Bɛni-Adadi ya shɛ kashɛn sin na Samari maha
20
Ayiwa, a Aramua wo saan Bɛni-Adadi di wu kashɛn keŋɛ ki bɛɛri pinnɛ. Saannaa kɛlɛɛ taanri ni shuun (32) wu bye ni wu ni, ni shɔnyɔ, ni shɔnyɔ wotoriyo. A wu gbegele kashɛn na, na shɛ kashɛn taga Samari kuuri, na do wu na. 2 A pʼi tudunmɔɔ pii tun kulo li ni, Izirayɛli wo saan Akabu mu, 3 na pu shɛ wu pye na: «Yemu Bɛni-Adadi wa yu ge, yee yi wa mɛ na: ‹Ma warifyɛn we, ni ma sanni wu wa nɛ wo, ma cèe pee ni ma jalaa pu bɛɛri nizaamaa pu ɲɛ nɛ wuu.› » 4 A Izirayɛli wo saan wu wu ɲɔ shɔ na: «Saan we, na kafɔɔ we, na saha ni ma jomɔ pu ni, nɛ ni na keŋɛ yaŋmuyɔ yi bɛɛri yi ɲɛ mu woyo.» 5 A tudunmɔɔ pʼi nɔhɔ kuri pa na ba yi jo wu mu na yemu Bɛni-Adadi ya jo ge, na yee yi wa mɛ na: «Nɛ mu pye jo ma ma warifyɛn we, ni ma sanni we, ni ma cèe pee, ni ma jalaa pu le na keŋɛ ni. 6 Wee tuun wu ni ɲiga ɲisɔɔgɔ nimɛtashiin na nʼa da na namaa pu tun ma mu. Pu na zhɛ ma puga ki sha, na ma fanha ki sipyigbɔɔ pu wo piyɛyɛ yi sha, yasaaŋa kemu bɛɛri kaa lʼa waha ma mu ge, pu na ba yee bɛɛri lɔ ma ɲii na.»7 A Izirayɛli wo saan wu fiige ki nɔhɔlɛɛ pu bɛɛri yiri, na pu pye: «Yi li cɛ fiinŋɛ na wèe wo bɔɔngɔ kaa li wa we ná we na. Wʼa tudunmɔɔ tun pʼa pa na pye na di na cèe, ni na jalaa, ni na warifyɛn, ni na sanni kan wu mu, nɛ ya ta lee she wɛ!» 8 A nɔhɔlɛɛ pu bɛɛri ni sipyiire ti bɛɛri di Akabu pye: «Ma ganha bu wu jomɔ pu logo wɛ. Ma ganha bu sɔɔ wu nijoyo yi na wɛ.» 9 Wee tuun wu ni a Akabu di Bɛni-Adadi wo tudunmɔɔ pu pye: «Yi shɛ yi jo na kafɔɔ saan wu mu na: ‹Lemu bɛɛri mʼa sha na mu taashiinɛ li ni ge, nʼa sɔɔ lee na. Ga lemu mʼa zhaa na mu nimɛ ge, nʼa da já lee pye wɛ.› » A tudunmɔɔ pʼi gari, na shɛ yee ɲaha jo Bɛni-Adadi mu.
10 A Bɛni-Adadi di yi yaha shɛ jo Akabu mu na: «Kashɛn keye yemu bɛɛri yi wa ni nɛ ni ge, Samari puuro ti bu já yee wo sipyii pu bɛɛri kadawegee ki ɲi, kilɛlɛɛ pu pu le pye na na, pʼi le fara li na!» 11 Ga a Izirayɛli wo saan wu wu ɲɔ shɔ na: «Yi shɛ yi jo wu mu na: ‹Sipya wemu wʼa gbegele kashɛn na ge, wee ganha ba wuyɛ sɔni kanna wʼa yíri xɔ ki na wɛ!› »
12 Tuun wemu ni Bɛni-Adadi ya pe jomɔ pe logo ge, lee bi wu ta wu na gbuu ni wu saannaa pu ni buguloo pu ni. A wu wu namaa pu pye: «Yi gbegele pu fɛni!» A pʼi gbegele kashɛn ki na kulo li fɛni.
Akabu ya se ta Bɛni-Adadi na
13 Ayiwa, a Kilɛ tudunmɔ wa di fulo Akabu na, Izirayɛli wo saan we, na wu pye: «Yemu Tɛhɛnɛ Baa Kilɛ ya jo ge, yee yi wa mɛ: ‹Go mʼa le sipyiɲɛhɛnɛ le ɲaa gɛ? Nʼa da pu le ma keŋɛ ni niɲaa, ma na ba li cɛ lee na na nɛ wu ɲɛ Tɛhɛnɛ Baa Kilɛ we.› » 14 A Akabu di jo: «Jɔgɔ keŋɛ kurogo wɛ?» A Kilɛ tudunmɔ wʼi jo: «Yemu Tɛhɛnɛ Baa Kilɛ ya jo ge, yee yi wa mɛ na: ‹Kashɛnŋmuu lɛvɛpiire temu ɲuŋɔfɛɛ pʼa shɔɔnri lɔ ge, pee keŋɛ kurogo.› » A Akabu di jo: «Jɔgɔ wʼa da zhɛ kashɛn ki ɲɔ kɔn wɛ?» A tudunmɔ wʼi jo: «Mu» 15 Wee tuun wu ni a Akabu di ɲuŋɔfɛɛ pu wo kashɛnŋmuu lɛvɛpiire ti tɔrɔ, a pʼi bye sipyii xhuu shuun ni kɛlɛɛ taanri ni shuun (232). Lee kadugo na, a wu sipyiire ti bɛɛri tɔrɔ, Izirayɛli shɛɛn pu bɛɛri, a pʼi bye sipyii kabɔfoŋɔɔ gbarashuun (7.000).
16 Cafugo ki na, a pʼi foro kashɛn ki na. Lee bi Bɛni-Adadi ta wu na gbuu fo na ɲawɔhɔ wuu wuyɛ na buguloo pu ni, ni wu saannaa kɛlɛɛ taanri ni shuun wu ni (32), pee piimu pʼa bi pa wu tɛgɛ ge. 17 A ɲuŋɔfɛɛ pu wo kashɛnŋmuu lɛvɛpiire tʼi fɛnhɛ foro ɲaha na. A Bɛni-Adadi di pii tun pʼa shɛ kasɛɛgɛ pye, a pʼi ba wu pye na: «Namaa pii pʼa foro Samari ni.» 18 A wu jo: «Pu bu da pʼa foro ɲaɲiŋɛ kaa na, yi pu ɲìi wuu co! Pu bu da pʼa foro kashɛn kaa na, yi pu ɲìi wuu co!» 19 A ɲuŋɔfɛɛ pu wo kashɛnŋmuu lɛvɛpiire te, ni kashɛn keŋɛ ki kʼa taha pu fɛni ge, a pʼi foro kulo li ni. 20 A pʼi kashɛn ki ɲɔ kɔn, wa bɛɛri wʼa shɛ do shɛn nigin na. A Aramu shɛɛn pʼi baa. A Izirayɛli di pu nɔhɔ niinɛ. A Aramu saan Bɛni-Adadi di baa shɔ shɔngɔ na, ni kashɛn wotoriyo ya ni. 21 A Izirayɛli wo saan wu foro, na shɔnyɔ yi gbo, na kashɛn wotoriyo yi kyɛɛgi. A wu sii bɔɔngɔ nigbɔhɔ shan Aramu shɛɛn pu ɲuŋɔ ni.
22 Wee tuun wu ni, a Kilɛ tudunmɔ wu fulo Akabu na, Izirayɛli wo saan we, na wu pye: «Yee la bɛ Aramu saan wʼa da ba do ma na sanha. Baraga le mayɛ ni, mʼa ma yatɛnyɛ yi waha, lemu mʼa yaa na pye ge, mʼa lee kemɛ sɛɛri.»
Akabu ya se ta sanha, ga na nahama pye
23 Ayiwa, a saannaa Bɛni-Adadi wo namaa pʼi wu pye na: «Faaboboyo Kilɛ wu ɲɛ Izirayɛli nagoo pu wo Kilɛ we, lee lʼa pu pye pʼa se ta wèe na. Ga wù shɛ do pu na mura wu ni, wù na ba li ɲa nakaara baa, na wù na ba se ta pu na! 24 Lemu bɛ mʼa yaa na pye ge, lee li wa mɛ: ‹Saannaa pu bɛɛri tirige laha pu tatɛɛnyɛ yi ni, mʼa gbafɛnɛɛrɛɛ taga pu faa. 25 Kashɛn keŋɛ kemu kʼa kyɛɛgi ma mu ge, mayɛ pyaa di kashɛn keŋɛ katii gbegele ba kee ɲɛ wɛ, ki shɔnyɔ ye, ni ki kashɛn wotoriyo yi bɛ di nizhiiye yi xɔ. Lee kadugo na, wù shɛ do pu na mura wu ni, wù na ba li ɲa nakaara baa, na wù na ba se ta pu na!› » A saan wu pu jomɔ pu logo, na li pye mu.
26 Ba yefonɔ lʼa pa nɔ wɛ, a Bɛni-Adadi di Aramu shɛɛn pu tɔrɔ, na dugi kari Afɛki kulo li shizhaa wu na, kɔnhɔ wu shɛ kashɛn kɔn Izirayɛli na. 27 A Akabu bɛ di Izirayɛli shɛɛn pu tɔrɔ, na yaligee kan pu mu, na gbegele na se di zhɛ pu ɲuŋɔ círi. A Izirayɛli shɛɛn pʼi shɛ pu wo kashɛn keŋɛ ki sin pu ɲahatiimɛ pu ni, na bye pu ɲaha tàan ba sikagbagaa nifɛnhɛfɛnhɛŋɛɛ shuun ɲɛ mɛ wɛ, na ta Aramu shɛɛn pu dʼa fiige ki bɛɛri tɔ.
28 A Kilɛ wo ná wu fulo, na Izirayɛli wo saan wu pye: «Yemu Tɛhɛnɛ Baa Kilɛ ya jo ge, yee yi wa mɛ na: ‹Aramu shɛɛn pʼa jo na: “Faaboboyo wo Kilɛ wu ɲɛ Tɛhɛnɛ Baa Kilɛ, wu ɲɛ mura wo Kilɛ wɛ.” Lee wuu na nʼa da ba le sipyiɲɛhɛnɛ le bɛɛri le ma keŋɛ ni, yi na ba li cɛ lee na, na Tɛhɛnɛ Baa Kilɛ nɛ ɲɛ.› » 29 A pʼi shɛ kashɛn keye yi sin sin na saha ni yiyɛ ni na ta cabyaa gbarashuun. Caŋa gbarashuun wogo ki na, a kashɛn kʼi ɲɔ kɔn. A Izirayɛli nagoo pʼi Aramu shɛɛn kashɛnŋmuu tɔdiiye fɛɛ kabɔfoŋɔɔ xhuu nigin (100.000) gbo caŋa nigin. 30 Piimu pʼa kori ge, a pee di baa kari Afɛki kulo li ni. Ga a Kulo li maha maha kasɔrɔgɔ kʼi do namaa kabɔfoŋɔɔ xhuu kɛlɛɛ shuun ni gbarashuun (27.000) ɲuŋɔ ni, pee piimu pʼa bi kori ge.
Lee bi Bɛni-Adadi ta wʼa paa gbee. A wu shɛ jé kulo li ni, na shɛ lara puga ki funŋɔ puga ka ni. 31 A wu kashɛnŋmuu pʼi wu pye: «Wèe ya logo na Izirayɛli wo saannaa pu ɲiɲaara tʼa pɛlɛ. Lee na do, wʼa da bɔrɔyɔ fàya nugo, wù mɛhɛɛ le le wùyɛ katiye ni, wù foro shɛ Izirayɛli wo saan wu yíri. La wa la ni, wu na zhɛ ma ɲìi wo wu yaha.» 32 Ayiwa, a pʼi bɔrɔyɔ fàya nugo puyɛ na, na mɛhɛɛ le le puyɛ katiye ni, na shɛ Izirayɛli wo saan wu mu, na shɛ wu pye: «Ma kapyebye Bɛni-Adadi ya jo: ‹Nʼa ma ɲɛɛri jo ma na ɲìi wo wu yaha!› » A Akabu di jo: «Ta wu ɲɛ sanha ɲìi na? Wʼa ɲɛri na ceborona.» 33 A Bɛni-Adadi wo tudunmɔɔ pʼi lee ɲɔmɛɛ li ta lʼa taan. Taapile ni a pʼi pee jomɔ pu co ba pʼa jo wɛ, na jo: «Oo dɛ, Bɛni-Adadi ya ɲɛri ma ceborona!» A Akabu di jo: «Yi shɛ ba ni wu ni.» A Bɛni-Adadi di foro pa Akabu yíri, a Akabu di wu durogo wu kashɛn wotori wu na. 34 A Bɛni-Adadi di wu pye: «Nɛ to wʼa kulogoo kiimu shɔ ma to wu na ge, nʼa da ki tɛrɛŋɛ di gan ma mu. Ma na já bɛrɛ tapyeye ya ɲɔ mugi Damasi kulo li ni, ba nɛ to wu bi ya ɲɔ mugi mɛ Samari kulo li ni wɛ.» Wee tuun wu ni a Akabu di jo: «Nɛ na ba kariɲɛɛgɛ ɲɔmɛɛ lɔ ni ma ni, lee kadugo na, di ma yaha ma da se.» A wu kariɲɛɛgɛ ɲɔmɛɛ lɔ ni wu ni, na wu yaha kari.
Kilɛ tudunmɔ wa ya Akabu wo nahama pu jo wu mu
35 Wee tuun wu ni a Tɛhɛnɛ Baa Kilɛ di yi jo wu tudunmɔ wa ɲɔ na, na wu wu kaafɔɔ wa pye na: «Nʼa ma ɲɛɛri, ma ŋmɔpara li sa na ni!» Ga a wu kaafɔɔ wu li she wu da ŋmɔpara li sa wu ni wɛ. 36 Wee tuun wu ni a wu wu kaafɔɔ wu pye: «Mu ya li she mu da Tɛhɛnɛ Baa Kilɛ wo jomɔ pu logo wɛ, lee wuu na, ma ba laha nɛ tàan tuun wemu ni, cɛnri wu da zhɛ ma gbo.» Ba wʼa pa laha wu tàan wɛ, na shɛ saha ni cɛnri ni, a wee di wu gbo.
37 A Kilɛ tudunmɔ wu shɛ saha ni ná wabɛtii ni, na wee bɛ pye: «Nʼa ma ɲɛɛri, ma ŋmɔpara li sa na ni!» A ná wu ŋmɔpara li sa wu ni, fo na wu bana. 38 A Kilɛ tudunmɔ wu fàŋa ka taga wu ɲaha ki migile, na shɛ diin saan wu kodoronɔ li ni.
39 Ba saan wʼa pa nɔ na doroo wɛ, a Kilɛ tudunmɔ wu mujugbɔɔ wá wu mu na: «Nɛ bye kashɛn ki na na ŋmuu, a ná wa di ba foro kashɛnŋmuu pu tɛ ni, na ba nɛ mu ni ná wa ni, na ba nɛ pye: ‹We ná we mara! Wu bu shɔ ma na, ma munaa lʼa da wu wuu li faa, kelee mʼa warifyɛn tuuŋɔɔ kabɔfoŋɔɔ taanri (3.000) kan! 40 Ga ba nɛ ɲaha ya pa jaala wɛ, a ná wu juri.› » A Izirayɛli wo saan wu wu pye: «Go mu wo kiiri wʼa kɔn xɔ, mayɛ pyaa kʼa wu kɔn.» 41 Taapile ni, a ná wu fàŋa ki laha wu ɲaha ki na, a Izirayɛli saan wu wu cɛ na Kilɛ tudunmɔ wa wu ɲɛ wii. 42 Wee tuun wu ni a Kilɛ tudunmɔ wu saan wu pye: «Yemu Tɛhɛnɛ Baa Kilɛ wʼa yu ge, yee yi wa mɛ: ‹Nɛ jo ná wemu ɲuŋɔ ki tugo fɛɛfɛɛ Tɛhɛnɛ Baa Kilɛ mu ge, mu ya wee yaha wʼa shɔ. Ma munaa li na ba daga wu wuu li faa, ma sipyii pu na wu wuu pu faa.› » 43 A Izirayɛli wo saan wu yatɛnyɛ di xhu, a wu funyaŋa wo di gari wu kaban Samari kulo li ni.