Ezayi wo pya wa mɛgɛ kɔri
8
A Tɛhɛnɛ Baa Kilɛ di nɛ pye: «Kɔɔrɔ nigbɔrɔ la lɔ mʼa pe kama pe ka li na ma fiinŋɛ ni kamagaan la ni na: ‹Maxhɛri-Shalali-Ashi-Bazi›, lee kɔ́ri ɲɛ: ‹Yi tɔɔyɔ lɔ kashɛn naafuu wu fɛni, yi wu kuu tɔvuyo na!› » 2 A nɛ see sipyii pii sha, na pee pye na sɛɛrɛɛ. Pee ɲɛ saraya ɲaha shɔɔnrivɛɛ Uri ni Yeberekiyawu ja Zakari.3 Lee kadugo na, a nɛ fulo na shɔ wu na, Kilɛ tudunmɔ we. A wu yere yacɛrɛ na, na ja se. A Tɛhɛnɛ Baa Kilɛ di nɛ pye: «Ke mɛgɛ ke le wu na na ‹Maxhɛri-Shalali-Ashi-Bazi› lee kɔ́ri ɲɛ: ‹Yi tɔɔyɔ lɔ kashɛn naafuu wu fɛni, yi wu kuu tɔvuyo na!› 4 Bani yani pya wu wu pa já wʼa yu ‹Baba› ni ‹Maa› ge, Asiri wo saan wu na ba Damasi kulo li wo naafuu we, ni Samari kulo li wo keŋɛ yaŋmuyɔ yi kuu na kari.»
Asiri shɛɛn pʼa pa fiige ki ɲi
5 A Tɛhɛnɛ Baa Kilɛ di nɛ pye sanha na:
6 «Bani pii sipyii pii ya Silowe wo lɔhɔ ki she,
kee kemu kʼa fúu kasɛɛgɛ na ge.
A pʼi funŋɔ taan saannaa Eresini ni Eremaliyawu ja wu keree na.
7 Ayiwa, lee wuu na Kafɔɔ wʼa da ba
gba wu wo logbɔhɔ fanhaɲɛhɛŋɛ wogo ki yirige pu fɛni.
Kee ɲɛ Asiri wo saan we ni wu nɔɔrɔ wu bɛɛri.
Kee lɔhɔ ki na ba gba wu ɲi, fo na sɛri kabaya yi bɛɛri na.
8 Ki na ba fɔ na jé Zhuda mara wu ni,
na yìri dugi, na ba wu co fo wu katige ke nɔhɔ ni.
Ki na ba jaaga, na bii,
na ma fiige ki bɛɛri ɲi, Emanuwɛli.»
Kilɛ wa ni wèe ni
9 Yʼa sipyaa waa, shi wu sipyii pee!
Yi jaalaa pu da ba yìri!
Yi bɛɛri pu ɲuwegee shan,
yee piimu bɛɛri pu ɲɛ ɲiŋɛ ki taliige shɛɛn pu ge!
Yi gbegele kashɛn ki kaa na ; yi jaalaa pu da ba yìri.
Yi gbegele kashɛn ki kaa na, yi jaalaa pu da ba yìri!
10 Yi yama pa kpɔn, pu na ba gyɛɛgi!
Yi bɛ ɲɔmɛɛ la na, li na ba fiin. Bani Kilɛ wa ni wèe ni.
Tɛhɛnɛ Baa Kilɛ yɛ na yee ya yaa na fyagi
11 Bani ye Tɛhɛnɛ Baa Kilɛ ya jo nɛ mu,
tuun wemu ni wʼa wu keŋɛ ki taga nɛ co,
na nɛ kalaa na nɛ ganha ba pii sipyii pii wo koo le ɲaari-i ge, wʼa jo:
12 «Lemu pii sipyii pii ya byi woni ge,
yi ganha ba lee pyi woni wɛ.
Lemu na pʼa fyagi ge, yi ganha ba fyagi lee na wɛ.
Yi jaalaa pu ganha bu yìri wɛ.
13 Kashɛn Keye yi Fɔɔ Tɛhɛnɛ Baa Kilɛ, wee yee ya yaa na cɛ Fɛfɛɛrɛ ti fɔɔ.
Wee na yee ya yaa na pɛɛŋɛ tɛri, Wee na yee ya yaa na fyagi.
14 Ayiwa, wee na ba bye fɛfɛɛrɛ xuu,
ga na bye bɛ bɔɔngɔ wo faakagereŋɛ.
Wu na ba bye faaga Izirayɛli wo saanra tɛhɛɛ shuun wu na ba guruŋɔ kemu na ge
Wu na ba bye jɔ ni tifuugo Zheruzalɛmu shɛɛn pu mu.
15 Sipyii niɲɛhɛmɛɛ na ba guruŋɔ ki na,
pu na ba dun na puyɛ kɛgɛɛ.
Tifuuyo yi na ba pu coni, pʼa ganha na pu coni.»
Kilɛ tudunmɔ wu wo tadaŋa ke
16 Pe sɛɛri jomɔ pe ŋmɔhɔ,
We saliya we ɲɔ tɔ ni keŋɛ fɛ ni ma yaha na kalaapiire ti niŋɛ ni.
17 Nɛ wa na Tɛhɛnɛ Baa Kilɛ sigee,
wee wemu wʼa wuyɛ ŋmɔhɔ Yakuba wo puga ki na ge.
Wee wu ɲɛ nɛ wo tadaŋa ke.
18 Nɛ we, nɛ ni na nagoo pee,
Tɛhɛnɛ Baa Kilɛ ya piimu kan nɛ mu ge.
Wèe ya pye ɲaha shɛshɛɛrɛ ni keree nibaŋaa ki wo shɛmɛ Izirayɛli ni.
Lee ya foro wù Kashɛn Keye yi Fɔɔ Tɛhɛnɛ Baa Kilɛ ni.
Wee wemu wʼa tiin Siyɔn faaboboŋɔ ki na ge.
19 Wa bu yi pye na:
«Yi shɛ yegeŋɛ pye xulɛɛ yirivɛɛ pu mu, ni piimu pʼa ɲibaŋa keree ki yu,
na siwegee wi, na ŋmunu-ŋmunu ge.
Ta shi wa bɛɛri ya yaa na wu kilɛlɛɛ yegee wɛ?
Ta sipya ya yaa na xulɛɛ yegee wyii keree na wɛ?»
«Yi kuri pa Kafɔɔ wo saliya we ni wu sɛɛri keree ki mu.»
Nakaara baa, sipya ya yaa na yu na sahaŋi ni yee ni.
Ni lee bɛ wɛ, ɲimuguŋɔ da ba nɔ weefɔɔ na wɛ.
21 Wu niganhaŋa na ba fiige ki ja na toro ni xuugo ni.
Xuugo ba wu ta tuun wemu ni, wu luu na ba yìri,
wʼa wu saan we ni wu Kilɛ wu laŋi,
Wu na ba wu ɲaha ki yirige
na fugba wu wii.
22 Lee kadugo na, wu na ba ɲiŋɛ ki wii,
ga wii, kanhama ni nibiige ni funjɔnrɔgɔ.
Wu na ba wá nibiigbɔhɔ ki ni.
Ɲaɲiŋɛ saan we
23 Ga kee ɲiŋɛ kemu na funjɔnrɔgɔ ki wa nimɛ ge,
nibiige ki da ba gori yaha wà gbee wɛ.
Taashiinɛ li ni, Zabulɔn wo koomɔ pe ni Nɛfitali wo koomɔ pu bi yaha wà shiige ni.
Cabaya yi na, nɔɔrɔ na ba daha suumɔ lɔhɔ ki koo li na,
Zhurudɛn Gba wu kadugo yíri, shi watii shɛɛn wo koomɔ pe.