9
Sipyii piimu pu bi ɲaari nibiige ni ge, pee ya kpɛɛngbɔhɔ ka ɲa.Sipyii piimu pu bi tiin xu ɲimɛ fiige ni ge, kpɛɛngɛ nigbɔhɔ ya foro pee mu.
2 Mu ya shi wu sipyii pu ɲɛhɛ. Mʼa fundangbɔhɔ le pu ni.
Pʼa funŋɔ taan xuuni ma ɲaha tàan, ba sipyii funyɔ ma daan mɛ yalɔɔrɔ tuun ni wɛ,
ba sipyii ma fundanga mujooŋɔɔ waa mɛ kashɛɛn naafuu tataaga ni wɛ.
3 Bani tuguro zhu wemu wu bye pu ɲuŋɔ ni ge,
pubiin lemu li bi pu kpɔɔn pu kaduyo yi ni ge,
ni pu ɲaavɛɛ pu wo yakpɔnyɔ ye,
mu ya yee kyɛɛgi ba mʼa bi li pye
Majan fiige ki shɛɛn pu wo caŋa ɲii li ni wɛ.
4 Bani kashɛŋmɔ tanhaya yi bɛɛri, ni fadeye yemu bɛɛri yʼa fyɛnmi shishan na ge,
yee na ba le naɲiŋɛ ni, kɔnhɔ na di yi sòrogo.
5 Bani pya wa wʼa se wèe mu, Ja wa wʼa kan wèe mu,
Saanra ti na ba gan wu mu.
Wu mɛgɛ na ba le na:
«Kakanhana wo, Yɛrɛ pyevɔɔ, Se Bɛɛri Fɔɔ Kilɛ,
To fo gbee, Ɲaɲiŋɛ Saan».
6 La na ba faraa wu fanha ki na,
tɛhɛnɛ bɛ di wa da ba bye wu ɲaɲiŋɛ ki na,
Dawuda wo saanra koo le, ni wu saanra ti ni wɛ.
Wu saanra ti na ba deŋɛ, na baraga le ti ni,
na can ni tiimɛ taga ti tɔhɔ, na co nimɛ na fo gbee.
Lee Kashɛn Keye yi Fɔɔ Tɛhɛnɛ Baa Kilɛ wa da ba bye
wu wo taanɲɛɛgɛ nigbɔhɔ ki funŋɔ ni.
Tɛhɛnɛ Baa Kilɛ luu ya yìri wu sipyii pu tàan.
7 Kafɔɔ ya ɲɔmɛɛ la jo wà Yakuba wo tirige shɛɛn pu na,
a lʼi do Izirayɛli fiige ki ɲuŋɔ ni.
8 Sipyiire ti bɛɛri na ba foro li fiin.
Efirayimu wo koomɔ pe ni Samari kulo shɛɛn pee, pee piimu pʼa puyɛ durogo, na puyɛ pɛlɛ ge, na yu na:
9 «Puuro kasɔrɔgɔ kʼa to,
ga faakageeye wʼà da ba dɛ na taga ki yereŋɛ.
Sikomɔri tiye yʼa kɔn,
ga sɛdiri tiye wʼà da ba daga yi faa.»
10 Tɛhɛnɛ Baa Kilɛ ya Eresinia wo pɛɛn pu yirige Izirayɛli fɛni,
na pu sɔn wà wu na.
11 Aramu shi shɛɛn pu piiri Kilɛ-nɔhɔ ki na,
Filisiti shɛɛn pu piiri caŋatomɔ pu ni.
Pu na ba Izirayɛli wo koomɔ pu ja fɛɛfɛɛ.
Ga lee bɛ na, wu luu li sanha ɲiŋɛ wɛ,
wu keŋɛ ki wa yirige yaha sanha.
12 Ga Izirayɛli shɛɛn pu ya ta kuri pa pu kpɔnvɔɔ wu mu wɛ,
pu ya ta Kashɛn Keye yi Fɔɔ Tɛhɛnɛ Baa Kilɛ sha wɛ.
13 Lee na, Tɛhɛnɛ Baa Kilɛ na ba Izirayɛli ɲuŋɔ ni wu naŋa ki kɔn,
na fɛnhɛdiye yi geye ye, ni buugi wu kɔn caŋa nigin.b
14 Nɔhɔlɛɛ pee ni sipyigbɔɔ pu ɲɛ ɲuŋɔ ke,
kilɛ tudunmɔɔ kafinɛjuu pʼi ɲɛ naŋa ke.
15 Pii sipyii pii wo ɲaha covɛɛ pʼa pu piinŋɛ,
piimu ɲaha pʼa co ge, pee ya piin.
16 Lee na, pu levɛɛ pu keree da ba fundanga le Kafɔɔ ni wɛ.
Wu da ba ɲuŋɔ ɲaari pu cirimɛɛ pee,
ni pu naxhugoshaa pu na wɛ,
bani pu bɛɛri ɲɛ kakuubyii ni sipyikuuyo.
Ɲɔyɔ yi bɛɛri yʼa joguumɔ yu.
Lee bɛ na, wu luu li sanha ɲiŋɛ wɛ,
wu keŋɛ ki wa yirige yaha sanha.
17 Bani kuumɔ pu wa na sòrogo ba na ɲɛ wɛ.
Ki wa na xhuyo tiye ye, ni xhuyo tahaya yi sòrogo,
na sipoŋɔ ki wo tahaya yi sòrogo,
yi wurege kʼi gurulo na duri fugba wu ni.
18 Kashɛn Keye yi Fɔɔ
Tɛhɛnɛ Baa Kilɛ wo loyire li wuu na fiige ki wa sori.
Na ki wa na sipyiire ti sòrogo.
Wa shishiin ya ɲuŋɔ ɲaari wu ceboro na wɛ.
19 Wa ma gɔn kanige cɛ na xa,
xuugo na wu ta sanha,
Wa ma jere jere kamɛnɛ cɛ na jɔ,
wʼi da din wɛ. Wa bɛɛri wa na wuyɛ pyaa keŋɛ xaa.
20 Manase wa na Efirayimu cere cere na juuri,
Efirayimu bɛ di Manase cere cere na juuri.
Pu shuun wu bɛɛri ya pinnɛ na shɛ do Zhuda na.
Lee bɛ na, wu luu li sanha ɲiŋɛ wɛ,
wu keŋɛ ki wa yirige yaha sanha.