.
Wu ba gbura ki mugi, sipya wa shishiin wa da já ki tɔ wɛ.
wu ba gbura ki tɔ, sipya wa shishiin wa da já ki mugi wɛc.
23 Nɛ na ba wu kori ba tɔɔrɔ sikana ɲɛ wɛ,
lemu ya kori tawaga ni ge.
Wu na ba bye saanra koro nɔɔrɔ wuu wu to wu puga ki ni.› »
24 Wu puga shɛɛn pu bɛɛri, pu sipyigbɔɔ pu fara pu sipyitiilee pu na, pee bɛɛri wo tuguro ti na ba daha wu ɲuŋɔ ni, ba pu ma kuzhɔyɔ ni pɛyɛ taha mɛ tɔɔrɔ sikana na wɛ. 25 Tɛhɛnɛ Baa Kilɛ, Kashɛn Keye yi Kafɔɔ wʼa jo: «Kee caŋa, tɔɔrɔ sikana li lʼa kori tawaga ki ni ge, li na ba yolo, na li kɔɔngi, na li shan. Tuguro temu ti bi taha li na ge, tee ma gyɛɛgi, bani Tɛhɛnɛ Baa Kilɛ wʼa jo mu».