Damasi kulo li wo kiiri we
17
Kilɛ tuduro temu tʼa jo na ɲaha tii Damasi kulo li na ge.Li wii, Damasia da ba bye nige kulo wɛ,
wu na ba ɲɛri kataha.
2 Aroyɛri kulogoo ki sipyii pʼa fo, kulogoo ki niwaya yi wa.
Ki na ba ɲɛri yatɔɔyɔ tanahaya. Yi na ba sinnɛɛ wà,
sipya bɛ di wa da yi fya wɛ.
3 Efirayimu wo kashɛn ɲaha kɔn kɔn kulogoo
ki na ba xhɔ Efirayimu fiige ki ni.
Damasi bɛ wo saanra ti na ba xhɔ.
Siiri shɛɛn piimusamaa pu da ba gori ge, pee bɛ na ba xhɔ
ba Izirayɛli nagoo pu wo nɔɔrɔ wʼa xɔ xɔgana lemu na wɛ.
Kashɛn Keye yi Fɔɔ Tɛhɛnɛ Baa Kilɛ wʼa jo mu.
Lemu na ba bye Izirayɛli nagoo na ge
4 Kee caŋa Yakuba wo tirige shɛɛn pu nɔɔrɔ wu na ba jɛrɛ,
wu na ba shɔgɔ.
5 Li na ba bye ba alikama yalɔɔrɔ ɲɛ wɛ,
alikama kɔnvɔɔ wu ma alikama wu faari co wu keŋɛ ni,
na wu ɲakɔɔngɔ ki taga wu kɔɔn.
Li na ba bye ba pʼa alikama furi
Erefa shi shɛɛn pu wo fadaaŋa ki na wɛ.
6 Ga Izirayɛli nagoo piimu na ba gori ge,
pee na ba bye ba oliviye tige ɲɛ wɛ,
pʼa kemu ɲahara, na ki nagoo pu wo ge,
ba pyaap shuun kelee taanri ma gori mɛ
geye yi ɲidii li ni wɛ.
Kelee ba pyaa shishɛɛrɛ kelee kaguro ma gori mɛ
geye ya na wɛ, yee yemu yʼa sɛ xuuni ge.
Tɛhɛnɛ Baa Kilɛ, Izirayɛli wo Kilɛ wʼa jo mu.
7 Kee caŋa sipya na ba guri ba wu yaavɔɔ wu mu, wu na ba wu ɲaha ɲɛri Izirayɛli wo Kilɛ Fɛfɛɛrɛ wo wu yíri. 8 Wu keye yʼa saraya tawoloyo yemu yàa ge, wu da ba ɲaha tagi nige yee yíri wɛ. Benɛɛ piimu wʼa yàa yapɛrɛzhɔ Asera mu, na nudanga yawurire saraya tawoloyo yemu yàa wu kabɛhɛɛ ki na ge, wu da ba wii nige yee yíri wɛ.
9 Kee caŋa Izirayɛli wo kashɛn ɲaha kɔn kɔn kulogoo ki na ba bye ba katahaya ɲɛ wɛ, ma na jo ba sipyiire tʼa bi paa taashiinɛ li ni Izirayɛli nagoo pu ɲaha na, na tuu we ni faaya yi ɲidegee ki yaha wà wɛ. Izirayɛli bɛ wo kulogoo ki na ba ɲɛri mu takoloyo.
10 Bani mu Izirayɛli ya funŋɔ wɔ ma shɔvɔɔ Kilɛ wu na.
Faaga kemu ki ɲɛ mu wo baraga ki tataga ge,
mu ya ta ma funŋɔ yaha nidogo kee na wɛ.
Lee lʼa mu pye mu ya ma ɲidaan tiire kɛrɛyɛ shan,
na ɛrɛzɛn tiire nɔri kilɛlɛɛ piitiilee mɛgɛ na.
11 Caŋa kemu mu ya yi nɔri ge,
kee caŋa kiyɛ pyaa mu ya yi ɲa yi na lɛgi.
Ɲimuguro ti ɲisɔɔgɔ ki na, a yʼi fyɛɛnrɛ pye.
Ga yalɔɔrɔ ti da ba bye yaaga bɛ kee caŋa,
yama niguumɔ nixhɔbaama pu keŋɛ ni wɛ.
Kakabyii pu na ba gyɛɛgi
12 Eeyi, fiiye shɛɛn niɲɛhɛmɛɛ tunmɔ pʼa fòro!
Pee tunmɔ pu ɲɛ ba suumɔ lɔhɔ foo ɲɛ wɛ.
Fiiye shɛɛn niɲɛhɛmɛɛ foo lʼa fòro, ba logbɔhɔ foo ɲɛ wɛ.
13 Oo dɛ, Fiiye shɛɛn niɲɛhɛmɛɛ foo lʼa fòro
ba logbɔhɔ foo ɲɛ wɛ.
Ga Kafɔɔ ya pu fuguri, a pʼi baa gbii taliige ni.
Pu na ba gɔri wá ba kafɛɛgɛ ma yìri mɛ faaboboyo yi ni,
na ɲawaara ti lɔ kari wɛ, ba zanha kafɛɛgɛ
ma kafunnuŋɔ kurulo na gaaŋi mɛ wɛ.
14 Ba piige kʼa wɔ wɛ, fyaara ti ma bɛlɛ fo xuuni.
Ga yani ɲiga ki mugi ge, mʼa fɔ pu ni.
Sipyii piimu pʼa ma na wèe keŋɛ yaŋmuyɔ yi shuu wù na ge,
le lʼa da ba bye pu wo taa.
Pii pʼa wù keŋɛ yaŋmuyɔ yi kori ge,
le lʼa da ba bye pu wo taa le.