Zhese wo tirige shɛn saan nivomɔ we
11
Ayiwa, gevoŋɔ ka na ba fun voro Zhese wo tiɲuŋɔ ki na.aMaraa wa na ba fun na foro wu niye yi na.
2 Tɛhɛnɛ Baa Kilɛ wo Munaa li na ba gori yaha wu na.
Lee Munaa li na ba wu kaan fungɔngɔ fɛɛrɛ ni kaɲahacɛnɛ
na yɛrɛ kaan wu mu, na fanha leni wu ni,
na Tɛhɛnɛ Baa Kilɛ wo jɛ we
ni wu ɲìi fyaara fungɔngɔn kaan wu mu.
3 Tɛhɛnɛ Baa Kilɛ ɲìi fyaara na ba dan wu ni.
Wu da ba kiiri kɔɔn na saha ni wu keree ɲagana ni wɛ.
Wu da ba keree shɔɔnri
na saha ni wu keree logogana ni wɛ.
4 Ga wu na ba la baa fee pu wo kiiri wu kɔɔn ni tiimɛ ni,
na fiige ki ɲaafɛɛ pu wo keree ki shɔɔnri ni tifire ni.
Wu na ba ɲiŋɛ ki kpɔɔn ni wu jomɔ pu ni ba pubiin ɲɛ wɛ,
na sipyikuuyo gbo ni wu ɲɔ kafɛɛgɛ ni.b
5 Tiimɛ na ba bye wu mu ba kirige ɲɛ wɛ,
ɲɔmɛɛ fɛɛrɛ na ba bye wu mu ba kirige ɲɛ wɛ.c
Alijinɛ wu wo shɛmɛ pe
6 Wee tuun wu ni sige ponɔ ni dubyapuge na ba bye tiinɲiinɛɛ.
Shɛn ni sigkapuge na ba sinnɛɛ yiyɛ taan.
Nupuge ni cɛnripuge na ba li shizhan.
Nɔhɔcɛɛrɛ na ba yi naha.
7 Niiŋɛ ni yacoŋɔ Urusi na ba li yiyɛ tàan,
yi nagoo na ba sinnɛɛ puyɛ kabanugo.
Cɛnrɛyɛ na ba ɲà li ba nù ɲɛ wɛ.
8 Pubinnɛ na ba xhɔnhɔni matɔn wii ɲɔ na.
Pya wemu ɲɔ ya wolo jire ni ge,
wee na ba wu keŋɛ le mɛrɛŋɛ wege ni.
9 Kakuunɔ kelee kakara da ba byi nige
nɛ wo fɛfɛɛrɛ faaboboŋɔ ki bɛɛri na wɛ,
bani ɲiŋɛ ki na ba ɲi Tɛhɛnɛ Baa Kilɛ wo lajɛ wu na,
ba suumɔ lɔhɔ ya ɲi mɛ wɛ.d
Kilɛ na ba wu sipyii pu ɲuŋɔ wolo
10 Kee caŋa ke Zhesee wo niŋɛ ki na ba bye ba jurɔjɔ ɲɛ wɛ,
wemu ya yirige fiiye yi wo shi wu mu ge.
Fiiye yatii shɛɛn na ba wu shaa.
Wu tatɛɛngɛ ki na ba bye ni nɔɔrɔ ni.f
11 Kee caŋa ke Kafɔɔ na ba wu keŋɛ ki yeege wu tɔɔɲii shuun wuu li ni,
na wu sipyii pusamaa ɲuŋɔ wolo,
pee piimusamaa pu da ba gori Asiri fiige ni Misira fiige ki ni ge,
ni Patɔrɔsi kulo le ni Kushi kulo li ni ge,
ni Elamu kulo le ni Shinari kulo le,
ni Amati kulo le ni Suumɔ lɔhɔ niŋɛ takpiiye yi na ge.
12 Wu na ba jurɔjɔ wa yirige fiiye yatii shɛɛn mu,
Izirayɛli nagoo piimu pʼa bi co kari ge, na pee kemɛ pinnɛ.
Zhuda nagoo piimu pʼa caaga ɲiŋɛ ki kabaya shishɛɛrɛ wu na ge,
wu na ba pee bɛɛri sha na pu pinnɛ.
13 Wee tuun wu ni Efirayimu wo ɲiizhaga ki na xhɔ,
Zhuda wo pɛɛn pu na gyɛɛgi.
Efirayimu da ga ba ɲiizhaga pyi nige ni Zhuda ni wɛ,
Zhuda bɛ di wa da ba Efirayimu kɔ nige wɛ.
14 Pu na ba binnɛ na shɛ do Filisiti shɛɛn na caŋatomɔ pu ni.
Pu na ba Kilɛ-nɔhɔ sipyii pu keŋɛ yaŋmuyɔ yi kuu shiizhan.
Edomu shɛɛn ni Mowabu nagoo pu na ba bye pu fanha ki nɔhɔ ni.
Amɔ nagoo pu na ba guu pu mu.
15 Tɛhɛnɛ Baa Kilɛ na ba Misira suumɔ loɲiga ki waha.
Wu na ba wu keŋɛ ki yaaŋa Efirate gba lɔhɔ ki ɲuŋɔ ni,
na wu ɲɔ kafɛɛgɛ taga ki taa na pye dugorogoo gbarashuun
fo sipyii na já da kee kɔɔn na ɲɛri
ni pu tanhaya ni.
16 Wu sipyii piimusamaa pʼa kori Asiri fiige ki ni ge,
pee na ba koo ta na foro, ba Izirayɛli nagoo pʼa bi koo ta taashiinɛ li ni
pu cavorogo ke Misira fiige ki ni wɛ.