Misira fiige ki wo kiiri we
19
Kilɛ tuduro na ɲaha tii Misira fiige na. Li wii, Tɛhɛnɛ Baa Kilɛ nidɛɛngɛ ki wa ɲanhaŋa na kemu tɔɔ lʼa wɛri ge, Misira fiige ki ni wʼa se. Misira fiige ki yapɛrɛɛ ki wa jɛlɛ wu ɲaha tàan. Misira shɛɛn pu jalaa wa yìri.2 «Nɛ na ba Misira shɛɛn pu sɔn wá puyɛ na.
Cebooloo na ba dunni ni puyɛ ni,
naɲiinɛɛ na ba dunni ni puyɛ ni,
kulogoo ki na ba yìri kiyɛ fɛni,
saanra ti na ba yìri tiyɛ fɛni.
3 Misira shɛɛn pu yatɛnyɛ na ba xhu.
Nɛ na ba pu kaɲɔwuugoo ki kyɛɛgi.
Pu na ba se na yapɛrɛɛ fɛɛ pee ni xulɛɛ yegevɛɛ pee
ni sigaanfɛɛ pee ni celɔbyii pu yegee.
4 Nɛ na ba Misira shɛɛn pu le ɲuŋɔfɛɛ pii keye ni
piimu ɲuyɔ yʼa waha ge.
Saan wemu wu ɲɛ ɲiɲaara baa ge, wee wu da ba pu mara.»
Kafɔɔ Kilɛ, Kashɛn Keye yi Fɔɔ Tɛhɛnɛ Baa Kilɛ wʼa jo mu.
5 Suumɔ lɔhɔ ki na ba xhɔ,
Nili gba wu lɔhɔ ki na ba xhɔ, wʼa waha.
6 Gbalaa pu lɔhɔyɔ yi na ba fɔnhɔ.
Misira fiige ki Nili gba wu
gbakeye yi lɔhɔyɔ yi na ba digi na waha.
Buugi we ni faɲa ki na ba fanhaŋa.
7 Ɲapurege wa xuu wemu bɛɛri ni gba wu ɲɔ ki na,
ni gba wu tasogoŋɔ ki ni suumɔ lɔhɔ ki na ge,
yara bɛɛri faa wa byi gba wu ɲɔ ki na ge,
yee bɛɛri na ba waha, kafɛɛgɛ na gari ni yi ni, yʼa juri.
8 Fyashaa pu na ba zhiin.
Piimu bɛɛri pʼa ŋmɛhɛŋɛɛ waa
Nili gba wu ni ge, pee na ba yamɛhɛɛ suu.
Piimu pʼa jɔlɔɔ waa lɔhɔ ki ni ge,
pee na ba shɔgɔ shɔgɔ.
9 Piimu pʼa lɛn fàya yi yari ge, pee na ba zhiige,
Cèe piimu pʼa lɛn wu saani ge,
pee ni wu shinvɛɛ pu fungɔnyɔ na ba wuregi.
10 Fiige ki gbeshinmɛɛ pu na ba dɔnhɔnɔ,
piimu pʼa saraa kapyeŋɛɛ ki pyi ge,
pee ɲahaya na ba danha.
11 Zowana kulo li wo ɲuŋɔfɛɛ pee,
nahanahanaa pu ɲɛ pii can na.
Farawɔn wo yɛrɛ kanvɛɛ fungɔngɔ fɛɛ
pu wo yɛrɛ li ɲɛ fungɔngɔ baara yɛrɛ.
Dii yee di da zɔɔ di Farawɔ pye na:
«Fungɔnyɔ fɛɛ jalaa wèe ɲɛ,
taashiinɛ li wo saannaa pu wo jalaa» wɛ?
12 Farawɔn, mii mu wo fungɔngɔ fɛɛ pu di ɲɛ wɛ?
Ayiwa, Kashɛn Keye yi Fɔɔ
Tɛhɛnɛ Baa Kilɛ ya kaa lemu gbegele
Misira fiige ki fɛni ge, na pu lee ɲaha jo ma mu mʼa li cɛ.
13 Zowan kulo li wo ɲuŋɔfɛɛ pʼa ɲɛri nahanahanaa.
Nɔfu wo ɲuŋɔfɛɛ pʼa puyɛ faanna.
Misira fiige ki gbaweye yi
ɲuŋɔfɛɛ pu pʼa Misira leni piinŋɛ ni.
14 Tɛhɛnɛ Baa Kilɛ ya ɲawɔhɔ wɔ pu na.
Pʼa Misira piinŋɛ ni pu kapyegee ki ni.
ba singba ma guruŋɔ guruŋɔ, na dugoo mɛ wɛ.
15 Sipya wa shishiin wa da ga já kaa la shishiin pye
Misira fiige ki ni sanha wɛ.
Ɲahagbaa fɔɔ wʼa da ga já wɛ, kadugo yíri wo wʼa da ga já wɛ,
sipyigbɔ wʼa da ga já wɛ, sipyitiimɛ bɛ wʼa da ga já wɛ.b
Misira shɛɛn pu bɛ na ba Kilɛ pɛlɛ
16 Kashɛn Keye yi Fɔɔ Tɛhɛnɛ Baa Kilɛ ba wu keŋɛ ki yirige, na ki ɲahara tuun wemu ni Misira shɛɛn pu fɛni. Pu na ba bye ba cèe ɲɛ wɛ, na fya fo na jɛlɛ. 17 Zhuda wo mara wu na ba bye fyaara yaaga nigbɔhɔ Misira fiige ki mu. Wu mɛgɛ ki ba yiri tuun bɛɛri ni Misira fiige ki ɲii na, Misira na vya xuuni, ma li kaɲuŋɔ pye lemu Kashɛn Keye yi Fɔɔ Tɛhɛnɛ Baa Kilɛ ya gbegele pu fɛni ge.
18 Kee caŋa ke kulogoo kaguro na ba da Misira fiige ki ni kiimu ya Heburuu shi jomɔ pu yu ge. Pee na ba gari Kashɛn Keye yi Fɔɔ Tɛhɛnɛ Baa Kilɛ wo mɛgɛ ki na. Lee kulo la mɛgɛ na ba bye na «Caŋa kuloc».
19 Kee caŋa ke saraya tawologo ka na ba yaha Tɛhɛnɛ Baa Kilɛ mɛgɛ na Misira fiige ki niŋɛ ki ni, na faaga beni wa sin Misira fiige ki kodɛhɛnɛ li tàan Tɛhɛnɛ Baa Kilɛ mɛgɛ na. 20 Lee na ba bye Kashɛn Keye yi Fɔɔ Tɛhɛnɛ Baa Kilɛ wo ɲaha shɛshɛɛrɛ ni wu sɛɛri Misira fiige ki ni. Pu kanhavɛɛ pu wo funbɛɛrɛ ba pu pye pʼa sipile wá Tɛhɛnɛ Baa Kilɛ mu, wu na ɲuŋɔ wolovɔɔ wa tun na pa pu mu, wee na ba yogo jo pu kaa na, na pu ɲuŋɔ wolo. 21 Tɛhɛnɛ Baa Kilɛ na ba wuyɛ shɛ Misira shɛɛn pu na, Misira shɛɛn pu bɛ na Tɛhɛnɛ Baa Kilɛ cɛ kee caŋa. Pu na ba wu pɛlɛ, na saraya ni mamama yakanya wo na wu kaan. Pu na ba ɲɔfaaya fari Tɛhɛnɛ Baa Kilɛ mu, na yi wo. 22 Tɛhɛnɛ Baa Kilɛ na ba Misira shɛɛn pu kpɔn, wu na ba pu kpɔn, ga wu na ba pu cuuŋɔ. Pu na ba guri ba Tɛhɛnɛ Baa Kilɛ mu. Wu na ba sɔɔ pu ɲɛrɛyɛ yi na, na pu cuuŋɔ.
23 Kee caŋa ke kogbɔɔ la na ba yìri Misira fiige ki ni na kari Asiri fiige ki ni. Asiri shɛɛn na ba se Misira ni, Misira shɛɛn bɛ di se Asiri fiige ki ni. Misira shɛɛn ni Asiri shɛɛn na ba binnɛɛ na Tɛhɛnɛ Baa Kilɛ pɛlɛ shiizhan.
24 Kee caŋa ke Izirayɛli na ba bye fiige taanri wogo, na fara Misira ni Asiri na, yee ma bye ɲiŋɛ ki wo duba fiiye. 25 Kashɛn Keye yi Fɔɔ Tɛhɛnɛ Baa Kilɛ na ba baraga le yi ni na jo: «Baraga ki tigi Misira na, nɛ wo sipyii pee! Baraga ki tigi Asiri na, nɛ wo keŋɛ labye we! Baraga ki tigi Izirayɛli na nɛ wo taa le!»