Kilɛ Tudunmɔɔ Eli keree
17
Ayiwa, Tishibi shɛɛn Eli wemu wu bye Galadi fiige ki wo nadadiinmɛ wa ge, caŋa ka wee ya pa Akabu pye na: «Tɛhɛnɛ Baa Kilɛ, Izirayɛli wo Kilɛ ɲìi wo wu mɛgɛ na, wee wemu mu nʼa kapyeŋɛɛ pyi ge, mɛŋɛ ni zanha da ba do kii yee kii na, ni nɛ jo mu wɛ.» 2 A Tɛhɛnɛ Baa Kilɛ jomɔ pʼi nɔ Eli na na: 3 «Yìri laha naha, mʼa digi shɛ Kilɛ-nɔhɔ ki na, mʼa shɛ ŋmɔhɔ Keriti dugo ki ɲɔ na Zhurudɛn Gba wu ɲahatiimɛ pu ni. 4 Ma na ba dugo ki lɔhɔ ki gbuu. Nɛ jo ni kanriya yi ni jo yi shɛ ma ɲɔ shaa wà.» 5 A Eli di sɔɔ Tɛhɛnɛ Baa Kilɛ wo jomɔ pu na, na yìri na kari. A wu shɛ diin Keriti dugo ki ɲɔ na Zhurudɛn ɲahatiimɛ pu ni. 6 Kanriya yi bi se na buuri ni xaara kaan wu mu ɲisɔɔgɔ ni yakoŋɔ, a wu ganha na dugo ki lɔhɔ ki gbuu. 7 Ga tuun wa ya pa doro ge, a kee dugo ki lɔhɔ kʼi xhɔ, bani zanha ya pa nige ɲiŋɛ ki na wɛ.Eli ya tigi naxhugoshɔ wa ɲuŋɔ ni Sarɛpita kulo li ni
8 Wee tuun wu ni, a Tɛhɛnɛ Baa Kilɛ jomɔ pʼi nɔ Eli na na: 9 «Yìri mʼa shɛ Sidɔn kabanugo kulo la ni, lee mɛgɛ ki ɲɛ na Sarɛpita, mʼa shɛ diin wà, nɛ jo ni naxhugoshɔ wa ni lee kulo li ni, jo wee wu shɛ ma ɲɔ shaa wà.» 10 A Eli di yìri na gari Sarɛpita ni. Ba wʼa nɔ kulo li tajege ki na wɛ, a wʼi naxhugoshɔ wa ta wà, wee bi kajiiye shaa. A wu wee cee wu yiri na wu pye: «Nʼa ma ɲɛɛri, shɛ lɔhɔ nifɛnhɛfɛnhɛnɛ la ko yaara la ni ma pa na kan di gba.» 11 Ba wee cee wu bi gaaŋi lɔhɔ ki fɛni wɛ, a Eli di wu yiri na wu pye: «Nʼa ma ɲɛɛri, mʼa shɛ ma ni buuri bɛ ni mayɛ keŋɛ ni.» 12 A cee wu jo: «Tɛhɛnɛ Baa Kilɛ, ma Kilɛ ɲìi wo wu mɛgɛ na, buuri ɲɛ nɛ mu wɛ. Myɛ keŋɛ ɲii nigin yɛ wu ɲɛ cogo shɔɔ li ni wà, ni sìnmɛ nifɛnhɛfɛnhɛnɛ sìnmɛ shɔɔ li funŋɔ ni. Nɛ pa di ba kajiipyaa shuun sha di guri zhɛ yee yàa na ni na ja wu mu, wù na ba yee li na da xu, bani yaaga katii wa nige wù mu wɛ.» 13 A Eli di jo: «Ma ganha fya wɛ, shɛ li pye ba mʼa yi jo wɛ, ga mʼa fɛnhɛ buuri nifɛnhɛfɛnhɛnɛ la yàa na mu, mʼa ba ni li ni na mu naha. Lee kadugo na ma na ba wa yàa ma ni ma ja wu mu. 14 Bani yemu Tɛhɛnɛ Baa Kilɛ Izirayɛli wo Kilɛ wʼa jo ge, yee yi wa mɛ na: ‹Cogo shɔɔ li myɛ pu da ga xhɔ wɛ, sìnmɛ pu bɛ da ga xhuuŋɔ shɔɔ li ni wɛ, fo Tɛhɛnɛ Baa Kilɛ ga ba zanha shan caŋa kemu ɲiŋɛ ki na.› »
15 Eli ya yemu jo ge, a cee wu gari na shɛ lee pye. A wu ni wu kpɔɔn le ni Eli di ɲɔlige ta taatuunnɔ funŋɔ ni. 16 Shɔɔ li myɛ pu ya xhɔ wɛ, shɔɔ li sìnmɛ pu bɛ di ya xuuŋɔ wɛ, na yaa ni Tɛhɛnɛ Baa Kilɛ jomɔ pu ni Eli ɲɔ na.
Naxhugoshɔ wu ja wʼa xu, a Eli di wu ɲɛ
17 Ayiwa, ba tɛɛ la ya pa nɔ wɛ, a wee naxhugoshɔ wu ja wu ba do na yá. A wee pya wu yama pusama di ganha na dɛnri, fo wʼa fɔ wu munaa ni. 18 A wee cee wu Eli pye: «Ɲaha ki ɲɛ nɛ ni mu tɛ ni wɛ, Kilɛ wo ná we? Ta mʼa pa na puga, mʼa ba na funŋɔ to na kakuuŋɔɔ ki na, mʼa na ja wu gbo ya?» 19 A Eli di wu pye: «Ma ja wu kan na mu.» A Eli di pya wu co wu keye ni, na dugi ni wu ni zangaso wu ni, wu wo tashɔngɔ ki ni, na wu sinniŋɛ wu wo kajaŋa ki na. 20 Lee kadugo na, a wu Tɛhɛnɛ Baa Kilɛ ɲɛɛri na: «Tɛhɛnɛ Baa Kilɛ, na Kilɛ we, we naxhugoshɔ we wʼa nɛ tirige wu puga ge, ta mu na zɔɔ mɛ di kakuunɔ pye wee bɛ na, di wu ja wu gbo ya?» 21 A Eli di sinnɛ, na wuyɛ sanhana pya wu na tɔɔɲii taanri, na Tɛhɛnɛ Baa Kilɛ ɲɛɛri sanha na: «Tɛhɛnɛ Baa Kilɛ, na Kilɛ we, nʼa ma ɲɛɛri we pya we munaa li kuruŋɔ pa wu mu sanha.» 22 A Tɛhɛnɛ Baa Kilɛ di sɔɔ Eli ɲɔmɛɛ li na, a pya wu munaa lʼi guri pa wu mu, a wu bye munaa fɛɛrɛ ni. 23 A Eli di pya wu lɔ na foro wu tashɔngɔ ki ni zangaso wu ni, na digi na shɛ wu kan wu nu wu mu, na wu pye: «Ma ja wu ɲìi wo wu we.» 24 A wee cee wu Eli pye: «Nɛ li cɛ nimɛ jo Kilɛ wo ná mu ɲɛ, jo Tɛhɛnɛ Baa Kilɛ wo jomɔ pemu pu wa ma ɲɔ ni ge, pee ɲɛ can.»