Mowabu fiige kʼa dɛgɛ shaa Zheruzalɛmu kulo li mu
16
Yi dubyapiye ya yaha shɛ gan saan wu mu.Yi yi co Sela ni,
yʼi doro siwaga ki ni,
yʼi shɛ yi kan wu mu Siyɔn faaboboŋɔ ki na.
2 Mowabu cèe pu na ba bye Arinɔ gba wu tɔɔyɔ fɛɛ
takɔngɔ ki ni ba zhazhibiye ɲɛ wɛ, yemu yʼa ɲaari ɲaari
na yeree ge, yemu yʼa kɔri yeege yi shiire ni ge.
3 Pu na ba yu: «Ee! Yi wù yɛri, yi bɛ fungɔngɔ ka na!
Yi yi wo ɲimɛ pu pii taga wù tɔ cafugo na, ba piige ɲɛ wɛ.
Yʼi wù kanfɛmɛɛ pu ŋmɔhɔ!
Yi ganha bu kanfɛmɛɛ pu nɔhɔ yaha wɛ!
4 Yi Mowabu wo kanfɛmɛɛ pu yaha pʼi shɛ diin yi mu.
Yi pye pu mu taŋmɔhɔŋɔ, yʼi pu tanha kakabye wu na.»
Bani ɲaa wu ɲɔ na ba yereŋɛ, kakara ti na ba yere.
Fiige ki kyɛɛgivɔɔ wu na ba juri.
5 Saanra koo li na ba baraga ta saama gbɔɔrɔ ni.
Ɲuŋɔfɔɔ wa na ba diin lee saanra koo li na,
na bye ɲɔmɛɛ fɔɔ Dawuda wo fàya puga ki ni.
Wu na ba kiiri wu kɔɔn can ɲuŋɔ tàan.
Wu na ba tɔɔyɔ wɛrɛŋɛ tiimɛ keree fɛni.
Zheruzalɛmu da já Mowabu shɛɛn tɛgɛ wɛ
6 Wèe ya Mowabu shɛɛn pu wo tabaara ti keree logo.
Pu tabaara tʼa pɛlɛ ye.
Wèe ya pu tabaara te ni pu kafupege ki keree logo,
ni pu ɲɔgbɔhɔ jomɔ pe, ni pu ɲuŋɔ baa ɲɔsanga jomɔ pe.
7 Lee na Mowabu shɛɛn wʼa mɛɛ suu Mowabu wuu na.
Pu bɛɛri pʼa sipyaa suu.
Yʼa tataara mɛhɛɛ suu, yʼi da zhiin
Kiri-Arɛsɛti kulo li wo ɛrɛzɛn tidaya yi kaa na.
8 Ɛshibɔn kulo li kɛrɛyɛ yʼa wari.
Fiiye yi wo ɲuŋɔfɛɛ pʼa Sibima kulo li wo
ɛrɛzɛn tiye yi geye yi kɛgi kɛgi.
Yee ɛrɛzɛn tiye yi geye yi bi fɔ fo na shɛ nɔ Yazɛri kulo li ni,
na gari fo na shɛ jé siwaga ki ni.
Yi geye yi bi fɔ fo na shɛ Suumɔ Loxuko ki kɔn ɲɛri.
9 Lee na, nɛ bɛ na ba mɛɛ suu ni Yazɛri shɛɛn ni shiizhan
Sibima wo ɛrɛzɛn kɛrɛyɛ yi kaa na.
Nɛ na ba mu Ɛshibɔn kulo le
ni mu Eleyale kulo li fyɛnmi ni ɲɛsinmɛ ni,
bani yee wo fundanga mujoŋɔɔ kʼa xɔ, kee kiimu ki ɲɛ
shinma yalɔɔrɔ ni ɛrɛzɛn yalɔɔrɔ mujoŋɔɔ ki ge.
10 Fundanga ni muguri ya xɔ yee wo tiire kɛrɛyɛ yi ni.
Kadahara ni fundanga mujoŋɔɔ ya fòro nige
ɛrɛzɛn tiire kɛrɛyɛ yi ni wɛ.
Ɛrɛzɛn ya forogi nige ɛrɛzɛn lɔhɔ tawologo ki ni wɛ,
bani nɛ fundanga mɛxuguŋɔɔ ki bɛɛri yereŋɛ.
11 Lee wuu na nɛ zɔ wʼa tanha Mowabu wuu na,
ba koni mɛɛ ɲɛ wɛ.
Nɛ zɔ wʼa zhiin nɛ funŋɔ ni Kiri-Ɛrɛsi wuu na.
12 Mowabu shɛɛn wa puyɛ kana tawaga ni
na duri na se boboyo yi na pu yasunyɔ yi takanya yi ni.
Pʼa se na pu yapɛrɛɛ ki ɲɛɛri pu yapɛɛgbaya yi ni,
ga lee la shishiin wa da yaaga ɲɔ wɛ.