Eli ya paa Zhezabɛli ɲaha na
19
Ayiwa, Eli ya keree kiimu bɛɛri pye, na Bamɔti-Baali bɛ wo tudunmɔɔ pu bɛɛri bɛ gbo ni ŋmɔpara li ni gbogana lemu na ge, a Akabu di shɛ yee bɛɛri paari Zhezabɛli mu. 2 A Zhezabɛli di tuduro yaha na shɛ jo Eli mu na: «Nɛ bye nɛ di ya mu gbo ɲiga nimɛtashiin tɛ ni ba mu ya pee sipyii pu gbo wɛ, kilɛlɛɛ pu kanhama pu bɛɛri wo kanhagbɔ pu shan na ɲuŋɔ ni.» 3 Ba Eli ya yee logo wɛ, na fya na yìri wà na ganha na fe, kɔnhɔ wu wu munaa li ɲuŋɔ wolo. Ba wʼa nɔ Bɛɛrisheba kulo li ni Zhuda koomɔ pu ni wɛ, na wu kapyebye wu yaha wà. 4 A wu siwaga ki koo li lɔ na caŋa nigin ɲara pye, na shɛ diin tire la tàan. A wu xu ɲɛɛri wuyɛ mu, a wu jo: «Le kaa le ya nɔ li tɛhɛnɛ na, nimɛ Tɛhɛnɛ Baa Kilɛ we, na munaa li shɔ, nɛ ya pɔrɔ na sefɛlɛɛ pu na wɛ.» 5 A wu sinnɛ na ŋmunɔ tire li tàan. Ga a mɛlɛkɛ wa di ba gbɔn wu na, na wu pye: «Yìri mʼa li.» 6 A Eli di ɲɛ, na wii, na buuri nifɛnhɛfɛnhɛnɛ nivɔrɔ la ɲa naganhaa na wu ɲuŋɔ ki tàan ni lɔhɔ kuzhɔ. A wu li na gba na sinnɛ sanha. 7 A Tɛhɛnɛ Baa Kilɛ wo mɛlɛkɛ wu ba sanha, na ba gbɔn wu na, na wu pye: «Yiri mʼa li, bani ma koo lʼa tɔnnɔ.» 8 A Eli di yìri na li na gba. Ba wʼa kee yalige ki li xɔ wɛ, na fanha ta, a wu caya kɛlɛɛ shishɛɛrɛ (40) ni piiye kɛlɛɛ shishɛɛrɛ (40) ɲara pye, fo na shɛ nɔ Kilɛ wo faaboboŋɔ Orɛbu wu na.Eli ya nɔ Orɛbu faaboboŋɔ ki na
9 Ba Eli ya nɔ wà wɛ, a wu jé faaga wege ka ni, na shɔn wà. A Tɛhɛnɛ Baa Kilɛ wo jomɔ pʼi nɔ Eli na na: «Ɲaha mʼa byi naha wɛ, Eli?» 10 A Eli di jo: «Ɲɛpɛɛn lʼa jé nɛ ni Tɛhɛnɛ Baa Kilɛ, Kashɛn Keye yi Fɔɔ wu wuu na, bani Izirayɛli shɛɛn pʼa ma kariɲɛɛgɛ ɲɔmɛɛ li she. Pʼa ma saraya tawoloyo yi ja, na ma tudunmɔɔ pu gbo ni ŋmɔpara ni. Nɛ yɛ nigin wʼa kori, pʼi wa na bɛ shaa di gbo.» 11 A Tɛhɛnɛ Baa Kilɛ di wu pye: «Foro kpɛɛngɛ ki na mʼa yere faaboboŋɔ ki na Tɛhɛnɛ Baa Kilɛ wu ɲii na. Tɛhɛnɛ Baa Kilɛ wʼa zhaa di doro.» A kafɛɛgbɔhɔ ka di ja Tɛhɛnɛ Baa Kilɛ ɲahagbaa na. Kee kafɛɛgbɔhɔ ki fanha kʼa pɛlɛ, fo kʼa faaboboyo yi ja, na faaya yi kɛgi, ga Tɛhɛnɛ Baa Kilɛu bye kee kafɛɛgɛ ki ni wɛ. Kee kafɛɛgɛ ki kadugo na, a ɲiŋɛ kʼi jɛlɛ, ga Tɛhɛnɛ Baa Kilɛ bye ɲiŋɛ cɛlɛŋɛ ki ni wɛ. 12 Ɲiŋɛ ki jɛlɛ wu kadugo na, a na di bye, ga Tɛhɛnɛ Baa Kilɛ bye kee na ki ni wɛ. Kee na ki kadugo na, a kafɛɛrɛ tunmɔ di foro. 13 Eli ya lee logo tuun wemu ni ge, na wu ɲaha ki tɔ ni wu fadegbɔhɔ ki ni, na foro na yere faaga wege ki ɲɔ na. A mujuu la di wu pye: «Eli, ɲaha mʼa byi naha wɛ?» 14 A Eli di jo: «Ɲɛpɛɛn li ɲɛ nɛ ni Tɛhɛnɛ Baa Kilɛ, Kashɛn Keye yi Fɔɔ wu wuu na, bani Izirayɛli nagoo pʼa ma kariɲɛɛgɛ ɲɔmɛɛ li kyɛɛgi, pʼa ma saraya tawoloyo yi ja, na ma tudunmɔɔ pu bɛɛri gbo ni ŋmɔpara ni. Nɛ yɛ nigin wʼa kori, ga pʼi wa nɛ bɛ shaa di gbo.» 15 A Tɛhɛnɛ Baa Kilɛ di wu pye: «Siwaga ki koo li lɔ mʼa shɛ nɔ fo Damasi ni. Ma bu nɔ wà tuun wemu ni, mʼa Azayɛli tìre ma pye Aramu kulo li saan we, 16 mʼa Nimushi ja Zhewu tìre ma pye Izirayɛli saan we. Mʼa Shafati ja Elize bɛ tìre ma pye tudunmɔ ma tɛgɛ, wee ɲɛ Abɛli-Mexhola kulo li ni. 17 Wemu bɛɛri bu shɔ Azayɛli wo ŋmɔpara li na, Zhewu na ba weefɔɔ gbo, wemu bu shɔ Zhewu wo ŋmɔpara li na, Elize na ba weefɔɔ gbo. 18 Ga namaa kabɔhɔɔ gbarashuun (7.000) nɛ yaha nayɛ mu Izirayɛli ni, piimu pu ɲɛ pu ya pu nugunyɔ yi sin Bamɔti-Baali tàan wɛ ge, wee wa shishiin ya ɲɔsɔɔnrɔ fo kan wu mu wɛ.»
19 A Eli di foro wà na kari, na shɛ Shafati ja Elize ta wu na niiyɛ faa pyi. Niiyɛ pɔgɔɔ kɛ ni shuun wu bye faa wu na, Elize yɛ pyaa dʼa pɔɔ kɛ ni shuun wuu li wo tuugo ki co. A Eli di fulo wu na, na wu fadegbɔhɔ ki wá wu na. 20 A Elize di wu niiyɛ yi wá na baa Eli fɛni, na wu pye: «Shi di shɛ ɲɔsɔɔnrɔ fò kan na to we ni na nu wu mu, di pu pye ‹Wù ɲɛ caŋa ka!›, di na ba daha ma fɛni.» A Eli di jo: «Shɛ mʼa ba, lemu nɛ pye ma na ge, mʼa lee cɛ.» 21 Ba Elize ya yìri Eli tàan wɛ, na niiyɛ shuun wa co na yi pye saraga. A wu yee niiyɛ yi xaara ti shɔhɔ ni zhuloo pu ni, na tee kan wu sipyii pu mu. Lee kadugo na, a wu yìri na daha Eli fɛni na bye wu kapyebye.