Akabu ya Nabɔti wo ɛrɛzɛn tɛgɛ ki shɔ wu na
21
Ayiwa, ba lee ya toro laha wà wɛ, lemu bɛ lʼa pye ge, lee li wa mɛ: Zhizirɛli kulo li shɛn wa mɛgɛ bye na Nabɔti, ɛrɛzɛn tɛgɛ ka bye wee mu Zhizirɛli kulo li ni Akabu wo saanra puga ki tàan, Samari wo saan we. 2 Caŋa ka, a Akabu di ba Nabɔti pye: «Ma ɛrɛzɛn tɛgɛ ki kan na mu, di ki pye loyɔ faa tapyege, bani kʼa tɛɛŋɛ nɛ puga ki na. Nɛ na ba ɛrɛzɛn tɛgɛ nijeŋɛ ka kan ma mu ki tɛgɛ. Kelee, li shiin bu bɛ ma mu, nɛ na ki pɛrɛmɛ kan ma mu.» 3 A Nabɔti di Akabu pye: «Bada! Tɛhɛnɛ Baa Kilɛ wu na tanha di na tii pu wo cɛn wu kan ma mu!» 4 A Akabu yatɛnyɛ di xhu, a wu funyaŋa wo di gari, bani Nabɔti bi wu pye na: «Nɛ da na tii pu wo cɛn wu kan ma mu wɛ!» A wu shɛ sinnɛ wu yasinnɛgɛ ki na, na wu ɲaha lɔ wà, na yaligee she. 5 A wu shɔ Zhezabɛli di ba wu ta yasinnɛgɛ ki na, na wu pye: «Ɲaha na ma dʼa ɲaha tanha wɛ? Ɲaha na ma dʼa yaligee she wɛ?» 6 A wu jo: «Zhizirɛli shɛɛn Nabɔti ni nɛ jo, na wu pye jo: ‹Ma ɛrɛzɛn tɛgɛ ki kan na mu wari na, kelee, li bu bɛ ma mu, nɛ na ɛrɛzɛn tɛgɛ katii kan ma mu ki faara.› Ga a wu nɛ pye: ‹Nɛ da na ɛrɛzɛn tɛgɛ ki kan ma mu wɛ!› » 7 Wee tuun wu ni, a wu shɔ Zhezabɛli wu wu pye: «Mu wu wʼa sii tii pye Izirayɛli wo saan wu ya? Yìri, mʼa li, mʼa funŋɔ taan! Nɛ wʼa da ba Zhizirɛli shɛɛn Nabɔti wo ɛrɛzɛn tɛgɛ ki kan ma mu!»8 Ayiwa, a cee wu sɛmɛɛ pii ka Akabu mɛgɛ na, na Akabu wo keŋɛ fɛ taha pu na. Nɔhɔlɛɛ ni sipyigbɔɔ piimu pu ɲɛ ni Nabɔti ni kulo li ni ge, a cee wu pee sɛmɛɛ pu tun pee mu. 9 A wu li ka pee sɛmɛɛ pu ni na: «Yi suun caŋa ka tagi, yʼi ki kaa jo yi caaga. Yʼi ba Nabɔti pye sipyiire ti wo ɲahagbaa fɔɔ we, 10 yʼi kanɔhɔbyii shuun wa teŋɛ yi saha ni wu ni, pee di da yi yu pʼa waa wu na na: ‹Mu ya Kilɛ laŋi, na saan wu bɛ laŋi!› Lee kadugo na, yʼi wu yeege kanha ki kadugo, yʼi wu wá ni kagereye ni yi gbo.»
11 Ayiwa, Nabɔti kulo shɛɛn pee, ni nɔhɔlɛɛ pee, ni sipyigbɔɔ piimu pu wa kulo li ni ge, a pee di li pye mu na saha ni Zhezabɛli wo fungɔngɔ ki ni, sɛmɛ wemu wʼa bi tun pu mu ge, yemu yʼa bi ka wee ni ge, a pʼi yee koo ɲaari. 12 A pʼi suun wa caŋa tagi, na Nabɔti pye sipyiire ti wo ɲahagbaa fɔɔ we. 13 A kanɔhɔbyii shuun wu ba, na ba diin na saha ni wu ni. A pee kanɔhɔbyii shuun wu ganha na pe sɛɛri jomɔ pe yu sipyiire ti ɲii na waa Nabɔti na na: «Nabɔti ya Kilɛ laŋi, na saan wu bɛ laŋi!» Wee tuun wu ni, a pʼi foro ni wu ni kanha ki kadugo, na shɛ wu wá ni kagereye ni, a wu xhu. 14 A pʼi yi yaha shɛ jo Zhezabɛli mu na: «Nabɔti ya wá na gbo ni kagereye ni.»
15 Ba Zhezabɛli ya logo na pʼa kagereye taga Nabɔti wá, a wu xhu wɛ, a wu Akabu pye: «Zhizirɛli shɛɛn Nabɔti wo ɛrɛzɛn tɛgɛ ki lɔ ma pye ma wogo. Wʼa bi li she wu da ki kan ma mu wari ɲuŋɔ tàan wɛ ge, wu ɲɛ nige ɲìi na wɛ, wʼa xu.» 16 Ba Akabu ya logo na Nabɔti ya xu wɛ, a wu digi kari Zhizirɛli shɛɛn Nabɔti wo ɛrɛzɛn tɛgɛ ki fɛni, na shɛ ki lɔ na pye wu wogo.
Eli ya Akabu ni Zhezabɛli wo jaagi kanhama pu kaa jo
17 Ayiwa, a Tɛhɛnɛ Baa Kilɛ wo jomɔ pʼi nɔ Tishibi shɛɛn Eli na na: 18 «Izirayɛli saan wu wu wa Samari kulo li ni ge, tigi shɛ wu ɲuŋɔ círi. Nabɔti wo ɛrɛzɛn tɛgɛ ki ni wu wa. Wʼa kari di zhɛ ki lɔ di bye wu wogo. 19 Shɛ yi jo wu mu na yemu Tɛhɛnɛ Baa Kilɛ ya jo ge, na yee yi wa mɛ na: ‹Wa mu ya gbo, na nɔhɔ wu tɛgɛ pye ma wogo!› Mʼa wu pye sanha na yemu Tɛhɛnɛ Baa Kilɛ wa yu ge, na yee yi wa mɛ na: ‹Xuu wemu ni puun pʼa Nabɔti wo shishan pu laala ge, wee xuu wu ninumɔ ni puun wa da ba muyɛ pyaa bɛ wo shishan pu laala.› » 20 A Akabu di Eli pye: «Na pɛn we, ago mʼa kuri na ta sanha bɛ!» A Eli di wu pye: «Oo dɛ, nʼa ma ta sanha, bani mu ya mayɛ pɛrɛ, lemu lʼa kolo Tɛhɛnɛ Baa Kilɛ mu ge, na lee pye. 21 Lee wuu na, yemu Tɛhɛnɛ Baa Kilɛ wa yu ge, yee yi wa mɛ: «Nʼa da ba bɔɔngɔ ka yaha di zhan ma ɲuŋɔ ni, nʼa da ba ma ɲuŋɔ tugo, nɛ na ba Akabu puga ki wo namaa pu bɛɛri gbo, wemu ɲɛ bulo, ni wemu ɲɛ bulo wɛ ge. 22 Nɛ na ba ma puga ki pye ba Nebati ja Zheroboomu wogo kʼa pye wɛ, ni ba Ayiya ja Basha wogo kʼa pye wɛ, bani mu ya nɛ luu yirige, na Izirayɛli pye wʼa jurumu pye.» 23 Zhezabɛli wi ge, Tɛhɛnɛ Baa Kilɛ ya jo na: «Puun na ba Zhezabɛli xa Zhizirɛli kulo li maha maha kasɔrɔgɔ ki fɛɛ ni. 24 Akabu wo kpuun shɛn wemu ba xhu kanha funŋɔ ni, puun na wee xa, wemu ba xhu sige ni, fugba shazhɛɛrɛ ti na wee jɔ.»
25 Ayiwa, sipya wa shishiin sanha da, wemu ya wuyɛ pɛrɛ, lemu lʼa kolo Tɛhɛnɛ Baa Kilɛ mu ge, na lee pyi na Akabu xɔ wɛ. Wu shɔ Zhezabɛli wu bi wu suun na waa ki na. 26 Tanhaŋa kagbɔhɔɔ wʼa pye ni yapɛrɛɛ ki wo pɛɛŋɛ ki ni, na bye ba Amɔri shi shɛɛn pu ɲɛ wɛ, pee piimu Tɛhɛnɛ Baa Kilɛ ya kɔri laha Izirayɛli nagoo pu ɲahagbaa na ge.
27 Ba Akabu ya yee logo wɛ, na wu fàya yi shɛɛngi, na bɔrɔgɔ le wuyɛ na, na suun le. A wu ganha na shuun ni kee bɔrɔgɔ ki ni, na ɲaari kasɛɛgɛ na. 28 Ba lee ya pye wɛ, a Tɛhɛnɛ Baa Kilɛ wo jomɔ pʼi nɔ Tishibi shɛɛn Eli na na: 29 «Akabu ya wuyɛ tirige tirigegana lemu na nɛ ɲaha tàan ge, ta mʼa lee ɲa? Wʼa wuyɛ tirige tirigegana lemu na nɛ ɲaha tàan ge, nʼa da bɔɔngɔ ki yaha ki pa wu wo caŋa ɲii li ni wɛ. Wu ja wu wo caŋa ɲii li ni nʼa da ba bɔɔngɔ ki yaha di zhan wu puga ki ɲuŋɔ ni.»