Babilɔni ya to
21
Kilɛ tuduro ma ɲaha tii suumɔ lɔhɔ ki ɲɔ ki wo sipoŋɔ ki na.Kafɛnaɲilegee ki wa na Nɛgɛvu koomɔ pu jii na doroo
torogana lemu na ge,
lee pagana li na pɛn wʼa da ba ba, na yìri siwaga fiige ka ni,
kee kemu ki ɲɛ funbɛɛnrɛ wo fiige ge.
2 Fyaara kagbɔɔ la wo kashɛɛ lʼa shɛ nɛ na.
Java fɔɔ wu wa na java pyi, kakabye wu wa na kakara pyi.
Elamu shɛɛn, yi shɛ do pu na!
Mɛdi shɛɛn, yi shɛ kulo li maha! Nɛ na ba shiinnɛ li bɛɛri xɔ.
3 Lee lʼa nɛ sɛrɛɛ ki pye ki na na yá fo xuuni.
Nɛ wa na gana ba layama ɲɛ wɛ.
Nɛ xakili wu bɛɛri wʼa wuregi fo na na pye di ya nuri wɛ.
Nɛ jaa wʼa sii yìri fo na na pye di ya ɲaa wɛ.
4 Nɛ funyaŋa wo wu ɲɛ, Nɛ fya fo na jɛlɛ.
Yakoŋɔ ɲibiire kafɛɛwana lemu nɛ bi sige kanha ge,
lee ya tɛrɛ ɲɛri nɛ mu fyaara kaa.
5 Pʼa yaligee ki gbegele, lee ya kasɛɛgɛ pyevɛɛ pu ta ɲìi na.
Lige ki wa na byi, gba wu wa na byi.
Kashɛn ɲuŋɔfɛɛ, yi yìri! Yi sinmɛ̀ le yi ŋmasigiye yi ni!
6 Bani Kafɔɔ ya nɛ pye na:
«Shɛ kasɛɛgɛ pyevɔɔ wa teŋɛ, wu ba lemu ɲa, wʼi lee jo.
7 Wu bu kashɛn wotoriyo ɲa
shɔnyɔ shuun shuun na pɔ yi na,
na kafaya dugivɛɛ, ni ɲɔhɔyɔ dugivɛɛ ɲa,
wu la fara wu kasɛɛgɛ ki na, wu pu kemɛ sɛɛri xuuni.
8 A kasɛɛgɛ pyevɔɔ wu xhuulo na:
«Kafɔɔ nɛ caŋa ɲii li bɛɛri pye na kasɛɛgɛ pyi
kashɛn ɲuŋɔ círi círi kasɔrɔgɔ ki fugba wu ni.
Nɛ piige ki bɛɛri pye toyereye na
kasɛɛgɛ tapyege ki ni.
9 Xhaya, ná wa wʼa ma wà ni kashɛn wotori ni.
Shɔnyɔ shuun yi wa wotori wu na. Wʼa mujuu waa na:
‹Babilɔni ya to! Babilɔni ya to!
Wu kilɛlɛɛ pu wo jaalaa pu bɛɛri pʼa tɔnhɔnɔ ɲiŋɛ ki naa!› »
10 Na sipyii, yee piimu pʼa sa
ba pʼa shinma sani shuu na-ɛ ge,
nɛ yemu logo Tɛhɛnɛ Baa Kilɛ, Kashɛn keye yi Fɔɔ,
Izirayɛli wo Kilɛ wu ɲɔ na ge, yee nɛ jo yee mu.
Kawagaa kiimu na ba nɔ Edomu na ge
11 Kilɛ tuduro ma ɲaha tii Dumab fiige ki na.
Mujugbɔɔ la lʼa nɔni nɛ na na foro Seyiric mara wu ni na:
«Kasɛɛgɛ pyevɔɔ we, tanɔyɔ yekɛ ni piige ki dʼa nɔ wɛ?
Kasɛɛgɛ pyevɔɔ we, tanɔyɔ yekɛ ni piige ki dʼa nɔ wɛ?»
12 A Kasɛɛgɛ pyevɔɔ wu jo: «Ɲiga ki na ba mugi,
ga piige ki bɛ na ba wɔ sanha.
Yi bi giin yʼi yegeŋɛ pye sanha, yi ki pye, yi kuri pa.»
Kawagaa kiimu na ba nɔ Arabi fiige ki na ge
13 Kilɛ tuduro ma ɲaha tii Arabi fiige ki na.
Dedan kulo li wo ɲɔhɔyɔ ɲaaɲaalaa pee,
yee na ba shɔn Arabi fiige ki sipoŋɔ ki ni
14 Tema fiige shɛɛn, yi lɔhɔ ko shɛ jiri waga fɛɛ pu na.
Yi yaligee lɔ yi shɛ kanfɛmɛɛ pu ɲuŋɔ círi.
15 Bani ŋmɔpara ɲaha na pʼa fe,
ŋmɔpara lemu lʼa kɔ wolo li forogod ni ge.
Sindaa kemu ya durugo pu fɛ ni ge,
ni kashɛn ki kafugo ki bɛlɛ we, yee ɲaha na pʼa fɛ.
16 Yemu Kafɔɔ ya jo nɛ mu ge, yee yi wa ye na: «Yee nigin tatorogo ni, yeeponɔ ŋmaha ŋmaha, Kedari fiige ki wo nɔɔrɔ wu bɛɛri na ba xhɔ fɛɛfɛɛ. 17 Kedari fiige ki wo kashɛnŋmuu sindaaya naŋmaya fɛɛ pu ni pu ɲɛhɛŋɛ ki ni, tuun watii wa da ba gori pu ni wɛ.» Tɛhɛnɛ Baa Kilɛ, Izirayɛli wo Kilɛ wu wʼa jo mu.