Tɛhɛnɛ Baa Kilɛ na ba Izirayɛli nagoo pu kuruŋɔ na pa sanha pu wo fiige ki ni
14
Lʼa fiinŋɛ na Tɛhɛnɛ Baa Kilɛ na ba ɲuŋɔ ɲaariYakuba wo tirige shɛɛn pu na,
wu na ba guri Izirayɛli nagoo pu shɔɔnri lɔ sanha,
na pu kuruŋɔ na pa pu wo fiige ki ni.
Nabuun na ba nɔrɔ Yakuba wo puga ki na
na diin pu mu.
2 Fiiye yatii shɛɛn na ba Izirayɛli nagoo pu lɔ,
na gari ni pu ni Izirayɛli fiige ki ni.
Izirayɛli nagoo pu na ba yee fiiye ye shɛɛn pu ɲɛri na pye
bulonamaa ni bulozhaa
Tɛhɛnɛ Baa Kilɛ wo ɲiŋɛ ki na.
Sipyii piimu pʼa bi Izirayɛli nagoo pu co na pye buloo ge,
pee na ba bye Izirayɛli nagoo pu wo buloo.
Piimu pʼa bi pu fanha ki digi pu na ge,
pu na ba pee mara.
Babilɔni saan wu wo kiiri we
3 Ayiwa Izirayɛli nagoo, yee wo kanhama pe, ni yee wo ɲaa we,
ni yee wo bulooro kapyewagaa ki nidorogo na,
kee kiimu pʼa bi taha yi na ge,
caŋa ke Tɛhɛnɛ Baa Kilɛ da ba ŋmɔnɔ kan yi mu ge,
4 yʼi ke zagunnunɔ ke cɛɛ wá Babilɔni wo saan wu na na:
«A sipyigagaŋa ki wo caŋa ɲii lʼi bye dii na xhɔ wɛ?
A wu fanhakuuŋɔ kʼi bye dii na xhɔ wɛ?
5 Tɛhɛnɛ Baa Kilɛ ya sipikuuŋɔ ki wo pubiin li kɛgi.
Wʼa sipyigagaŋa ki wo fanha pubiin li kɛgi.
6 Wu loyire li kafugo kʼa bi wu pye wʼa taha yaha
fiiye yatii shɛɛn pu na na gbuun gbee.
Wʼa bi sipyii pu mara ni loyire ni,
na ɲaa woni pu na gɔnlaha baa.
7 Fiige ki bɛɛri kʼa ŋmɔnɔ ni ɲaɲiŋɛ ta nimɛ.
Sipyiire ti wa na fundanga mujoŋɔɔ waa.
8 Ali sipɛrɛ tiye yi bɛ ya funŋɔ taan mu wo do wu wuu na.
Liban sɛdiri tiye yi wa yu na:
‹Mu da do ge,
tiire kɔnvɔɔ wa shishiin sanha ba nige wèe fɛni di ba gbɔn wɛ.›
9 «Xuu kulo li wa na gbegele lʼi ba ma ɲuŋɔ círi.
Mu wuu na lʼa xuu pu ɲɛni,
piimu bɛɛri pʼa pye sipyigbɔɔ ɲiŋɛ ki na ge.
Lʼa fiiye yi wo saannaa pu bɛɛri pye
pʼa yiri na laha pu saanra korogoo ki na.
10 Pu bɛɛri na ba ma pyi:
‹A go mu bɛ wo fanha kʼa xɔ mɛ ba wèe ɲɛ wɛ,
mu bɛ ya pye ba wèe ɲɛ wɛ.
11 Pʼa ma tabaara ti tirige xuu kulo ni ni ma konɔyɔ mɛhɛɛ ki ni.
Yanɔgɔrɔ ti ɲɛ ma kajaŋa, fyɛnrɛ di ɲɛ ma fatɔŋɔ.›»
12 Wɔrɔcanhana, ɲimuguɲɔ wɔrɔ,
dii mu dʼa yìri fugba wu ni na pa do wɛ?
Mu wemu wʼa bi se ta fiiye yatii shɛɛn pu na ge,
Pʼa ma tirige shan ɲiŋɛ na.a
13 Mu bi yi yu mayɛ funŋɔ ni na:
«Nʼa da dugi fugba we ni,
di shɛ na wo saanra koo li sin Kilɛ wo wɔrɔɔ ki fugba wu ni,
di shɛ diin faaboboŋɔ ki na, kilɛlɛɛ pu wo ɲuŋɔ tacirige ki ni,
fo suumɔ kulo kacɛ ki na,b
14 Nɛ na ba dugi zhɛ ɲahaya yi fugba wu ni.
Nɛ na ba bye ba Fugba lii lii Kilɛ wu ɲɛ wɛ.»c
15 Ga pʼa mu tirige xuu kulo ni,
wecogoŋɔ ki nɔhɔdaan.
16 Piimu pʼa ma ɲaa ge, pee na ɲii shan ma na,
na ma kemɛ sɛɛri, na jo na:
«Ná wemu wʼa bi ɲiŋɛ ki pye ki na jɛlɛ,
na fiiye yi wo saanra ti ɲahara ge, wee wu ɲɛ we ya?
17 Wee wemu wʼa bi ɲiŋɛ ki bɛɛri ɲɛri na byi siwaga,
na kulogoo ki jii ge.
Na sipya yeege kaso ni, na ma yaha mʼa se puga, wu bi lee pyi wɛ.»
18 Fiiye yi wo saannaa pu bɛɛri, pee bɛɛri pʼa sinniŋɛ
gbɔɔrɔ sinniŋɛgana na, puyɛ pyaa faya funŋɔ ni.
19 Ga mu wi ge, kpɛɛngɛ na pʼa mu wá,
na ma sanha lii ma faŋa ki na,
ba tige geŋɛ tanhaŋa wogo ɲɛ wɛ.
Pʼa mu tɔ ni sipyixuyo ni, ŋmɔpara ya piimu gbo,
a pʼi pu wá wege ni faakagereye ɲɛ kemu ni ge.
Sipyii ya gbo wemu tanhana ni tɔɔyɔ ni ge,
wee mu ɲɛ.
20 Mu da ga le faŋa ni ba saannaa pusamaa ya pye wɛ,
bani mu ya ma wo fiige ki kyɛɛgi, na ma sipyii pu gbo.
Sipya kunni da ga sipyikuuŋɔ wo tirige shɛɛn pu kaa jo
nige bada wɛ.
21 Yi jalaa pu wo gbo gbo keree gbegele
pu tii pu wo kakuuŋɔɔ ki wuu na,
kɔnhɔ pu ganha bu ba yìri pʼi ɲiŋɛ ki bɛɛri co,
pʼi koŋɔ ki bɛɛri tɔ ni kugbɔhɔɔ ni wɛ.
22 Kashɛn Keye yi Fɔɔ Tɛhɛnɛ Baa Kilɛ ya jo: «Nɛ na ba yìri pu kaa na, di Babilɔni mɛgɛ ke, ni wu nagoo ni wu tirige shɛɛn pusamaa bɛɛri ɲuŋɔ tugo.» Tɛhɛnɛ Baa Kilɛ wʼa jo mu. 23 «Nɛ na ba wu pye tinnirigee tatɛɛngɛ. Nɛ na ba wu ɲɛri cangbɔhɔ. Nɛ na ba Babilɔni pɔ ni bɔɔngɔ kapeŋɛ ni.» Kashɛn Keye yi Fɔɔ Tɛhɛnɛ Baa Kilɛ wʼa jo mu.
Asiri shɛɛn wo kiiri we
24 Kashɛn Keye yi Fɔɔ Tɛhɛnɛ Baa Kilɛ ya kaa na:
«Nakaara baa nɛ wo fungaa li na ba foro,
nɛ kaa lemu teŋɛ ge,
lee na ba doro li torogana na.
25 Nɛ na ba Asiri fiigi shɛɛn pu kyɛɛgi na wo fiige ki ni.
Nɛ na ba wu forogi na tɔɔyɔ yi ni na wo faaboboyo yi na.
Nɛ na ba pu wo zhu wu laha na sipyii pu katiye yi ni,
na pu wo tuguro ti laha na sipyii pu kapaya yi na.»
26 Kaa lemu lʼa teŋɛ ɲiŋɛ ki bɛɛri kaa na ge, lee li ɲɛ le.
Wʼa wu keŋɛ ki yirige fiiye yatii shɛɛn pu bɛɛri fɛni.
27 Kashɛn Keye yi Fɔɔ Tɛhɛnɛ Baa Kilɛ wʼa li ɲɔ wolo
wu kii keree kii pye. Jɔgɔ wu da já ki fiin wɛ?
Wu keŋɛ kʼa yirige. Jɔgɔ wu da já ki yereŋɛ wɛ?
Filisiti shɛɛn pu wo kiiri we
28 Saanna Akazi ya xu yee lemu ge,
Lee yee le te Kilɛ tuduro te ya jo nad:
29 Filisiti fiige ki niboŋɔ ki bɛɛri,
ma ganha bu funŋɔ taan na ma kpɔn kpɔn pubiin lʼa kɛɛgi-i dɛ!
Bani mɛrɛŋɛ kʼa da ba foro wɔxugo ki ni.
Kee mɛrɛŋɛ ki na ba wɔkuuŋɔ ka se
kemu ya yìri kapaya na gee.
30 Wee tuun wu ni
kanhama fɛɛ pu bɛɛri wo kanhama fɛɛ pu na ba pu ɲɔlige taa,
funmɔ fɛɛ pu na ganha na ŋmɔni ɲaɲiŋɛ na.
Ga nɛ na ba xuugo taga mu wo tirige shɛɛn pu gbo.
Piimusamaa pu da ba gori ge, pee bɛɛri na ba gbo.
31 Kulo li tajege ke, ta mɛɛgɛ waa.
Kulo le, ta sipyaa suu.
Filisiti fiige ki bɛɛri fanha ki xɔ!
Bani wurege ka wa yìri suumɔ kulo kacɛ ki na na ma,
shɛn nigin bɛ ya fɔ kee kashɛn keŋɛ ki sipyii pu ni wɛ.
32 Wèe ma ɲɔshɔɔrɔ tekɛ kan kee fiige ke wo tudunmɔɔ pu mu wɛ?
Na Tɛhɛnɛ Baa Kilɛ wʼa Siyɔn kulo li sin.
Na wu sipyii pu wo la baa fɛɛ pu na ba taŋmɔhɔŋɔ ta wà.