Babilɔni wo kiiri we
13
Kilɛ tuduro temu tʼa jo Amɔsi ja Ezayi muna ɲaha tii babilɔni na ge.
2 Kafɔɔ ya jo: «Yi jurɔjɔ wu sin faaboboŋɔ ɲuŋmaa wogo ka na,
yi da mujoŋɔɔ waa pu mu, yi da keye taga yʼa pu kani,
kɔnhɔ pʼi ba jé sipyigbɔɔ pu wo tajege ki ni.
3 Nɛ ɲɔmɛɛ kan na wo sipyii pu mu,
nɛ piimu yaha nayɛ yahama ni ge.
Nɛ na wo kashɛn naŋmaya yi bɛ yiri,
pee piimu pu da ba nɛ wo loyire li kɔri,
nɛ wo ɲuyirige kʼi ɲɛ pu mu fundanga ge.»
4 Tunmɔ nigbɔ pʼa fòro faaboboyo yi na ba shi niɲɛhɛmɛ tunmɔ ɲɛ wɛ.
Saanra niɲɛhɛrɛ wo tunmɔ ni fiiye niɲɛhɛyɛ yemu ya yiyɛ pinnɛ ge,
yee wo tunmɔ.
Kashɛn Keye yi Kafɔɔ Tɛhɛnɛ Baa Kilɛ wʼa wu kashɛn keye yi pɛrɛgi,
wu yi gbegele kashɛn kaa na.
5 Fiitɔɔngɔ ka ni pʼa yìri na pa, na yìri fo ɲiŋɛ ke tɛhɛnɛ le na.
Tɛhɛnɛ Baa Kilɛ ni wu loyire li kɔrivɛɛ pu na ba fiige ki bɛɛri kyɛɛgi.
6 Yʼa yamɛgeye waa, bani Tɛhɛnɛ Baa Kilɛ wo caŋa kʼa tɛɛŋɛ.
Kʼa ma na yìri Se Bɛɛri Fɔɔ wu yíri.a
7 Lee wuu na sipyii pu keye yi bɛɛri fanha na ba xhɔ,
sipyire ti bɛɛri jaalaa na ba gɔn.
8 Pu na ba fyaguunɔ fya, yama ni ɲaa na ba do pu ɲuŋɔ ni.
Pu na ba puyɛ nahana nahana ba layama ɲɛ wɛ.
Pu fyaara wuu na ba puyɛ wii, li na ba pu ɲìi ɲaaŋa ba na ɲɛ wɛ.
9 Li wii, Tɛhɛnɛ Baa Kilɛ wo caŋa kʼa ma,
caguuŋɔ ki kunni, wu kafugo ke ni wu loyire niguunɔ li wo caŋa ke.
Wu na ba ɲiŋɛ ki ɲɛri na pye ba siwaga ɲɛ wɛ,
na kakuubyii pu kyɛɛgi fo na pu xɔ.
10 Bani wɔrɔɔ kee ni wɔrɔɔ kuruyo yi wa da ba kpɛɛngɛ yeege wɛ.
Ɲibiige na ba jé caŋa ki ni fo ki foroduun wu ni.
Losuu wa da ba bye yeŋɛ ki na wɛ.b
11 Nɛ na ba koŋɔ sipyii pu wo kuumɔ pu foo tɔ pu mu,
di sipyikuuyo yi wo tiibaara ti foo tɔ pu mu.
Nɛ na ba tabaara fɛɛ pu wo tabaara ti xɔ,
di sipyigagaya yi wo tabaara ti shan.
12 Sipyiyawyii ɲama na ba bɛn na toro sanni nidiimɛ tàan.
Adamapya ɲama na ba bɛn na toro Ofiiri fiige ki wo sanni wu tàan.
13 Lee wuu na nɛ na ba fugba wu ɲahara.
Ɲiŋɛ ki na ba jɛlɛ ki serege ki na,
Kashɛn Keye yi Kafɔɔ Tɛhɛnɛ Baa Kilɛ wo loyire li keŋɛ ni,
caŋa kemu wu da ba wu loyire niguunɔ li shɛ ge.
14 Wee tuun wu ni wa bɛɛri na ba fe na se wu shi shɛɛn yíri,
wa bɛɛri na ba fe na se wu fiige yíri
ba pu ma kaafa nɔhɔ niinɛ wʼa ganha na fe paagana le mu na wɛ,
ba yatɔɔpya ma bye mɛ nahavɔɔ ɲɛ wu na wee di pu kemɛ pinnɛ wɛ.
15 Piimu bɛɛri bu da, pu na ba ŋmaya taga pee su na furi,
piimu bɛɛri bu jo, pu na ba pee gbo ni ŋmɔpara ni.
16 Pu na ba pu pubinŋɛɛ ki sɛlɛ ɲiŋɛ ni
fo na pu tɔnhɔnɔ puyɛ pyaa ki ɲii na.
Pu na ba pu piyɛyɛ yi funŋɔ yaŋmuyɔ kuu,
na ganha na pu cèe pu shaan.
17 Li wii, nɛ na ba Medi fiige shɛɛn pu sɔn wá pu na.
Pee wa wii warifyɛn yíri wɛ, sanni bɛ di ɲɛ pu mu yaaga wɛ.
18 Pu sindaaya yi na ba lɛvɛɛ pu shaan ɲiŋɛ ki na.
Pu da ba ɲuŋɔ ɲaari pubinŋɛɛ bɛ na wɛ.
Ɲiɲara ɲii da ba bye pu mu nɔhɔpiire shizhaa na wɛ.
19 Babilɔni wemu wu ɲɛ fiiye yi bɛɛri wo fiige nizaaŋa ge,
wee wemu wu ɲɛ Babilɔni shɛɛn pu wo nɔɔrɔ we
ni pu wo tabaara ti kaɲuŋɔ ge,
wu na ba bye ba Kilɛ ya Sodɔmɛ kulo le ni Gɔmɔɔri kulo li kyɛɛgi
kyɛɛgigana lemu na wɛ.c
20 Sipya bɛ da ga ba diin wu ni nige wɛ,
wu niwaga na ba gori yaha wà tuun bɛɛri ni fo gbee.
Ɲaaɲaama wa shishiin da ga ba wu fàya puga sin wu ni nige wɛ,
yapɔrɔnahamaa da ga ba pu yapɔrɔyɔ sinniŋɛ wà nige wɛ.
21 Ga sige yaŋmuyɔ yi da ba shuun wà.
Totoroyo na ba pu piyɛyɛ yi ɲi.
Kɔnɔsɔgoyo na ba shɛ diin wà.
Sige sikaa na ba sirani sirani wà.d
22 Sadoyo na ba mɛhɛɛ suu pu saanra piyɛyɛ yi funŋɔ ni.
Sige poyo na ba mɛhɛɛ suu pu pusaaya yi funŋɔ ni.
Babilɔni taaxɔ lʼa tɛɛŋɛ,
yaaga wa da vara nige wu caŋa ɲɛhɛɛ ki na wɛ.