Ezayi 20

Ezayi ya pye Misira shɛɛn ni Ecopi shɛɛn wo kanhama pu ɲaha shɛshɛɛrɛ

Yee lemu Asiri fiige ki saan Sarigɔn ya wu kashɛn ɲuŋɔfɔɔ Taritan tun wʼa shɛ do Ashidɔdi kulo li na, na li co ge, 2 wee tuun wu ni Kafɔɔ ya jo ni wu tudunmɔ Amozi ja Ezayi ni, na wu pye na: «bɔrɔgɔ fàŋa† kemu kʼa pɔ ma na ge, shɛ kee sanha, mʼa ma tanhaya yi wolo ma tɔɔyɔ yi na.» A Ezayi di li pye mu, a wu tibii wo di ganha na ɲaari ɲidamyɛ na.

3 Wee tuun wu ni a Tɛhɛnɛ Baa Kilɛ di jo: «Nɛ kapyebye Ezayi tibii wo wʼa ɲaari ɲidamyɛ na fo yee taanri, lee na ba bye ɲaha shɛshɛɛrɛ ni ɲibaŋa keree ma taga Misira shɛɛn ni Etiyopi shɛɛn kaala. 4 Mu na Asiri wo saan wʼa da ba Misira shɛɛn ni Ecopi shɛɛn pii co na kari, pu lɛvɛɛ ni pu nɔhɔlɛɛ. Pu ceepilegee wuu na gari ɲidamyɛ na ni nafupilegee ni. Lee na ba bye Misira wo shiige. 5 Wee tuun wu ni piimu pʼa bi Ecopi fiige ki pye pu tadaŋa, na Misira fiige ki kaa taga na puyɛ pɛlɛ ge, pee jaalaa na ba yìri pʼa zhiige.»

6 Kee caŋa ke, ke fiige ke ki wa suumɔ lɔhɔ ki ɲɔ na ge, ki sipyii pu na ba jo na: «Sipyii piimu wèe bi pye wù tadaŋa, na fe pu fɛni, na dɛgɛ shaa pu mu, kɔnhɔ pʼi wù shɔ Asiri wo saan wu na ge, pee wo xɔgana li wa le mɛ! Wèe na ba bye dii na shɔ wɛ?»