Zhuda wo ɲahagbaa fɛɛ pu wo kiiri we
10
Bɔɔngɔ ki ɲɛ yee wogo,yee piimu pʼa tiibaara ti wo saliyaa pu teŋɛɛ,
na kodorogoo niguuŋɔɔ ki kani ge.
2 Yee wa lee pyi kɔnhɔ yi ganha ba kaɲii kaan funmɔ fɛɛ pu mu wɛ,
yʼi da nɛ sipyii pu wo la baa fɛɛ pu wo tiimɛ pu shuu pu na,
Naxhugoshaa pʼi bye yi kashɛn naafuu,
yʼi da cirimɛɛ pu keŋɛ yaŋmuyɔ yi shuun pu na.
3 Yee kakuuyo yi foo li ba da dɔ caŋa kemu,
caŋa kemu bɔɔngɔ da ba do yee ɲuŋɔ ni na yìri taliige ni ge,
lekɛ yee di da ba bye wɛ?
Jɔgɔ yíri yee di da ba baa zhɛ na wu yi tɛgɛ wɛ?
Mii yee di da ba yi wo nɔɔrɔ wu yaha wɛ?
4 Nibyii latii wa nige yee mu wɛ, fo na buri yɛ ni kasolemɛɛ pu ni,
kelee na to ɲiŋɛ ke na ni xuu pu ni.
Lee bɛ na, wu luu li sanha ɲiŋɛ wɛ,
wu keŋɛ ki wa yirige yaha sanha.
Bɔɔngɔ ki ɲɛ Asiri shɛɛn wogo
5 Bɔɔngɔ ki ɲɛ Asiri shɛɛn pu wogo,
pee piimu pu ɲɛ nɛ wo loyire pubiin li ge.
Pubiin le li wa pu keŋɛ ni ge, lee ɲɛ nɛ wo loyire niguunɔ le.
6 Kilɛ ɲìi fyaara ɲɛ shi wemu ni wɛ, nɛ ma pu yaha kari wee fɛni.
Shi wemu wʼa na luu yirige ge, nɛ ma pu tun kari wee fɛni,
kɔnhɔ pʼi shɛ pu yaŋmuyɔ yi kuu, pʼi pu naafuu wu faari,
pʼi pu forogi pu tɔɔyɔ yi ni ba kakuutoroyo ɲɔrɔgɔ ɲɛ wɛ.
7 Ga Asiri shɛɛn pu ya ta li ɲa lee ɲagana li na wɛ.
Kee ya ta pye Asiri shɛɛn pu wo fungɔngɔ wɛ,
lee ya pye pu fungɔngɔ wɛ,
bani pu funŋɔ kʼa pye na kakara pyi,
na shi niɲɛhɛmɛ kyɛɛgi fɛɛfɛɛ.
8 Bani pʼa yu na:
«Ta wèe wo kashɛn ɲuŋɔfɛɛ pu bɛɛri ɲɛ mɛ saannaa wɛ?
9 Ta wèe ya Kalino kulo li pye ba Karikemishi kulo li ɲɛ-ɛ wɛ?
Na Amati kulo li pye ba Aripadi kulo li ɲɛ-ɛ wɛ?
Na Samari kulo li pye ba Damasi kulo li ɲɛ-ɛ wɛ?
10 Ni wèe ya já keŋɛ taha yapɛrɛɛ fiiye yi wo saanra ti na,
yee yemu wo yasunyɔ yʼa ɲɛhɛ na toro
Zheruzalɛmu ni Samari woyo yi tàan ge,
11 Wèe ya lemu pye Samari ni wu yasunyɔ yi na ge,
ta wèe da já lee ninunɔ pye Zheruzalɛmu ni wu yasunyɔ yi na wɛ?»
12 Ayiwa, Kafɔɔ ba ba wu wo nibyii li bɛɛri pye fo na li ɲɔ fa Siyɔn wo faaboboŋɔ ke ni Zheruzalɛmu ni tuun wemu ni, wʼa jo na: «Nɛ na ba yìri Asiri saan wu fɛni, na kiiri kɔn wu zɔ wu tabaara fungɔngɔ ke, ni wu ɲɛgbɔɔ wiigana li na. 13 Bani wʼa jo na:
‹Na wo keŋɛ ki fanha ni nɛ le pye,
nɛ wo fungɔngɔ fɛɛrɛ tʼa li pye, bani shizhiimɛ fɔɔ nɛ ɲɛ.
Nɛ shi niɲɛhɛmɛ wa wo kodɛhɛŋɛɛ yirige laha wà,
na pu naafuu wu shɔ pu na.
Ba naŋmaga ɲɛ wɛ,
nɛ sipyii pii tirige laha pu wo saanra korogoo na.
14 Nɛ keŋɛ kʼa shi wa wo naafuu kuu,
ba sipya ma shazhira shiire lɔ mɛ wɛ.
Nɛ ɲiŋɛ ki naafuu wu bɛɛri taalabulo,
ba sipya ma cɛrɛɛ nizhanwagaa kuu mɛ wɛ.
Sipya bɛ ya kapaŋa kpɔn wɛ,
sipya bɛ ya wu ɲɔ mugi, walima na mii su wɛ.›»
15 Ta kacerege na já kiyɛ pɛlɛ
na toro ki baari pyevɔɔ tàan ya?
Ta ɲaha na já wuyɛ pɛlɛ
na toro wu baari pyevɔɔ taan ya?
Ma na jo ba pubiin ma li yirigevɔɔ luu na ɲɛri wɛ,
ma na jo ba pubeɲuguri ma yaaga yirige mɛ, kemu ɲɛ tige-e wɛ.
16 Lee wuu na Kafɔɔ Kilɛ,
Kashɛn Keye yi Fɔɔ Tɛhɛnɛ Baa Kilɛ na ba shɔgɔrɔ wá
Asiri fiige ki wo kashɛnŋmɔ-mɔhɔbahayaa yi na.
Na ka na ba shɔ wu nɔɔrɔ wu na,
na wu sòrogo ba naɲiŋɛ ɲɛ wɛ.
17 Izirayɛli wo kpɛɛngɛ ki na ba bye na,
wu Fɛfɛɛrɛ Kilɛ wu na bye naɲiŋɛ.
Kee na ba Asiri xhuyo tiye ye
ni wu xhuyo tahaya yi sòrogo, caŋa ɲii nigin funŋɔ ni.
18 Ki na ba wu taha ke ni wu tiire kɛrɛyɛ yi nɔɔrɔ wu sòrogo.
Li na ba bye ba yama fɔɔ ɲɛ wɛ, wemu wo yama pʼa wu shɔgɔ ge.
19 Tiye yemu na ba gori wu taha ki tiire ti ni ge,
yee ɲɔ na ba jɛrɛ, ali nɔhɔcɛrɛɛ bɛ na ba já yi tɔrɔ, na yi ɲɔ cɛ.
Izirayɛli nagoo piimu pʼa shɔ ge
20 Kee caŋa ki na, Izirayɛli nagoo pusamaa, ni Yakuba wo puga ki sipyii piimu pʼa ta shɔ ge, pee da ba pu kpɔnvɔɔ wu pye nige pu tadaŋa wɛ. Ga pu na ba Tɛhɛnɛ Baa Kilɛ, Izirayɛli wo Fɛfɛɛrɛ Kilɛ wu pye pu tadaŋa can na. 21 Pusamaa na ba guri ba, Yakuba wo puga ki sipyii piimusamaa pʼa kori ge, pee na ba guri ba Se Bɛɛri Fɔɔ Kilɛ mu. 22 Eyi Izirayɛli nagoo, ali yee ɲɛhɛ da ba ɲɛhɛ ba suumɔ lɔhɔ ɲɔ gbazhɛnhɛyɛ ɲɛ wɛ, samaa yɛ pu da ba guri ba yee ni. Kakara ti wa da gori pyebaa wɛ, lee na ba la fara tiimɛ pu na ba lɔhɔ ya fúu wɛ. 23 Bani kakagbɔɔrɔ temukɛ wo bye fungɔngɔ kʼa lɔ xɔ ge, Kashɛn Keye yi Fɔɔ Tɛhɛnɛ Baa Kilɛ na ba tee pye na ti ɲɔ fa fiige ki bɛɛri ni.b
Yi ganha ba fyagi Asiri shɛɛn pu na wɛ
24 Lee wuu na, Kafɔɔ Kilɛ, Kashɛn Keye yi Fɔɔ Tɛhɛnɛ Baa Kilɛ ya jo na: «Nɛ wo sipyii pee, yee piimu pʼa tiin Siyɔn ni ge, yi ganha ba fyagi Asiri shɛɛn pu na wɛ. Pubegee ni pʼa yee kpɔɔn. Pʼa pubeɲuguruloo pu yirige yee fɛni, ba Misira shɛɛn pu bi li pyi wɛ. 25 Ga jɛɛrɛ yɛ tapyege ni nɛ wo loyire lʼa da xhɔ yee shizhaa na. Nɛ na ba luu yirige pu tàan na pu kyɛɛgi.» 26 Kashɛn Keye yi Fɔɔ Tɛhɛnɛ Baa Kilɛ na ba kashiin lɔ pu fɛni, ba wʼa Majan shɛɛn pu kpɔn Orɛbu faaga ki na wɛ. Wu pubiin li wa suumɔ lɔhɔ ki ɲuɲɔ wu na, wʼa li yirige ba wʼa li pye Misira ni wɛ.c
27 Kee caɲa ke na,
Asiri wo tuguro ti na ba laha ma kapaŋa ki na,
wu zhu wu na wolo ma katige ki ni.
Lee na ba bye bani ma na ba fanha le.d
Pɛɛn pʼa ma Zherzalɛmu fɛni
28 Pɛɛn pʼa nɔ Ayati kulo li ni,
pʼa Migɔrɔn kulo li ja toro,
na shɛ pu yɛrɛyɛ yi yaha Mikimasi kulo li ni.
29 Faaya yi tɛ wu wo koo li ni pʼa toro,
Pʼa jo na: «Geba kulo li ni wʼà da zhɛ shɔn.»
Arama kulo li wa na jɛlɛ fyaara keŋɛ ni,
Sɔli wo Gibeya kulo li di fe na gbee, Sɔli wo kulo le.
30 Yʼa sipyaa waa, Galimu kulo li shɛɛn!
Ta mayɛ kasɛri, Layisha kulo le!
Bɔɔngɔ ki wa yee wogo Anatoti kulo li shɛɛn!
31 Madimena shɛɛn ya caaga,
Gebimi shɛɛn wa na taŋmɔhɔŋɔ shaa.
32 Niɲaa yɛpyaa, pɛɛn pu na ba yere Nobu kulo li ni,
na pu keŋɛ ki yirige Siyɔn kulo li fɛni,
Zheruzalɛmu wo faaboboŋɔ ke.
33 Wii, Kafɔɔ Kilɛ, Kashɛn Keye yi Fɔɔ
Tɛhɛnɛ Baa Kilɛ ya tiye geye yi kɔn ni kafugo ni.
Yemu yi wa fo fugba liilii wu ni ge, wʼa yee kɔn,
Yemu yʼa tɔnnɔ ge, wʼa yee shan ɲiŋɛ na.
34 Wʼa taha ki tigbɔyɔ yi kɔɔn ni kacerege ni,
a Liban di do Se Bɛɛri Fɔɔ wu baraga ni.e